رئيس التحرير أحمد متولي
 فايا يونان في مصر.. هذه حكايتها مع الغناء وبشار الأسد

فايا يونان في مصر.. هذه حكايتها مع الغناء وبشار الأسد

فايا يونان مطربة سورية صاحبة أغنية «لبلادي» اللي أول مانزلت انتشرت بسرعة كبيرة على السوشيال ميديا ووصلت لأكتر من مليون مشاهدة وبما إن فايا هتزور مصر يوم 2 أغسطس وهتعمل حفلتين فحبينا في الموضوع ده نعرفكو عليها أكتر.

بداية فايا الفنية 

 اتولدت فايا في مدينة حلب بسوريا يوم 20 يونيو سنة 1992. وبعد كدة اتنقلت للسويد وهى عندها 11 سنة وكانت بتحب تلعب على البيانو وتغني في أي مناسبة عائلية بس موهبتها الغنائية المتميزة ظهرت وهى عندها 19 سنة وده لما غنت في الإيفينتات الثقافية اللي كانت بتحصل في مدينة ستوكهولم في السويد وهى دلوقت عندها 22 سنة.

لبلادي

«لبلادي» هو أول فيديو غنائي لفايا مع أختها ريحان اللي في الأساس صحفية وبتمتلك برضه الموهبة الغنائية. والأغنية  أول ما اتنشرت على مواقع التواصل الإجتماعي حازت على إعجاب أكتر من مليون مشاهد. وكمان مهرجان قرطاج السينمائي دعا الأختين إنهم يحيوا حفل افتتاح المهرجان بأغنيتهم.

وريحان اللي كتبت كلمات الأغنية واللي جات ليها فكرتها من مشاهدة نشرة الأخبار مع أختها. الأخبار اللي كانت مليانة قتل في سوريا والعراق ولبنان وفلسطين. وعبرت عن سعادتها بإنتشار الفيديو وقالت على صفحتها الشخصية على موقع التواصل الإجتماعي.

 «أجمل ما في عملنا أن هناك في هذا العالم وفي بلادي، من وصله صوتنا.  ومن بعث لنا بالرسائل قائلًا: نعم أريد أن أرى بلادي سالمة ومنعمة وغانمة ومكرمة نعم ‫‏سأراك‬، هناك من بقى محملً بالأمل رغم الجراح، وهناك من بقى ينتظر أي إشارة أمل ووجدها في عملنا».

مؤهلات علمية

درست فايا ادارة الأعمال والاقتصاد وحصلت على درجة الماجستير فيهم من جامعة غلاسكو وهى تعتبر أكبر جامعة في  اسكتلندا. وفايا بتتكلم أربع لغات العربية والإنجليزية والسويدية والسريانية. وبعض الكلام من الفرنسية.

أحب يديك 

أغنية أحب يديك هى الأغنية الأولى الخاصة بفايا بعد أغنية لبلادي اللي شاركتها فيها أختها ريحان ومزجت فايا في الأغنية ديه مابين الغنا بالفصحى وموسيقى البوب وده عشان تقدر توصل لكل الأعمار اللي بيحبوا سواء الغنا بالفصحى أو موسيقى البوب وده اللي قالته من خلال حوارها مع موقع Mbc.

ومن خلال حوار فايا مع قناة Mbc قالت إن اللي مول الأغنية هو جمهور فايا مش شركة إنتاج معينة لأن شركات الإنتاج كانت هتقيدها ومش هتخليها صاحبة رأي في اللي بتعمله وعشان كدة اعتمدت على فكرة  Crowd Funding أو  تمويل الجمهور لمساعدة أصحاب الأفكار الطموحة لبناء مشارعيهم اعتمادًا على تبرعات الناس.

موقفها من بشار 

أغنية لبلادي برغم إعجاب الناس بيها إلا إن في قطاع كبير شافها أغنية متناقضة بسبب إن  موقف فايا وريحان على أرض الواقع كان مؤيد لنظام بشار الأسد فإزاي هما بيغنوا أغنية بيرصدوا الحوادث المؤلمة اللي بتحصل في العالم وفي نفس الوقت هما في الحقيقة مع نظام بشار.

