يعني إيه اتحاد طلاب؟ واللجان اللي بيتكون منها
نقدر نقول إن «اتحاد الطلاب» عامل زي الحكومة المصغرة اللي كل وزير فيها ماسك لجنة ورئيس الحكومة هو رئيس الاتحاد اللي مسئوليته يتابع تنفيذ شغل الحكومة لاحتياجات الطلبة.
ورئيس اتحاد الطلبة لوشاف أن الحكومة المسئولة عن الطلبة مقصرة معاهم بيعمل اجتماعات مع الحكومة ويشوف التقصير جاي منين.
ورئيس اتحاد الطلبة بمساعدة "الحكومة الجامعية" مسئولين انهم يأهلوا الطالب الجامعي للحياة العلمية والعملية وكمان ينظموا ليه الأنشطة الفنية والثقافية والترفيهية، يعني الاتحاد هو المكمل لدراسة الطالب اللي بيفرغ فيه طاقته الإبداعية وبيفتح فكره بحيث يقدر يذاكر ويجيب تقدير عالي في دراسته.
لجان اتحاد الطلاب
كل لجنة فيها وزير مسئول عنها واللجان ديه عددها 7 وهما ( اللجنة الثقافية - لجنة الأسر والرحلات - اللجنة الفنية – لجنة الجوالة والخدمة العامة – اللجنة الرياضية – اللجنة العلمية – اللجنة الإجتماعية).
لجنة الأسر
وديه مسئولة عن تشجيع الطلاب انهم يعملوا أسر يعني يقسموا نفسهم فرق واللجنة مسئولة انها بتشرف عليهم تطلعهم رحلات وتعملهم مسابقات ومعسكرات ثقافية واجتماعية وترفيهية وديه بتساعد الطالب على تعريفه بمعالم مصر وده بيخلي الطالب يغير جو بعيداً عن مود المذاكرة بحيث لما يرجع يذاكر يكون عنده حماس ونشاط.
لجنة النشاط الرياضي
بتشجع على تكوين الفرق الرياضية وتشجيع المواهب الرياضية وبتهيء ليهم الفرص انهم يمارسوا الأنشطة المختلفة وده عن طريق توفير المنشآت والأدوات الرياضية والإشراف على المسابقات الرياضية وكمان بترشح المدربين المعتمدين في الاتحادات الرياضية بعد موافقة مجلس اتحاد طلاب الجامعة.
لجنة النشاط الثقافي والإعلامي
مسئولة عن تثقيف الطالب بكل شيء يخص مجتمعه وازاي يطوره ويكون عضو فعال فيه و ازاي يكون مبتكر في أفكاره وعنده حس ابداعي، كمان اللجنة مسئولة عن نشر المجلات والنشرات وتنظيم الندوات والمؤتمرات والمناظرات الثقافية وورش العمل.
لجنة الجوالة والخدمة العامة
فبتعمل برامج بتخدم البيئة وبتخلي الطلاب والجمعيات المختلفة اللي مسئولين عن خدمة البيئة بردوا انهم يشتركوا مع بعض في تنفيذ البرامج ديه.
لجنة النشاط الفني
مسئولة عن أنشطة التمثيل والكورال والموسيقى والشعر والتصوير والفنون التشكيلية وده طبعاً بيخليها تكتشف مواهب الطلاب وتدعمهم وتعمل مسابقات فنية مختلفة يشاركوا فيها.
لجنة النشاط الاجتماعي والرحلات
مسئولة عن إقامة حفلات في المناسبات القومية والدينية وده عشان تعرف الطلاب بأعضاء هيئة التدريس ومعاونيهم والعاملين بالكلية أو المعهد وكمان بتوفر الدعم الإجتماعي لغير القادرين.
لجنة النشاط العلمي والتكنولوجي
فهدفها انها تنظم أنشطة تستهدف رفع المهارات عند الطلاب وده من خلال عقد الندوات والمحاضرات العلمية ونشر ثقافة التكنولوجيا والبرمجيات واستخداماتها وإنتاجها وده طبعاً بيرفع حس الإبتكار عند الطالب الجامعي وكمان اللجنة بتشجع وبدعم البحث العلمي لدي الطلاب و بتوفر فرص التبادل والتدريب العلمي الطلابي خارج وداخل الوطن.
