جزء من مسرحية 1980 وانت طالع
بتحب المسرح.. طيب لازم تعرف منه النوع «الفقير»
كل ما الواحد يتعمق في الفن المسرحي بيلاقي معلومات بيحب إن كل عشاق المسرح يتعرفوا عليها سواء كانوا من أهل المسرح أو من المتابعين لعروضه.
وعشان كده تعالوا نتعرف على «المسرح الفقير» اللي نادى بيه المخرج المسرحي البولندي جيرزي جروتوفسكي.
جيرزي جروتوفسكي
جروتوفسكي هو مخرج ومدرب مسرحي بولندي رفض فكرة التركيز على عناصر العرض المسرحي اللي الواحد بيشوفها في أي عرض زي: الملابس والديكور والماكياج، ونادى بفكرة «المسرح الفقير» اللي بيتم التركيز فيه على العلاقة بين الممثل والمتفرج دون التركيز على أي عناصر أخرى.
سبب التسمية
سمى جروتوفسكي مسرحه بـ«الفقير» لأنه دايمًا كان بيشوف إن المسرح بيتصرف عليه تكلفة أقل بعكس السينما والتليفزيون اللي تكلفة إنتاج أعمالهم عالية جدًا، فشاف إن المسرح لازم يتسمى مبدئيا كده بالمسرح فقير.
وكل اللي كان عايزه هو قاعة عرض فيها كراسي يقعد عليها المتفرجين اللي بيكون عددهم في مسرحه ما بين 12 لي 25 متفرج ومش بيزيدوا عن العدد ده.
والكراسي بيكون بينها وبين بعض براح عشان أداء الممثلين وعلاقتهم مع المتفرجين اللي زي ما قولنا في البداية إنهم محل تركيز جروتوفسكي في العلاقة بين الممثل والمتفرج، وكل العناصر التانية كان بيشوفها عناصر ثانوية متخودش محل الاهتمام والتركيز.
التعبير عن الروح
وتركيز جروتوفسكي على العلاقة بين الممثل والمتفرج ده جاي من إنه بيشوف إن المسرح بيعبر عن الروح، والروح دي هيتم التعبير عنها عند التركيز على العلاقة بين الممثل والمتفرج، ووجود لقاء حي بينهم بيجمع بين روحهم.
لا مكان للمشكلات الإجتماعية
ومسرح جروتوفسكي مش مكان لعرض المشكلات والعلاقات الاجتماعية لكن هو مكان لكشف الذات الإنسانية، الذات اللي ركز على طرح كل اللي بيدور جواها من خلال مسرحه.
التدريب مع الممثل
جروتوفسكي كان بيدرب الممثل على إنه إزاي يتخلص من العواقب اللي بتعيق روحه عشان يقدر يعبر عن أرواح الأخرين.
الممثل المقدس
الممثل عند جروتوفسكي مش ممثل عادي لكن هو ممثل مقدس بيقوم بفعل تضحية، بمعنى إنه بيضحي بذاته وبيكشف روحه عشان يقدر يعبر عن اللي بيدور في روح المتفرج ويخلصه من العقبات اللي بتقف عائق قصاد إنه يعبر عن اللي بيدور جوا ذاته.
وعشان عملية التضحية دي تحصل على أكمل وجه هنلاقي إن الممثل كان بيمثل قصاد المتفرج بالظبط لدرجة إن المتفرج بيسمع نفس الممثل وبيحس بكل تعبيراته. والممثل عند جروتوفسكي بيسميه الممثل المشع بمعنى إنه عبارة عن طاقة روحية بتعبر عن أرواح المتفرجين.
