قدم عضو هيئة التدريس بجامعة كفر الشيخ، الدكتور محمد كمال عدد من النصائح لزملائه، مطالبهم بضرورة استيعاب عملهم في مهنة تتطلب الأخلاق.

وكتب عضو هيئة التدريس عبر جروب «أساتذة الجامعات المصرية فقط من المعيد إلى الأستاذ»، الخاص بهم على موقع التواصل الاجتماعي «فيس بوك»، 10 نصائح لزملائهم.

جاءت النصائح كالتالي:

  1. لازم تعامل الكل باحترام لأنه زميل سواء كان معيد أو أستاذ.

  2. لو كنت معيد فأنت الأصغر سنا والأقل علما فلازم تعامل زملائك المعيدين باعتباركم شركاء رحلة حياة وعمر هتقعدوا سوا.. ولو حد أكبر لازم تعامله بالاحترام الواجب لأنه الأكبر سنا والأكثر علما.

  3. مهما كان استاذك ضعيف علميا فهو بردو اقوي منك فارجوك بلاش نغمة التعالي وانك بتفهم اكتر من الاستاذ. وحاول تتعلم منه كل حاجة العلم والتدريس والأخلاق... مش من مشرفك بس لا من كل اساتذتك كل استاذ عنده حاجة مميز فيها جدا اتعلمها منه.

  4. لو انت استاذ فأنت مش محتاج تثبت انك الأقوى، بالعكس والله قوتك في تواضعك مع زملائك وتعاطفك مع من هم أصغر منك.

  5.  إياك تبخل بعلم ومعرفة علي زميلك بالعكس ساعده وعرفه اللي عندك هتلاقي اللي يعرف اللي انت مش عارفه واكيد هيفيدك.

  6. لو انت مشرف عامل الباحث علي انه باحث مش استاذ ولو معيد عامله بردو علي انه باحث وعلي انه زميلك في المستقبل يعني ساعده وعلمه وعامله كابن لك رحم الله مشرفي دمهران كان نموذج يحتذى به.

  7. المعاملة أمام الآخرين لا نقاش انها لابد تكون في قمة الاحترام بين الجميع... المعيد يتقال له يا دكتور وربنا ما هيبقي دكتور عشان قلنا له أدام الناس يا دكتور بس هتفرق في احساسه بنفسه وتقدير الناس ليكم انتم الاتنين.. والمدرس أو أكبر يبقي معالي الدكتور أو استاذنا أو معالي الدكتور.. عيب اوي تحترم الموظفين في الكلية وتقف ادامهم وتيجي علي زميلك تقلل منه.

  8. لو زميل جالك من قسم تاني أو كلية تانية لازم لازم لازم تقابله بكل احترام وتقدير وتقدم له كا مساعدة ممكنة ولو الموضوع محتاج تخليص ورق ابعت العامل يخلصه أو روح بنفسك خلص له الورق.... صدقني والله هيفتكرها طول عمره أن فيه دكتور محترم في المكان الفلاني عمل معاه كذا.

  9. في توزيع المواد عيب اوي نتخانق وصوتنا يعلا... نطبق قرار المجلس الأعلى للجامعات في توزيع المواد.. وبلاش طمع ممكن المادة اللي تأخذها وهي مش حقك صاحبها يدعي عليك دعوة اخسرك القديم والجديد افتكر ربنا دايما.

  10. مع الطلاب موال تاني بس باختصار دول ولادك لا تظلم احد ابدا وحافظ على هيبتك وهيبة مهنتك وإياك تذم زميلك أمام الطلبة هيحتقركم كلكم وأولهم انت. والنتيجة والدرجات ده حكم ربنا هيحاسبك عليه يوم ما تدخل القبر بقماشة ومش هينفعك ابن ولا وزير ولا غفير.



0
0
0
0
0
0
0