رئيس التحرير أحمد متولي
 «البيت الخشب».. عربية أكل في الدقي ودي قصتها

«البيت الخشب».. عربية أكل في الدقي ودي قصتها

حوار: أحمد عبده ورغدة جلال

المشاريع الشبابية دايمًا بتكون بؤرة الأمل في عز الضلمة لأي حد نفسه يحقق حلمه. ومحمد صبحي خريج كلية السياحة والفنادق من النماذج الشبابية اللي قدر يعمل مشروع عربية أكل مختلفة عن السائد وخلى كل الناس تحب تاكل من عنده :)

و«شبابيك» كان ليه السبق في إنه يعمل معاه أول حوار يحكيلنا فيه عن مشروعه، وإزاي بدأ.

فكرة المشروع

فكر «صبحي» في المشروع من قبل ما يدخل الجيش وبعد ما قضى الخدمة العسكرية بدأ في تصميم المشروع على الكارتون قبل ما ينفذه بإيديه. هو كان حابب إنه يغير نظرية الأكل في الشارع من خلال حاجة جديدة ومحدش عملها قبل كده وفي الأخر عجبت كل الناس.

13699407_1074735779229084_443311261_o

عايز تبدأ مشروع؟.. اعرف إزاي الميزانية «متخرمش»

تصميم العربية

تصميم العربية على شكل بيت من خشب الأشجار شبيه بإستايل البيوت اللي في الغابات وده كان «صبحي» عايز مشروعه يتميز بيه وفكرة التصميم محمد استلهمها من القرى السياحية اللي كان شغال فيها قبل ما يدخل الجيش فهو حب إنه ينقل التصميمات اللي عجبته لمشروعه الخاص.

ومن كتر ما التصميم كان كويس وعجب الناس، فيه فندق كان عرض عليه إنه يعمل نفس تصميم العربية جوا الفندق وهو رفض لأنه عايز المشروع يستمر زي ما هو في الشارع.

مطبخ محمد

محمد صبحي عنده المطبخ الخاص بيه، اللي بيحضر فيه الأكل وفي ناس بتحضر الأكل معاه وهو بيبدأ شغل على العربية من الساعة 9 الصبح وكل الأعمار بكل المستويات بتاكل من عنده.

التطوير والحلم

بيحلم «صبحي» يطور المشروع ويكون عنده فرع تاني في الشارع ويكمل بنفس فكرته اللي بدأها ومش عايز إنه يكون عنده محل. وفي أصحاب مطاعم كانوا عرضوا عليه يدخل شريك بالنص معاهم وهو رفض.

لو صاحب مشروع.. 4 مؤسسات هتساعدك تبدأ

الدخل المادي

وعلى الرغم إن الموضوع مش بيجيب لـ «صبحي» دخل كافي لكنه مش بيفكر في ده لأن اللي بيبدأ مشروع مفروض يفكر إزاي ينجحه الأول ويكمل فيه واللي بيفكر في الفلوس مش بيعمل حاجة.

أكتر أكلة مشهور بيها

ساندويتش التونة بالمايونيز من أكتر الأكلات اللي «صبحي» مشهور بيها وهي رقم واحد عنده. وقبل الأكل كان مشهور بالعصير بتاعه اللي كانت محلات العصاير الكبيرة بتطلبه منه لدرجة إنه سموه «محمد جهينة».

13816789_10209963765957425_1952419581_n

عشان تبدأ مشروعك.. اعرف يعني إيه «ريادة أعمال»

نصيحة للشباب

وبينصح «صبحي» الشباب إن كل واحد يدور جواه على الموهبة اللي عنده ويركز عليها لأن ربنا خلق كل إنسان فيه حاجة متميز فلازم يسعى فيها ويحققها ويكون عارف إن هتقابله مطبات وعقبات وده اللي اتعلمه «صبحي» من الجيش.

وكمان الشاب هو اللي ممكن يدي لأهله فرصة إنهم يقولوا عليه فاشل لأنه مش بيسعى أو ناجح لأنه سعى ووصل للي عايزه.

عنوان عربية محمد 

شارع أمين الرافعي أمام إدارة الدقي التعليمية.

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»