من عمر الشريف لمحمد رمضان: ثقة في الله نجاح من غير تباهي (مقال)
مقال بقلم: رغدة جلال الدين
محمد رمضان قال عنه النجم الراحل عمر الشريف إنه هيبقى نجم مصر الأول وهيكمل مسيرته الفنية اللي بدأها.
وفعلًا محمد رمضان بقى نجم من نجوم الصف الأول، لأنه خامة تمثيلية جيدة ظهرت بوادرها من خلال الفيديوهات اللي كان بيقلد فيها شخصيات بارزة في المجتمع زي الرئيس الراحل أنور السادات والنجم أحمد زكي اللي كتير من الناس شبهوه إنه هيبقى النسخة التانية منه.
دوره في مسلسل «حنان وحنين» اللي كان بطولة عمر الشريف واللي أشاد من خلاله «الشريف» بموهبة «رمضان» التمثيلية من خلال اتصاله التليفوني بيه على الهوا في احدى اللقاءات التليفزيونية اللي كان فيها. ودوره كمان في فيلم «إحكي ياشهرزاد» اللي أخد عنه جايزة أفضل وجه جديد ضمن مهرجان الإسكندرية السينمائي.
ولكن
محمد رمضان بقالوا فترة بيقدم مجموعة من الأعمال اللي بتدور في إطار راجل من الحارة الشعبية بيواجه ضغوط من المجتمع زي أفلام «قلب الأسد» و«عبده موتة» و«الألماني» و«مسلسل الأسطورة» والأعمال دي وصلت للناس كلها لأنه زي ما قولنا في البداية عنده موهبة تمثيلية بيعرف يوصل مشاعره للناس ويخليهم يصدقوه.
والناس فعلًا بقوا شايفين «رمضان» النجم اللي بيعبر عنهم وعن معاناتهم في المجتمع وللأسف بقوا يقلدوا كل حاجة بيعملها في أعماله من رقص، وتسريحة شعر، وطريقة كلام. خدوا الظاهر منه ومركزوش في النهاية المأساوية ليه في الأعمال دي.
لأن للأسف برضه بعض الشباب معندهمش الوعي الكافي اللي يقدروا يفرقوا بيه بين الصح والغلط ويفهموا الهدف من العمل. وبيشوفوا إن الغلط شيء بيخليهم مختلفين عن المجتمع. ودي الحاجة اللي لازم «رمضان» ياخد باله منها في أعماله إنه لازم يغير فكر الناس للأحسن ويخليهم عندهم وعي مش يخليهم يطلعوا من العمل بكام إيفيه وتغيير جذري للأسوأ في شكلهم الخارجي والداخلي.
وبما إن «رمضان» نقدر نقول عليه إنه بيعبر عن معاناة الشعب والضغوط اللي بيعانيها من المجتمع اللي منها أكيد ضغوط مالية مش قادرة تخليه يحقق حلمه فكان شيء متناقض إنه ينزل على صفحته الشخصية على «فيس بوك» صورة بعد ما اشترى عربيتين بحوالي 7 مليون جنيه وهو بيتباهى بيهم.
الصورة دي أثارت سخرية بعض الفنانين زي محمد هنيدي، وأحمد حلمي، وعمرو مصطفى، وكمان بعض رواد التواصل الإجتماعي.
كلامي عن «رمضان» وبالأخص صورة عربياته اللي عملت ضجة على السوشيال ميديا أول ما نزلت مش عشان أحسده أو أقول إن البلد مش لاقية العيش الحاف وهو رايح يجيب عربية بالشيء الفلاني أو أي كلام من هذا القبيل لأنه في الأول والأخر حر ومحدش يقدر يحاسبه.
لكن كون يجي تعليقه في شكل من التباهي بالعربيات اللي جابها فهنا محتاجين نقوله يا «رمضان» إنت ممكن تخسر قاعدة جماهيرية كبيرة بسبب إنه هيشوف كلامك في أعمالك غير حياتك بمعنى إنك بتعبر عنهم في أعمالك لكن في حياتك بتزود معاناتهم وبتخليهم لما يبصوا على الصورة يحسوا بتناقض، يعني منين بتعبر عنهم ومنين بتتباهى بالملايين قدامهم وده لأن الجمهور بيعتبر النجم اللي بيحبوا واحد منهم مش منفصل عنهم.
وكمان عمر ما كان النجم بفلوسه ولا عربياته النجم دايمًأ بيتقاس بالبصمة اللي سابها في نفوس الناس وأتمنى إنك تسترجع تاريخ عمر الشريف قدوتك وتشوفوا إنه محصلش وعمل كده في يوم.
يا ريت تفتكر كلام عمر الشريف ليك مرة تانية يا «رمضان»، إنه شايفك إنك هتكمل مسيرته فياريت تكملها بدون تباهي وبدون أعمال بترجعنا لورا، وتقدملنا دور يخليك تقدر تكمل مسيرة عمر الشريف وإنت متأكد إن ثقة في الله نجاح.
