على كيفك.. تعرّف على أبرز حفلات شهر نوفمبر
«شبابيك» عودكم إنه بيرصد ليكو الحفلات المختلفة اللي هتحصل خلال كل الشهر، وده عشان تقدر تختار براحتك الحفلة اللي تحب تحضرها. وشهر نوفمبر مليان بالحفلات المتميزة اللي حبينا نرصد ليك أبرزها في التقرير ده.
مسار إجباري
فرقة «مسار إجباري» هتعمل حفلة يوم الخميس 3 نوفمبر في «كايرو جاز كلوب» الساعة 10:30 بالليل. وعنوان المكان هو: 197 شارع 26 يوليو، العجوزة.
الست ثومة
وفي نفس يوم 3 نوفمبر الست «أم كلثوم» هتعمل حفلة على مسرح الحكمة في ساقية الصاوي الساعة 6 بالليل وده هيكون في إطار مسرح الساقية للعرائس. وسعر التذكرة هيكون 15 جنيه، وهتغني «الست» أغنيتي «ليلة حب»، و«أمل حياتي».
علي الهلباوي
أما يوم الجمعة 4 نوفمبر، فالمنشد علي الهلباوي هيعمل حفلة على مسرح النهر في ساقية الصاوي الساعة 7:30 بالليل، وسعر التذكرة هيكون 40 جنيه.
فرقة فلكلور
وفي يوم الجمعة برضه 4 نوفمبر الساعة 7:30، «فرقة فلكلور» هتقدم في مركز «الربع» الثقافي مجموعة من الأغاني الفلكلورية من ربوع مصرالمختلفة مع عزف على الربابة.
وكمان هيكون فيه عرض للتنورة، ولفرقة المزمار، والطبل البلدي، وتصوير بملابس فلكلورية زي الملايات اللف والطربوش والعباية، وسعر التذكرة هيكون 25 جنيه. وعشان تعرف عنوان «الربع» بالظبط ادخل على الإيفينت من هنا.
أنغام
المطربة «أنغام» هتحيي حفلة بدار الأوبرا المصرية برضه يوم الجمعة 4 نوفمبر الساعة 9 بالليل، وده في إطار الإحتفال بمهرجان الموسيقى العربية الـ25.
وشباك تذاكر حفلات المهرجان مفتتوح من الساعة 10 الصبح بدار الأوبرا. وللعلم الشباك مفتوح من يوم التلات الموافق 25 أكتوبر فإلحق احجز بسرعة.
وصلة سماع
فرقة «وصلة سماع» للإنشاد الديني هتحتفل بالسنة التانية ليها في مجال الإنشاد الديني على مسرح النهر في ساقية الصاوي يوم الإتنين 7 نوفمبر الساعة 7 بالليل وعشان تعرف سعر التذكر وتفاصيل أكتر عن الإيفينت ادخل هنا.
مروان خوري
ويوم الإتنين برضه 7 نوفمبر المطرب مروان خوري هيحيي حفلة في دار الأوبرا المصرية بمناسبة اليوبيل الفضي لمهرجان الموسيقى العربية. وعشان تعرف تفاصيل أكتر اتصل على الأرقام اللي جوا الإيفينت من هنا.
مروة ناجي
يوم الأربعاء 9 نوفمبر المطربة مروة ناجي هتقدم حفلة في مهرجان الموسيقي العربية الـ25 على المسرح الكبير بدار الاوبرا المصرية.
و«مروة» سبق وشاركت في برنامج The voice وغنت أغنية «برضاك» اللي أعجب بيها لجنة التحكيم والمشاهدين بشكل كبير. سعر التذكرة هيتم الإعلان عنه قريب من خلال متابعتك للإيفينت من هنا.
مي فاروق
هتحيي المطربة مي فاروق يوم الأحد 13 نوفمبر الساعة 8:30 حفلة ختام مهرجان الموسيقي العربية الـ25 على مسرح دار الأوبرا المصرية. وعشان تعرف التذاكر هتنزل امتى تابع الإيفينت من هنا.
عمر خيرت
ويوم الجمعة 18 نوفمبر أوركسترا الموسيقار عمر خيرت هتكون موجودة على مسرح سيد درويش بالاسكندرية الساعة 8 بالليل. وسعر التذكرة هيكون 150، 200، 250 جنيه.
هيثم نبيل
هيحيي المطرب هيثم نبيل حفلة على مسرح النهر بساقية الصاوي يوم السبت 19 نوفمبر الساعة 7 بالليل وسعر التذكرة هيكون 40 جنيه.
نصير شمة
أما عازف العود نصير شمة هيعمل حفلة يوم الأحد 20 نوفمبر الساعة 8 بالليل على مسرح النهر في ساقية الصاوي وسعر التذكرة هيبدأ من 65 جنيه.
عزيز مرقة
لأول مرة الموسيقار والمغني التونسي عزيز مرقة هيعمل حفلة يوم الجمعة 25 نوفمبر الساعة 7 بالليل على مسرح الحكمة بساقية الصاوي. وسعر التذكرة بيبدأ من 100 جنيه. وسبق وفاز «مرقة» بجائزة أفضل مؤلف موسيقي أوركسترالي على مستوى المملكة الأردنية.
يحيى خليل
أما الموسيقار يحيى خليل فهيعمل حفلة يوم الجمعة برضه الساعة 8 بالليل على المسرح الصغير بدار الأوبرا المصرية وسعر التذكرة هيكون 50 جنيه.
علي الحجار
المطرب علي الحجار هيعمل حفلة على مسرح النهر في ساقية الصاوي يوم الأربع 30 نوفمبر الساعة 9 بالليل وسعر التذكرة يبدأ من 60 جنيه.
