«بتحب السيما؟».. تعرف على قائمة أفلام عيد الأضحى
عيد الأضحى خلاص كام يوم كل سنة وانتو طيبين :) ، وعشان العيد بيحلى بخروجة السينما، بنرصد ليكوا في التقرير ده الأفلام اللي هتنزل في دور العرض خلال العيد، واللي بيغلب عليها الطابع الكوميدي، اللي هيكون مناسب مع جو العيد :) .
لف ودوران
فيلم لف ودوران بينتمي لنوع من الأفلام اسمه أفلام الكوميديا السوداء وبيلعب فيه حلمي دور مرشد سياحي. كان اسم الفيلم في البداية ألماظ حر وبعدين اتغير اسمه للف ودوران. والفيلم من بطولة أحمد حلمي ودنيا سمير غانم وصابرين وجميلة عوض ومن إخراج خالد مرعي. وهينزل الفيلم في سينما سيتي ستارز.
حملة فريزر
الفيلم بيدور حولين تغير مفاجئ للمناخ في مصر، اللي بيتقلب لمناخ ساقع جدًا والناس مش عارفين إزاي يعيشوا في الجو ده وكان لازم يكون فيه حل عشان الناس متتجمدش فبيقرر مجموعة من ضباط المخابرات انهم يسافروا ايطاليا ويجيبوا جهاز قادر إنه يوقف الساقعة ديه.
والجهاز ده عشان يعرفوا يجيبوه كان لازم إنهم ينتحلوا شخصيات فريق عمل سينمائي أكنهم مسافرين عشان يصوروا فيلم.
الفيلم قصة هشام ماجد وشيكو ومن بطولتهم برضو، ومن إخراج سامح عبد العزيز.. تابع صفحة شيكو وهشام وفهمي من هنا عشان تعرف الفيلم هينزل في سينما إيه.
صابر جوجل
«صابر» بيعرف إزاي يتعامل بشكل بارع مع عالم التكنولوجيا والاتصالات عشان كده أطلقوا عليه لقب «صابر جوجل».. بس التعامل ده بيخليه يتعرف على عالم من الصفقات المشبوهة وغير الشرعية مع رجال اﻷعمال.
الفيلم من بطولة محمد رجب وراندا البحيري ولطفي لبيب ومن اخراج محمد حمدي.. تابع صفحة الفيلم من هنا عشان تعرف الفيلم هينزل في سينما إيه.
جواب اعتقال
«خالد الدجوي» بيعتقد إن انضمامه لجماعة إرهابية بتقوم بأعمال القتل هو جهاد في سبيل الله، ولما بيحاول أخوه أحمد إنه ينضم ليها بيمنعه بس هو بيصر على قراره وبينضم ليها وبيتقتل على إيد واحد منها وبيقرر «الدجوي» الإنتقام.
الفيلم من بطولة محمد رمضان، دينا الشربيني، إياد نصار، سيد رجب ومن إخراج محمد سامي.
البس عشان خارجين
«إيمي» حبت «الرداد» في الفيلم، و«الرداد» حب «إيمي»، لكن قابلتهم في الحياة مشاكل وصعوبات كتير تناولوها في الفيلم في إطار كوميدي اجتماعي.
الفيلم من بطولة حسن الرداد وإيمي سمير غانم ومن إخراج خالد الحفاوي.. تابع صفحة الفيلم من هنا عشان تعرف الفيلم هينزل في سينما إيه.
تحت الترابيزة
حادث قطر بتحول المحامي عاصم سنجاري لشخص تاني اسمه حنكو بيترافع في قضايا مجموعة من الوزراء المتهمين في قضايا فساد. والفيلم بيدور في إطار كوميدي ومن بطولة محمد سعد ونرمين الفقي وحسن حسني ومنة فضالي أما الإخراج لسميح النقاش.
كلب بلدي
«روكي» ابن «فريسكا» و«فريسكا» دي كلبة كانت بترضعه من وهو صغير وده خلى «روكي» عنده قوى خارقة كمان علمته طرق سرقة الكلاب وبقى يسرق الكلاب البلدي ويبعها.
والفيلم من بطولة أحمد فهمي وندا موسى وأحمد فتحي وبيومي فؤاد، ومن إخراج معتز التوني.
الفيلم هينزل في سينما سيتي ستارز وعشان تعرف باقي السينمات تابع صفحة شيكو وهشام وفهمي من هنا عشان تعرف الفيلم هينزل في سينمات إيه كمان.
