«إيمي وحسن الرداد».. قصة تشهد عليها هذه الأعمال
خلال الأيام اللي فاتت اتنشر على كتير من المواقع أخبار عن خطوبة الفنان حسن الرداد والفنانة إيمي سمير غانم، وهو خبر متمش الإعلان عنه بشكل رسمي إلا أن مصادر كتير بتقول إن «الرداد وإيمي» بيجهزوا لحفل الزفاف.
الكلام عن علاقة «الرداد وإيمي» طلع من سنة تقريبا بعد سلسلة من الأعمال الفنية اللي جمعت الاتنين وعلاقة الصداقة القوية ما بينهم. وفي التقرير ده بنرصد ليكو الأعمال شارك فيها «الرداد وإيمي» واللي نقدر نقول من خلالها علاقتهم وحبهم كان بيكبر.
زنقة الستات
«إيمي» شاركت «الرداد» في فيلم «زنقة الستات» اللي اتعرض في إبريل 2015، اللي بتساعد في أحداثه «إيمي» الفنان حسن الرداد، وبتديه معلومات عن 3 بنات عشان يقدر يخلص مريض نفسي من أزمته اللي بتتلخص في إن البنات دول خدعوه.
الفيلم من بطولة أيتن عامر، بيومي فؤاد، مي سليم، نسرين أمين. وتأليف كريم فهمي وهشام ماجد، أما الإخراج لخالد الحلفاوي.
حق ميت
في 2015، برضو شارك «الرداد وإيمي» في بطولة مسلسل «حق ميت»، اللي بيقوم فيه «الرداد» بدور محامي شاب بيتقبض عليه بتهمة خطف وقتل 4 سيدات وفي وسط تحقيقات الشرطة والبحث إذا كان هو الجاني ولا لأ بيفتكر قصة حبه مع «إيمي» اللي انتهت نهاية حزينة.
المسلسل من بطولة دلال عبد العزيز، صبا مبرك، أحمد عبد العزيز أما التأليف لباهر دويدار، والإخراج لفاضل الجارحي.
ليلة الفرح
أما «ليلة الفرح» فده مش اسم عمل جمعهم لكن ده توصيف لمشهد جمع «إيمي والرداد» في الأوبريت الغنائي «مصر قريبة» اللي اتعمل لتنشيط السياحة واتعرض في فبراير 2015. وفي المشهد ده كان «الرداد» لابس البدلة السودا، أما «إيمي» فكانت بالفستان الأبيض.
ونقدر نقول إن اللقطة دي برغم إنها كانت تمثيل لكن هنشوفها بتتجسد بحق وحقيقي في ليلة فرح ايمي والرداد.
فرقة سيكا
في رمضان اللي فات شارك «الرداد وإيمي» بطولة المسلسل الإذاعي «فرقة سيكا»، اللي بتدور فكرته حولين «ما ضاع حق وراءه مطالب». والمسلسل كان بيدور في إطار كوميدي تشويقي، ومن بطولة أحمد راتب، ميمي جمال، عزت أبو عوف، سناء شافع.. ومن تأليف أحمد درويش، أما الإخراج لحسين ابراهيم.
عشان خارجين
فيلم «عشان خارجين» اللي اتعرض في سبتمبر 2016، هو آخر الأعمال اللي شاركت فيها «إيمي» مع «الرداد».
خلال الفيلم بتنشأ قصة حب بين «إيمي والرداد»، لكن بتقابلهم مشاكل وصعوبات كتير تناولها الفيلم في إطار كوميدي اجتماعي.
الفيلم من بطولة نسرين أمين، مراد مكرم، حسن الرداد وإيمي سمير غانم ومن تأليف هشام ماجد وشيكو أما الإخراج لخالد الحلفاوي.
ضيف شرف «مٌز»
في رمضان اللي فات قامت «ظهر «الرداد» كضيف شرف في مسلسل «نيلي وشريهان» اللي كانت بتقوم فيه «إيمي» بدور البطولة مع اختها دنيا سمير غانم.
ومن كل الأعمال اللي فاتت هنلاقي إن الأعمال الفنية اللي شارك فيها خلال الفترة القصيرة اللي فاتت - آخر سنتين - وده اللي ساهم في تعزيز صداقتهم الي اتحولت فيما بعد لقصة حب.
نسيبكو بقى مع رأي «إيمي» في الفنان حسن الرداد قبل خبر خطوبتهم:
