اعرف إزاي تقدم للجيش في 4 خطوات

«التجنيد»، خدمة إلزامية تفرضها القوات المسلحة على الشباب بمجرد بلوغه الـ 18 سنة، وللطلاب بعد انتهاء الدراسة، ويخدم المجندون في معسكرات الجيش لمدة تتراوح ما بين عام واحد إلى ثلاثة أعوام، بحسب المؤهل الدراسي، وذلك طبقَا للمادة 38 من قانون الخدمة العسكرية رقم 127 لسنة 1980.

وقبل ما تكون عنصر أساسي في القوات المسلحة، فيه خطوات لازم تعملها قبل ما تدخل، الخطوات دي تعتبر واحدة لجميع المؤهلات «العليا - المتوسطة - العادية».. في هذا التقرير «شبابيك» هيعرفك إزاي تقدم في الجيش وتبقى فرد مقاتل بالقوات المسلحة.

 تجهيز الأوراق قبل الذهاب لمكتب التجنيد 

• شهادة ميلاد كمبيوتر.
• صورة من البطاقة الشخصية «بشرط أن تكون البطاقة سارية».
• بيان بفصيلة الدم.. بشرط أن يكون مختوم بختم المستشفى.
• صحيفة الحالة الجنائية (الفيش) ويستخرج من قسم الشرطه التابع له الفرد.
• شهادة التخرج.
• ثلاث صور شخصية.
• استمارة 6 جند.

الذهاب لمكتب التجنيد في محافظتك لتقديم الأوراق

مكتب التنسيق في الغالب بيكون في مركز الشرطة التابع للمنطقة اللي انت فيها، بتروح تقدم المستندات والأوراق ليهم، وده بيكون حسب توقيت الدفعة بتاعك، واللي قسمتهم القوات المسلحة لـ  4 دفعات (يناير – إبريل – يوليو – أكتوبر).

بعد ما تسلم ورقك هيطلب منك الحضور في يوم معين لمكتب التجنيد لاستلام أوراق الفيش الرباعى، بعد كده هتاخذها وتروح بيها لمنطقة التجنيد مره تانية وتقدمها هناك، بالإضافة إلى استمارة (20 جند)، وبعد تسليم الأوراق هيعرفوك بميعاد الحضور لإجراء الكشف الطبي.

الذهاب مكتب التجنيد الرئيسي

بعد ما تأخد اورقك من مكتب التجنيد اللي في محافظتك، ودا غاليا بيكون مكتوب عليه ميعاد حضورك لمكتب التجنيد الرئيسي، ولازم تراعى وانت رايح التجنيد، إنك تكون حالق «الذقن والشعر».

سيطلب منك شراء بطاقة حمراء ثمنها 10 جنيهات، وبعدها سياتي مسؤول من مركز التجنيد لشرح كيفية ترتيب الأوراق، وبعدها هتسلم الورق، وهيقوم صف ضابط بتجميع الشباب إلى صالة تمهيدا لإجراء الكشف الطبي عليهم.

قبل الكشف الطبي بيتم تسليم كل فرد وثيقة تعارف هتملى بياناتك وتسلمها، بعدها هرتوح لمكان تغير هدومك وتلبس سترة لونها زيتي عشان تتصور، وتقف في الطابور تستنى دولك في الكشف، وبتكون وقتها مش لابس غير «الشورت» بس.

بعد ما تخلص الكشف.. بتستنى في صالة انتظار وبتكتب بياناتك على ضهر صورتين من صور المؤهل الدراسي وبتسلمهم، وبتروح قاعة تانية للتأكد من بياناتك.

بعد كده بترجع قاعة الانتظار عشان تستلم استمارة 110 وفيها اسم الفرد وصورته بالزي العسكري مع قرار ترشيحه «ضابط احتياطى أو كجندي احتياط وتاريخ الإرجاء».

يوم الإرجاء وبعدها سماع السلاح

يوم الإرجاء يقصد به «اليوم اللي هيتحدد مصيرك، إما بالإنضمام أو الإستبعاد من الخدمة»، وكمان هيتحدد نوع خدمتك كـ«مجند أو ضابط إحتياط»، وبيتم تجميع الشباب فى مناطق التجنيد يوم الإرجاء، داخل قاعات أو تحت مظلات مجهزه بشاشات عرض كبيرة بتعرض إجراءات الإرجاء من خلال لجنه برئاسة رئيس هيئة التنظيم والإدارة للقوات المسلحة.

«القوات المسلحة تتشرف بيكم يارجالة»، غالبا هو ده الرد اللي بيكون من قائد المركز، وبعدها هيحددلك موعد سماع سلاح كل فرد، والاستعداد للانتقال والتراحيل إلى مراكز التدريب الرئيسية لكل سلاح.