رئيس التحرير أحمد متولي
 الميكب بيسيح في الصيف؟.. 6 نصايح عشان يثبت

الميكب بيسيح في الصيف؟.. 6 نصايح عشان يثبت

بما إن الصيف داخل علينا ففي بعض البنات بتواجه مشلكة إن الميكب بيسيح منها وبيبوظ وشها. وعشان المشكلة دي تروح خالص خبيرة التجميل وصال المصلوحي بتقدملك في الموضوع ده نصايح تمشي عليها.

عناية بالبشرة

في البداية «وصال» بتنصحك إنك تعتني ببشرتك لو فيها أي مشكلة. فلو بشرتك جافة استخدمي معاها كريمات ترطبها ولو دهنية استخدمي معاها ماسكات تنشف البشرة من الدهون وتشيل الرؤوس السوداء.

طريقة معقولة

أما بخصوص الميكب اللي بيسيح، «وصال» بتقولك إنك لازم تحطي الميكب بطريقة معقولة، بمعنى انك متحطيش طبقات كتيرة وتقيلة من الميكب على إعتقاد منك إنك بكدة بتثبتيه.

لأن كل ما عملتي كدة كل ما هتلاقي الميكب بيسيح منك وخصوصًا في فترة الصيف. وكمان الصيف عايز منك ميكب بسيط لأن كل ما كان بسيط كل ما بين تفاصيل جمال وشك لأن الميكب جماله مش في كتره.

قالب تلج

وصال كمان قالتلنا على فكرة حلوة وبسيطة تثبت الميكب وهي إن قبل ما تحطيه هاتي قالب تلج ومشيه على وشك قبل ما تحطي الميكب بربع ساعة لأن التلج بينعش البشرة وبيقفل المسام وبيساعد على ثبات الميكب لأقصى درجة ممكنة.

وبعد كدة حطي الميكب بس إدي مساحة 10 دقايق ما بين الحاجة والتانية يعني حطي الفونديشن، وإستني 10 دقايق وبعدين حطي البودر وده عشان تدي البشرة فرصة إنها تتشرب الميكب.

ماركات

«وصال» شايفة إنك لما تيجي تشتري ميكب هاتي اللي يكون ماركة عشان يكون كويس على بشرتك لأن فيه ميكب بيكون جودته مش كويسة وكمان بيسيح. وفيه شوية ماركات قالتلنا عليها سعرها كويس تقدري تجبيها.

الفونديشن

ماركة كيرولا أو برجوا أو ميبيلين.

البودر

ماركة ماكس فاكتور أو مافلا  أوميبيلين.

الماسكرا والأيلينر

جبيهم وتر بروف عشان ميسحوش منك. وفيه نوع ماسكرا ممكن تجبيه كمان إسمه كرينال وده بيعالج الرموش وبيطولها ويكثفها.

الأيشادو

ماركة نيكيد

آخر حاجة

«وصال» بتقولك إنك لما تروحي لأي مكان متخصص تجيبي منه ميكب اسألي على الميكب اللي يناسب نوع بشرتك عشان تاخدي الحاجة الصح.

المراجعة

كيف-تتخلص-من-عادات

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»