الخلاصة في الإنجليزي.. علم نفسك بنفسك
لو عايز تتعلم إنجليزي، قدامك طريقتين، الأولى أنك تدفع فلوس في الكورسات وفي الكتب والامتحانات بتاعتها، والتانية (وهي الأشهر حاليًا) هي التعلم الذاتي، يعني تعلم نفسك بنفسك وكل الي هتحتاجه «وصلة نت».
لو قررت تتعلم بالطريقة التانية لازم تاخد بالك من كذا حاجة، «شبابيك» هتعرفك عليها في التقرير ده.
- حط لنفسك جدول
في الكورسات أنت بتدفع فلوس عشان يتحطلك جدول تمشي عليه، طب ليه متحطهوش أنت بنفسك؟
حدد لنفسك أنت عايز تنجز أد أيه في السنة وبعدين في كل شهر، وبعدين قسمه على الأسابيع، وبعدين على الأيام، وخلي الجدول مرن يعني يتغير بحسب الظروف ويكون مناسب لطبيعة يومك سواء بتشتغل أو بتدرس.
أهم حاجة متحطش جدول مثالي وغير واقعي، لأنك هتحبط لو موصلتش للأهداف دي، فحدد هدف متوسط زي:
- أنك تحفظ 200 كلمة جديدة أو أفعال أو جمل جديدة في الشهر.
- أنك تخلص جزء من الكورسات الموجودة على المواقع والتطبيقات دي.
- أنك تخلص جزء معين من كتاب من الكتب التعليمية دي.
- تتفرج على 10 فيديوهات في الأسبوع من أي قناة من القنوات دي
على حسب قدراتك وظروفك حدد الجدول بتاعك
- سجل تقدمك
أيًا كان مدى تقدمك في اللغة- حتى لو بسيط جدًا- سجله، وحط علامة صح على الحاجات اللي انجزتها في الجدول بتاعك.
وده هيشجعك تكمل وتنجز باقي الأهداف، وتعرف أنت مستواك اتقدم بنسبة كام، وهل محتاج تزود مجهودك ولا أنت ماشي بمعدل معقول وهكذا.
لو تعرف أصدقاء ليك بيتعلموا ذاتيًا زيك، تشاركوا مع بعض خبراتكو والحاجات اللي حققتوها وممكن تعملوا قعدات تتبادلوا فيها اللي وصلتولوا وتتكملوا عن الحاجات اللي لسه عايزين تعملوها، دا هينشطك ويحفزك تنجز أكتر.
- عيش اللغة
اللغة مش أنك تكتب وتقرأ بيها كويس، دا هيبقى كويس مبدئيًا لو أنت لسه مبتديء.
لكن عشان تحسن من مستواك، عيش اللغة في كل حاجة حواليك، خاصة في الحاجات اللي بتحبها، يعني اقرأ عن الحاجة اللي بتحبها مقالات بالإنجليزي، لو أنت من هواة الروايات، اشتري نفس الروايات اللي بتحبها بس بالإنجليزي، اكتب الأقوال المأثورة اللي بتحبها بالإنجليزي، أو ترجم المقولات العربي للإنجليزي وخليها دايما قدامك، لو بتحب الكتابة جرب تكتب بالإنجليزي كتير حتى لو بتكتب لنفسك بس، والأغاني الإنجليزي الي بتحبها طلع الكلمات بتاعتها lyrics من على يوتيوب وغنيها بالإنجليزي.
عايز تطور نفسك في الإنجليزي؟.. دورات سعرها حلو
- متفتكرش أن الموضوع سهل
أي لغة عشان تتعلمها محتاجة نفس طويل وإصرار، متتوقعش أن مستواك هيتحسن بين يوم وليلة، التكرار والاستمرار في تحسين مستواك من الحصيلة اللغوية، والقواعد النحوية لحد طريقة النطق الصح هياخد وقت على حسب مجهودك واستجابتك.
المهم أنك تبدأ تاخد خطوات فعلية بأي طريقة، سواء طريقة الكتب التعليمية أو الفيديهوات أو تطبيقات الموبايل أو التواصل مع أشخاص متحدثين باللغة الأصلية.
- تابع الصفحات دي
أكيد بتقضي وقت كتير على «فيس بوك» بتقلب في الصفحات والفيديوهات والمواقع، وتلاقي نفسك ضيعت اليوم كله قدام «فيس بوك»، الصفحات دي بتقدم مادة علمية للإنجليزي مفيدة جدا لو تابعتها هتزودلك معلومة كل يوم تساعدك تقوي من اللغة.
