الفوتوسيشن حلو جوي يا بوي.. 6 أماكن مع حبيبتك
لو عايز تحتفل بحبيبتك بعد ما ارتبطوا ببعض وتعمل أنت وهي فوتوسيشن بس مش عارف إيه الأماكن اللي ممكن تروحوها وتتصوروا فيها، هنقترح عليك في الموضوع ده شوية أماكن تخلي الفوتوسيشن جميل جمال ملوش مثال :)
قصر البارون
قصر البارون من الأماكن اللي هتحس فيها إنك رجعت للزمن ورا وبقيت سمو الأمير وحبيبتك سمو الأميرة، والمكان هيحسسك بكدة من كتر حلاوة تفاصيله اللي فيها ريحة تاريخنا الجميل.
عشان تعمل فوتوسيشن هتحتاج تروح المجلس الأعلى للأثار في العباسية 4 شارع فخري عبد النور قدام أكاديمية الشرطة، وهتعمل تصريح وتروح قصر البارون في شارع العروبة، مصر الجديدة، القاهرة وهتدفع تذكرة حوالي 400 جنيه.
وده رقم المجلس الأعلى للأثار لو عايز تعرف معلومات أكتر: 26859254
شارع المعز
المعز بقى ده تحس فيه إنه بيعبر عن جمال مصر وتفاصيله بتحلي أي صورة ممكن تروحوا في أي وقت وتعمل فوتوسيشن معتبر. وعشان تروحوا بقى هتركب مترو للعتبة أو رمسيس ومن هناك في عربيات بتروح للحسين هتركبها وتنزل الغورية وبعدين تعدي الشارع حتلاقي نفسك في شارع المعز.
اقرأ أيضًا: متتصورش مع الخيول.. 5 نصائح لاختيار مصور فرحك
حديقة الأزهر
حديقة الأزهر مليانة مناظر طبيعية كتير وهواها منعش وجميل وهيبقى مكان حلو برضه للتصوير مش محتاج غير إنك تروح وتدفع تذكرة الدخول بس. وعشان تروحها هتركب باص من السيدة عائشة وهتقولوا رايح حديقة الأزهر وهيزلك هي هتكون في شارع صلاح سالم.
قد يهمك أيضًا:فرحك قرب.. أفكار لفوتوسيشن «تجنن»
الريف
الصورة من صفحة Ahmed Rajeep Photography
أو لو حد من قرايبك عايش في الأرياف مثلًا ممكن تروح ليه وتتصوروا وسط الخضرة والزرع وتعمل فيها حسن وهي تعمل نعيمة J وعشان الصورة تطلع حلوة البسوا الجلاليب الفلاحي وتقمصوا الدور زي ما الصورة بتوضح.
وسط البلد
عبق التاريخ في منطقة وسط البلد اللي وأنت ماشي فيها بتشم ريحة الزمن الجميل في بيوتها القديمة اللي لسة المدنية مغيرتهاش. خد حبيبتك وروح اتصور هناك واختار الوقت المناسب اللي الدنيا فيها تكون رايقة.
قد يعجبك أيضًا:فرحك قرب.. أفكار لفوتوسيشن «تجنن»
البحر
والبحر طبعًا من الأماكن الجميلة اللي ممكن تروحوها وتعملوا فوتوسيشن جميل بس متخوفهاش بالحوت :D وحاول تنقي الوقت اللي ميكونش فيه زحمة على الشط و يعتبر أحلى وقت للتصوير وقت الغروب.
