تقليل الاغتراب.. لو جامعتك بعيدة وعايز تقرّب الحل هنا

في طلاب كتير مجموعهم بيدخلهم كليات بعيدة عن محافظاتهم، وبالتالي بيتغربوا عن أهلهم عشان يروحوا الكلية اللي التنسيق رشحهم ليها.

وزارة التعليم العالي عامله نظام اسمه «تقليل الاغتراب»، عشان تسهل على الطلاب الملتحقين بالجامعات وتخلي دراستهم في المحيط اللي عايشين فيه، في حالة انطبقت عليهم الشروط.

للطالب الحق في التحويل من الكلية اللي قبل فيها بناء على مجموعة والرغبات اللي كتبها لكلية تانية قريبة منه.

أشكال التحويل

حددت الوزارة شكلين للتحويل لكلية قريبة من مكان سكنك وفي نطاقك الجغرافي (أ)

الشكل الأول

هو إنك تحول لكلية مختلفة عن الكلية اللي جاتلك في مكان بعيد، يعني جالك مثلا هندسة أسيوط وانت من الغربية، ممكن تحول لكلية في طنطا وتكون قريبة منك بس متكونش هندسة.

الشكل التاني

للتحويل هو إنك تحول لكلية شبه الكلية اللي جاتلك في مكان بعيد، يعني لو جالك كلية هندسة أسيوط، وانت من الغربية وعاوز تدرس هندسة بس قريب من سكنك، فممكن تحول لكلية هندسة قريبة منك وبشروط.

طيب إيه هي الشروط؟

أولا: بالنسبة التحويل لكلية غير مناظرة

لو جالك كلية بعيد عنك وعاوز تحول لكلية تانية في النطاق الجغرافي بتاعك بس تخصص تاني، لازم شوية شروط:

لازم تبقى جايب الحد الأدنى لمجموع درجات القبول في الكلية اللي انت عاوز تحول ليها سواء انتظام أو انتساب.

كمان يشترط إنك تكون مستوفي باقي قواعد القبول في الكلية اللي هتحول ليها، زي اختبارات القدرات مثلا.

مثال «طالب قبِل بكلية الهندسة جامعة أسيوط وهو من محافظة الغربية يمكنه التقدم للتحويل إلى كلية غير كلية الهندسة مثل كليات (العلوم {رياضة} - الآداب – التجارة ... الخ) في جامعة طنطا حيث تقع جامعة طنطا في النطاق الجغرافي (أ)، وبشرط أن يكون مجموعه مستوفى للحد الأدنى للكلية المراد التحويل إليها».

ثانيا: التحويل إلى كلية مناظرة

طيب لو انت من الغربية وجايلك هندسة في أسيوط، وعاوز تحول لمكان قريب منك بس برضه تدرس الهندسة، تعمل إيه؟

ينفع تحول لكلية هندسة طنطا بس بحسب ترتيبك ودورك في قايمة الطلاب اللي عاوزين يحولوا زيك، ولو فيه أكتر من كلية في النطاق الجغرافي بتاعك بتحول للكلية اللي بتقبل من الحد الأدنى الأقل، يعني لو انت من القاهرة الكبرى فيه 5 كليات هندسة (هندسة القاهرة وحلوان والمطرية وعين شمس وشبرا)، فممكن تحول للي بتقبل الحد الأنى الأقل من بين الكليات دي.

الوزارة قالت إنه يسمح للطالب الذي رشح لكلية خارج النطاق الجغرافي (أ)،  بإبداء رغبته في التحويل لأحد الكليات المناظرة داخل النطاق الجغرافي (أ) فقط، بغض النظر عن الحد الأدنى لمجموع الدرجات التي قبلته الكلية المراد التحويل اليها.

مثال «طالب قبِل بكلية الهندسة جامعة أسيوط وهو من محافظة الغربية يمكنه التحويل لكلية الهندسة جامعة طنطا حيث تقع فى نطاق الجغرافي (أ) وذلك طبقا لترتيب الطالب بين الطلاب الراغبين فى التحويل».

وفي حالة وجود أكثر من كلية مناظرة في النطاق الجغرافي (أ) يسمح للطالب الذي رشح لكلية ما خارج النطاق الجغرافى (أ) بالتحويل للكلية المناظرة ذات الحد الأدنى الأقل فى منطقته الجغرافيه (أ).

مثال «القاهرة الكبرى بها خمس كليات للهندسة ( القاهرة – عين شمس – حلوان – المطرية - شبرا ) والحد الأدنى للقبول بها مثلا هو ( 392 ، 391 ، 390 ، 388 ،387 ) يسمح فقط بالتحويل المناظر للكلية الأقل للحد الأدنى وذلك طبقا لترتيب الطالب بين الطلاب الراغبين في التحويل».

نظام القبول بالكليات التي تطبق نظامي (الانتظام والانتساب)

بالنسبة للتحويل المناظر لتقليل الاغتراب في الكليات اللي بتطبق نظامي القبول (الانتظام – الانتساب الموجه)، وجاتلك كلية (انتظام) بعيدا عن نطاقك الجغرافي، وعاوز تحول لكلية بنفس التخصص بس قريبة منك، فبيكون التحويل وفق الحد الأدنى للقبول في كل نظام من النظامين، وفيه حالتين:

الأولى: لو جايب مجموع درجات أكتر من الحد الأدنى لمجموع درجات الانتساب الموجه اللي بتقبله الكلية اللي عاوز تحول ليها، فيتم قبولك بعد الموافقة وتكون انتظام مش انتساب.

الثانية: طيب لو كنت جايب مجموع يساوي أو أقل من الحد الأدنى لمجموع درجات (الانتساب الموجه) اللي بتقبله الكلية اللي انت عاوز تحول ليها، فيتم إدراجك بعد الموافقة في نظام الانتساب الموجه.

ملحوظة هامة

تعتبر كليات التخطيط العمراني بالقاهرة وكلية اللغات والترجمة جامعة أسوان والكلية التكنولوجيا والتنمية شعبة علوم مالية / شعبة علوم زراعية من الكليات الفريدة وليس لها مناظر، والتحويل منها أو إليها يخضع لنظام التحويل لكليات غير مناظرة.

اعتبار كليات الهندسة الإلكترونية بمنوف جامعة المنوفية وهندسة البترول والتعدين بالسويس جامعة السويس وهندسة الطاقة بأسوان جامعة أسوان مناظرة لباقي كليات الهندسة للجامعات المصرية الأخرى، فقط للطلاب المستجدين والمرشحين للفرقة الإعدادية ويتم القبول بها خارج التوزيع الجغرافي والإقليمي ويتم التحويل منها أو العكس طبقا لقواعد التحويل المناظر.