رغدة جلال الدين تكتب: في عيدها.. مواقف وطرائف ماما

الأم المصرية ليها بصمتها الخاصة عن أي أم في أي دولة في العالم وبمناسبة عيد الأم قعدت أفكر تكتبي إيه يا رغدة؟.. يا رغدة تكتبي إيه في اليوم ده؟، وجه على بالي إني أصبح عليها بشكل مختلف وأتكلم عن مواقفها الكوميدية معانا.

 الشبشب

الشبشب أسرع وسيلة عقاب للأم المصرية لو ضيقتها تسكت وفي صمت تروح ماسكة الشبشب وتلاقي حاجة جاية عليك من بعيد صاروخ أرض جو يجي في وشك يجي في عينيك مش مشكلتها المهم إنها تفش غلها فيك.

بهدلة الشارع

الأم ميحللهاش تبهدلك إلا في الشارع. تكون ماشي جمبها في أمان الله  وتروح مزعقة فيك، «طب ياماما وطي صوتك الناس»ـ تقولك «مش موطية خليهم يعرفوا وكستي في ولادي».. «طب يا ماما أنا عملت إيه»، ترد زي الصاروخ «قول معملتش إيه» :D.

الفضيحة بجلاجل

تكونوا معزومين عند حد تلاقي فجأة راحت قايلة «دي ما بتشلش أشاية في البيت مش عارفة هتتجوز إزاي»، ده بالنسبة للبنات أما الولاد فتقول «طول اليوم قاعد قدام الكمبيوتر مبيفتحش كلمة»، طبعا وأنت بتكون في سرك قاعد تقول «يا ماما كفاية فضايح منظري بقى قلة قدام الناس» وطبعًا لو قولت كدة هتقولهم شوفوا الواد مش عجبوا الكلام مش قولتلكوا النت أكل دماغه جيل أخر زمن :D

فرح يعني جوازة

لما تروحي فرح معاها تلاقيها قايمة كدة في نص الفرح بتسلم على المعازيم وجايبة معاها إبن فلان الفلاني وجاية ناحيتك وتقولك «شوفي إبن طنط سوسو كبر إزاي فاكرة لما كنتي بتلعبي معاه وإنتي صغيرة»، وإنتي طبعًا ولا فاكرة حاجة. بس على مين هتفكرك برده :D

 وإن جيت ولقتها؟ ها

تكون حاطط حاجتك في مكان معين في البيت بعد كدة تيجي كمان ساعة مثلًا تدور عليها متلقهاش تقوم تسألها تقولك والله ما حركت حاجة من مكانها وبعد خناقة طويلة تقولك طب لو «قمت وجبتها ليك».. المشكلة في الجملة، المشكلة إنها فعلا بتجبهالك :D

الزغرة 

لما تكونوا خارجين في أي مكان فيه زغرة كدة بتزغرها ليك عشان تسكت وتبطل تعمل حاجة غلط وإنت ولا إنت هنا فهى تقعد تكتر الزغرة وإنت ولا إنت هنا بردة وطبعًا قابل يا وحش بقى لما تروحوا البيت وشوف هيحصلك إيه يا برنس :D ياويلك يا سواد ليلك :D

نتكلم جد بقى برغم كل مواقفها معانا وخناقتنا معاها وعصبيتنا عليها في أوقات إلا إنها مستحملانا وبتحبنا من قلبها مش عايزة مننا أي حاجة غير إننا نكون كويسين ومبسوطين ونتجوز ونريح قلبها.. بس بردة هنتجوز على مزاجنا اللي بنحبه يا ماما :D

كل سنة وكل أم بخير يارب، وربنا يجعل مثوى كل أم فارقت الحياة الجنة ونعيمها :)