أفكار لفوتوسيشن «تجنن» لو فرحك قرب

الصور هى الذكريات اللي بتوثق أحلى لحظات حياتنا وحبك من أبهج اللحظات اللي مينفعش ميتخدش ليها فوتوسيشن يخبل العقل.

لو فرحك قرب أو حتى خطوبتك قربت، هنعرفك في الموضوع ده على أفكار لفوتوسيشن مبهجة ليكي إنتي وحبيبك :)

تاريخي

عبق التاريخ ديه الجملة اللي كل لما نفتكر تاريخنا لازم نقولها لأنه قد إيه كان عظيم وكل تفصيلة من تفاصيله عبارة عن لوحة فنية منحوتة بجمال مصر.

فإيه رأيك بقى إنك تكوني إنتي وهو جزء من اللوحة ديه.. يعني ممكن مثلًا تعملي فوتوسيشن في قصر البارون أو القلعة أو الأهرامات أو أي مكان تاني جه في بالك وإنتي بتقرأي الكلام ده :)

الصورة من صفحة Ahmed Rajeep Photography

زمان

«وعايزنا نرجع زي زمان قول للزمان إرجع يازمان» أم كلثوم في الكوبليه ده كانت عارفة قد إيه إننا هنشتاق في كل لحظة إننا نرجع لأيام وحلاوة زمان.

وديه بقى فكرة الفوتوسيشن التانية اللي بقترحها عليكي وهي إنك تاخدي حبيبك وترجعوا بآلة الزمن لأيام زمان زي سمير وشهير وبهير :D وطبعًا وسط البلد على الرغم من زحمتها إلا إنك لما تمشي في شوارعها وحاراتها هتشمي ريحة زمان :)

الصورة من صفحة Strike Photography

البحر

البحر دايمًا ليه سحره الخاص وخصوصًا وقت الغروب والشمس بتسقط في الميه. حقيقي سبحان من أبدع وعشان كدة لازم متفوتيش اللحظة ديه وتعملي فوتوسيشن إنتي وحبيبك على البحر.

وبجانب إنك هتعملي فوتوسيشن جميل جدًا حبكوا كمان هيزيد لأن البحر دايمًا بيقرب القلوب أكتر وأكتر.

الصورة من صفحة Said Mhamad Photography

جنان

الفكرة ديه بقى مجنونة وحلوة فلو متاح إنك تعمليها إنتي وهو إعملوها :) الفكرة ديه حكايتها إن زوج وزوجة قرروا إنهم يحتفلوا بعيد جوازهم التاني بطريقة مختلفة اللي هى إنهم يحتفلوا بيه في بيت شبه بيت فيلم UP.

ولبسوا نفس لبس أبطال الفيلم «كارل» و«إيلي» وعاشوا نفس القصة بتفاصيلها الحلوة :)

فممكن تعملي إنتي وهو فوتوسيشن مثلًا على سفينة شبيهة لسفينة فيلم «تيتانيك» وتلبسوا لبس روز وجاك وتنقي مشاهد من الفيلم شايفة إنها متاح إنكوا تعملوها وتتصور :)