وعلى الرغم إنهم نفوا صحة الكلام ده لكنهم طلعوا مرة تانية في قناة سما السورية وأكدوا تاني دعمهم للنظام والجيش العربي السوري زي ما هتشوفوا في الفيديو ده.

وكمان سبق وصوتت فايا  لبشار الأسد في السفارة السورية في ستوكهولم وده على حسب قول المناضل الديمقراطي علي الأتاسي على موقع صوت روسيا .  

أما الكاتبة والإعلامية اللبنانية ديانا مقلد وصفت الأختين بإنهم وجه جميل لنظام قبيح. وده من خلال مقالها على الشرق الأوسط. واللي بتأكد  فيه نقطة دعمهم للجيش السوري ولنظام بشار الأسد. وإنهم  وجه جميل بيدعم نظام  سوري قبيح.

وأثارت حفلة فايا يونان في الجامعة الأميركية في بيروت اللي كانت  تحت عنوان  فايا يونان تغني تراثنا رد فعل متناقض وده لأن الحفلة مكنتش فيها أي أغاني تنتمي لإحياء  التراث السوري.

وده بحسب ما كتب موقع المدن . وده طبعًا بيجي عكس فيديو  لبلادي اللي بيدل إنها صوت العرب وبالأخص سوريا وبتعبر فيه عن الدمار اللي بيمر بيه الشعب. 

لبلادي النسخة الأصلية 

و فرقة خطوة الفنية المعارضة للنظام السوري نشرت فيديو ساخر بترد بيه على فيديو فايا وسموه لبلادي النسخة الأصلية وكان من تمثيل يوسف بكر ومحمود بكر.

تصريحات ريحان يونان 

وعلى الجانب الأخر ريحان يونان اللي كتبت الأغنية بتتكلم عن الأغنية وبتقول في موقع صوت روسيا  «إن سوريا وطننا الأم يستحق أن نسخر لأجله قلمنا وصوتنا، لنعرف العالم بمعاناة شعبه، مشيرة إلى أن العمل مهدى للبلاد العربية التي تعاني من رجس الإرهاب وقمع الاحتلال»

وبتكمل كلامها وبتقول «العمل يحمل رسالتين الأولى موجهة إلى شعوب العالم الذين يسألون ماذا يحصل في الشرق الأوسط من خلال ترجمة ترافق النص ليوضح الويلات والحروب التي تمر بها كل من سوريا والعراق ولبنان وفلسطين.

والثانية لأهلنا في الوطن، لنقول لهم إننا نشعر بآلامكم وندعم صمودكم ونتطلع معكم إلى وطن معافى يعمه الأمن والسلام»

حفلة 2 أغسطس

فايا هتيجي مصر يوم 2 أغسطس وهتحيي حفلات ضمن فعاليات مهرجان الأوبرا الصيفي على المسرح المكشوف وعبرت عن سعادتها الكبيرة إنها هتيجي مصر وهتشوف الشعب المصري وده على صفحتها الشخصية على موقع التواصل الإجتماعي اللي تقدر تتابعها من  هنا  أو تتابع موقعها من هنا.

وفايا هتكون مجهزة  أغاني كتيرة لفيروز اللي الجمهور شبه خامة جمال صوتها بيها وكمان أغاني للرحباني وسيد درويش و محمد عبد الوهاب وأغاني تانية كتيرة من ضمنها مفاجأة مجهزاها فايا لجمهور مصر.

"إمي نامت عبكير" للسيدة فيروز. مترو المدينة، بيروت، في الأسبوع العالمي لسوريا. شكرا كتير ل Syrian Music Lives للفرصة لكون جزء من هالمهرجان Emi Namet A'bakir for the great Fairouz. Metro Al Madina, Beirut, in the Global Week for Syria. Big thanks to "Syrian Music Lives for the opportunity Posted by ‎Faia Younan - فايا يونان‎ on Monday, May 4, 2015

سعر التذكرة

 75 جنيه وهيكون فيه أماكن خاصة وتخفيضات للطلاب بالبطاقات الدراسية والتذاكر هتكون متاحة على شباك التذاكر في دار الأوبرا. وعشان تعرف أي تفاصيل جديدة تابع الإيفينت.

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»