ازاي تعرف مرتبك بيروح فين آخر الشهر؟
كتير مننا بيجي يوم 10 الشهر ويدور على مرتبة يلاقيه خلص، طيب خلص في إيه وصرفته على ايه؟. امممم مش فاكر.
"شبابيك" هتقدملك شوية نصايح صغيرة، هتوفر عليك السؤال اللي بنسأله دايماً بعد القبض بكام يوم "هي الفلوس راحت فين ؟" .
فواتيرك
تعالى كل أول شهر بعد ما تقبض على طول، وطلع فواتيرك الثابتة كل أول شهر وحطها فى مظاريف، زي الكهربا والماية والتليفون، ويا سلام لو حسبت تكاليف مواصلاتك الشهرية وانت رايح الشغل وحطيتها في ظرف هي كمان.
دوّن
تعالى كل أخر يوم وأقعد مع نفسك شوية وجمع كل اللي صرفته من أول اليوم، زي الأكل وخروجات صحابك ومصاريف القهوة لو بتقعد عليها، وأي حاجة تخرج من جيبك سجلها، موضوع متعب ورخم شوية بس مش هياخد منك وقت .
جمع
بعد أول أسبوع وتكون خلاص دفعت فواتيرك، هات الورقة اللي مسجل فيها مصاريفك وممكن تسجلها على موبايلك بدل الكتابة والورق والشغل ده، واحسب مصاريفك كاملة بفواتيرها واحسب متوسط ليها، واعرف فلوسك بتروح فين ! ولو لقيت نفسك صرفت حاجات في غير مكانه حاول تلغيها الأسبوع اللي بعده.
نوّع
حدد دايماً جزء من فلوسك لحاجات ومناسبات تاني غير الأاكل والشرب وخروجاتك، زي هدية لحد أو صدقة وجزء للزمن اللي انت مش عارف هيكون معاك وقتها مرتب ولا لأ، بحيث تبقى كل الحاجات والمصاريف الزيادة معروفة، زي العلاج واللبس وكل ده.
من الأخر هتسجل كل اللي بتصرفه وتشتغل موظف حسابات لنفسك، وهتعرف فلوسك راحت فين وتبدء تدير أو تعيد استثمار مرتبك وتميز بين الفلوس اللي بتصرفها وانت محتاجها وتخفف اللي مش محتاجها .
