لو عايز تبقى جذّاب.. ابعد عن الصفات دي

مين فينا مش عايز يبقي طول الوقت جذاب ومتألق ويحس أنه حلو وواثق من نفسه، أكيد محدش فينا مش عايز كده. حتي لو أنت مضايق ومخنوق والدنيا مقفلة في وشك، خليك دايما حريص على أنك تظهر قدام الناس بمنظر لائق.

بس للأسف في حاجات بقي بنعملها من غير ما ناخد بالنا وبتقلل من جاذبيتنا وبتخلي شكلنا مش في كامل حيويتنا وجاذبيتنا. وفي التقرير ده هنقولك على كام حاجة بلاش تعملهم.

قلة النوم

أنك تروح الشغل أو أي مناسبة من غير ما تكون نايم كويس، ده بيخلي شكلك مرهق وتعبان ومش مركز. وفي دراسات لجامعة السويد سنة 2010 بتثبت أن الأشخاص اللي بيعانوا من اضطراب النوم وعدم أخذ قسط كافي منه يوميا بيكونوا أقل جاذبية من غيرهم. فبالتالي احرص على أنك تنام كويس عشان تبقي جذاب.

التحفظ 

أن تكون متحفظ في استخدامك للغة الجسد ده بيقلل جاذبيتك، زي أنك تكون مكتف أيديك وأنت بتتكلم، أو ضهرك يبقى محني زي الشخص اللي عنده «أتب» بالظبط، أو فارد ضهرك بزيادة أوي. خليك طبيعي وخلي حركات جسمك سهلة وسلسة بلاش تعقيد.

الكسل 

الكسل والخمول بيخلي أي حد يتعامل معاك يحس أنك ممل ومش هيبقي عاوز يتعامل معاك فده هيخليك شخص منبوذ وغير جذاب وهيبعد الناس من حواليك، عشان كده خليك نشيط كدة وحرك J

الضغط العصبي

في دراسة اتعملت سنة 2013 في جامعة نيويورك جه فيها إن الستات صاحبات الأعصاب الهادئة هن الأكثر جاذبية دون غيرهن، فبالتالي احرصي على أنك حتى لو حاسة بالضغط نتيجة الشغل أو البيت متبقيش عصبية عشان ده بيفقدك جاذبيتك وبريقك.

الأفورة

زمان قالوا «اللي يزيد عن حده يتقلب ضده»، فكل حاجة زيادة في الدنيا مش لطيفة يعني مثلا لو أنت فرحان أوي لأي سبب ما حصلك، بلاش تبين أوي أنك مبسوط وتبقي منشكح J زيادة عن اللزوم  عشان لأسباب كتير من ضمنها أن الناس مش كلها بتحبلك الخير وتحب أنك تبقي مبسوط، والأفورة بالفخر بنفسك وبالأملاك الرهيبة اللي عندك ده أو بإحساسك الزيادة زي «سوما العاشق» كده، برضو بيقلل من جاذبيتك وأنك تبقي شخص محبوب. بطل أفورة في كل حاجة في حياتك وحاول تتوازن على قد ما تقدر.

أنك تكون دمك تقيل 

فكرة أنك تكون شخص كئيب ومش بتحب تضحك أو تهزر مع الناس ده بيقلل من جاذبيتك، وأثبتت الدراسات بجامعة أولستر البريطانية أن بغض النظر عن جنس الشخص، فإن الناس مش بتدي أهمية أوي للشخص اللي معندوش حس الفكاهة والهزار والشخص اللي بيسموه «إتم».

بس خلي بالك برضو التوازن حلو يعني مينفعش تكون بتهزر 24 ساعة في اليوم أو دمك تقيل 24 ساعة في اليوم حاول توازن بينهم.

نفس البرفان​​​​​​​​​​​​​​

دراسة في جامعة المكسيك بتقول إن الأشخاص اللي حاطين نفس البرفان مش بيحسوا بانجذاب تجاه بعض، وفي بعض البنات بتتعمد لما ترتبط بشخص تحط البرفان الخاص بيه، خلي بالك ده مش هيخليكي جذابة بالعكس هيثير اشمئزاز الطرف التاني وعدم انجذابه ليكي.

المصدر