فترة التسعينات كانت مليانة بأغاني حلوة كتير محفورة لحد دلوقت في ذاكرتنا وكل ما نسمعها بنحس بنوستالجيا لذكريات التسعينات. تعالوا نفتكر مع بعض أبرز أغاني نجوم التسعينات اللي في منهم لسه موجود على الساحة وفيه منهم اللي اختفى:

على بالي

الأغنية ديه اللي أول ما نسمعها واحنا برا مصر نفتكر كل ذكرياتنا مع أهلنا و أصحابنا لأن صوت عايدة أيوبي فيها بيلعب على أوتار مشاعرنا و الأغنية ديه كانت من ضمن أغاني ألبوم على بالي اللي تم إصداره سنة 1991، ورغم أن عايدة الأيوبي اختفت شويه ورجعت في الفترة الأخيرة تقدم بعض الأغاني مع فرقة "كاريوكي" إلا أن "على بالي" مختفش لحظة بالنسبة لكتير مننا.

كل البنات بتحبك

حسام حسني، خلى البنات كلها تتمايل على أغنيته "كل البنات بتحبك" اللي كانت من إنتاج سنة 1991، واللي خلاها اسم ألبومه لأنها كانت سمعت في الفترة ديه جداً.

داري رموشك

علاء عبد الخالق خلى كل بنت تركز في رموشها وفي جمال عينها وقت ما غنى ليها، الأغنية ديه كانت من ألبوم "هتعرفيني" اللي تم إصداره سنة 1991.

الغربة

إسماعيل البلبيسي، في الأغنية ديه قلب المواجع على كل واحد عايز يتغرب ويسيب البلد ، الأغنية ديه كانت من إنتاج "صوت الدلتا" 1993، وكانت ألحان "البلبيسي" برده، وكلمات عنتر هلال وتوزيع طارق مدكور، وكانت من ضمن أغاني ألبومه الوحيد "شاهدين".

مش نظرة وإبتسامة

"سيمون" في الأغنية ديه إدت وصفة سحرية للولد اللي عايز يكسب قلب بنت.. الأغنية ديه كانت من إنتاج 1996 وكانت من ضمن ألبوم "في حاجة كدة".. "سيمون" بعدت شويه عن الغُنا، واتجهت للتمثيل، وفـ تصريحات من ليها من فترة قصيرة قالت إنها هتعمل ألبوم جديد.

تعالى

الأغنية ديه غناها طلعت زين، في كليب راجعين لعمرو دياب، وكانت من إنتاج سنة 1995، وده كان أول كليب عربي يتم تصويره على طريقة السينما كليب، وظهر لينا طلعت زين وكأنه زي نجوم الزمن الجميل .

وحياتي عندك

الفنانة الراحلة "ذكرى" في الأغنية دي كان صوتها مليان شجن عظيم.. الأغنية اللي تم انتاجها في سنة 1995، كانت من الأغاني المصورة فيديو كليب، واللي عايشة في وجدان جيل التمانينات والتسعينات.

قشر البندق

أغنية لحميد الشاعري إتغنت في فيلم قشر البندق اللي كانوا عاملين فيه مسابقة أكل اللي معظمنا كان نفسه ياكل معاهم :D الاغنية كانت من إنتاج 1995وكانت من كلمات عادل عمر وألحان وتوزيع موسيقي حميد الشاعري ، وقشر البندق برده كان اسم ألبوم حميد الشاعري رقم 13 اللي كان من إنتاج شركة الشرق الأوسط .

عيني

الأغنية ديه كانت لحميد الشاعري وكان بيغني معاه هشام عباس، وكانت اسم لألبوم "حميد" رقم 15 اللي تم إصداره سنة 1997وكانت نيكول سابا موديل في الكليب ده والألبوم ده كان من إنتاج شركة عالم الفن.

عودوني

ألبومات عمرو دياب كلها في فترة التسعينات كانت بتسيب بصمة في نفوس جيل كامل وأغنية "عودوني" من الأغاني الجميلة اللي أثرت فينا لدرجة إننا قعدنا نحرك إيدينا وقتها زي الموديل في كليب عودوني، وكمان أفتكر إن عبلة كامل كانت بتدندنها وتتمايل عليها وتحرك إيديها برده في مسلسل إمرأة من زمن الحب.. الأغنية دي كانت من ضمن ألبوم عودوني اللي تم إصداره سنة 1998

وأنا أعمل إيه

هشام عباس دايماً أول ما يغني تلاقيك بتدندن وراه الأغنية على طول.. صوته من الأصوات اللي بتتسرسب جوا الواحد وتحسه كأنه واحد صاحبك، الأغنية دي كانت من ألبوم حبيتها اللي تم إصداره سنة 1998

4
4
0
0
0
1
0

شارك المقال


صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»


أخترنا لك