رئيس التحرير أحمد متولي
 انسى الماضي.. 6 خطوات هتساعدك منها العلاقات الجديدة (انفوجراف)

انسى الماضي.. 6 خطوات هتساعدك منها العلاقات الجديدة (انفوجراف)

دايمًا بنسمع إن «اللي ملوش ماضي ملوش حاضر»، بس أكيد الماضي اللي كانوا يقصدوه مش اللي بنمر فيه بعلاقات بتوجعنا أكثر ما بتسعدنا.

العلاقات دي ماضيها لازم يتنسي علشان ميجيش علينا الوقت اللي نصحى فيه منلاقيش حتى نفسنا.

وعلشان كده قبل ما تفكر إزاي هتبدأ الخطوة دي، استجمع إرادتك لإنها هي الوحيدة اللي هتقدر تنسيك أي علاقة دخلت فيها ووجعتك، وفي الوقت ده هتكون مستعد إنك تطبق الـ6 خطوات دول لنسيان الماضي.

اشغل وقت فراغك

الخطوة دي مش بس هتساعدك إنك تنسى أي حاجة وجعتك قبل كده، لا دي هتخليك كمان معندكش وقت للتفكير في أي حاجة تانية غير الشغل أو القراءة اللي بتحبها، أو حتى الحفلات اللي بتخليك تركز مع اللي حواليك وتسيب نفسك.

بس متنساش وأنت بتشغل وقت فراغك إنك تشغله صح، بمعنى إن مينفعش يبقى يومك كله شغل؛ لإن في وقت هيجي عليك تفتكر أي حاجة قديمة وأحيانًا ممكن ده يحصل وأنت في الشغل اللي بتعمله بإيدك بس عقلك في مكان تاني، علشان كده لازم يكون يومك مش بس للشغل خلي فيه أي حاجة بتحبها وهنا هتبدأ فعلًا تنسى.

اقرأ أيضًا⇐قبل ما تغرق لشوشتك ع الفاضي.. 7 فروق بين الحب والإعجاب

التصالح مع النفس

لو مش عارف إزاي تتصالح مع نفسك، هقولك إن المرحلة دي محتاجة منك ببساطة إنك تقعد مع نفسك وتعاتبها صح بإنك تعرف مين اللي غلط ووصلكوا للمرحلة دي؟ يا ترى أنت ولا هي لما قرر يبعد لأي سبب أيًا كان؟

بس قبل كده قول لنفسك إن الهدف من كلامك ده إنك تخرج أي وجع بتحس بيه، ولو حابب إنك تتكلم مع حد قريب ليك اختار حد تكون عارف أنه هيكون مرايتك اللي هتريحك في الصح مش الغلط.

وفي الوقت ده أيًا كان اللي هتوصله في النهاية، حاول تتعلم من التجربة اللي دخلتها لإن لولاها مكنتش هتبقي أقوى من الأول.

التسامح

طول ما أنت مش مسامح الشخصية دي عمرك ما هتعرف تسيطر على عقلك وقلبك، هتفضل دائمًا تفكر فيها حتى لو كان تفكيرك سلبي.

قول لنفسك إنها انتهت خلاص، ولو شايف إنك الطرف المظلوم في العلاقة دي يبقى المفروض تشكر ربنا إنه بعدها عنك؛ لإنك لو فضلت تفكر كتير تفكير مش إيجابي هيزيد الحقد جواك ومش هتعرف تدخل أي علاقة تانية وهتبقى شايف إن الكل سواءً ومش مختلفين عنها.

التركيز على المميزات

مفيش أفضل من الوقت ده علشان تفكر في مميزاتك وتركز معاها شوية مش مع أي حد تاني، حاول تكتشفها صح وتحبها أكتر من الأول لإنها أكيد تستاهل الحب.

الخطوة دي ممكن تخليك تغير من أولوياتك ومن نظرتك لكل شىء حواليك؛ لإنك هتكتشف معاها حاجات جديدة ممكن تقول بعدها إن اختيارك الأولاني كان غلط أو إن مكنتش دي الإنسانة اللي هتكمل معاك.

اقرأ أيضًا⇐الخروج الآمن.. كيف تنهي علاقة عاطفية بأقل الخسائر؟

العلاقات الجديدة

دخولك في علاقات جديدة هيساعدك إن حياتك تبقى مشغولة، ومتبقاش مقفولة على ناس كانت في الماضي.

ده غير أنها كمان هتخليك تخرج وتتكلم كتير، مش توقف حياتك عند السكوت اللي مبيسمعهوش حد غيرك أنت.

الأغاني العاطفية

تفتكر لما تقعد كل يوم تسمع أغاني بتحسسك دائمًا إنها بتكلم عنك أنت وبس، أكيد شريط المواقف اللي اتعرضتلها خلال تجربتك دي هيمر قدامك في كل لحظة من غير ما يقف، يبقى ببساطة عمرك ما هتنسى.

علشان كده حاول الفترة دي تبعد عن أي حاجة بتفكرك بالشخصية دي حتى لو كانت أغاني؛ لإن الحاجات البسيطة دي بتساعدنا كويس إننا ننسى أي وجع.

انفوجراف نسان الماضي

⇓⇓نرشح لك⇓⇓

المراجعة كيف-تتخلص-من-عادات

سوزان حسني

سوزان حسني

صحفية مهتمة بالكتابة في مجال العلاقات