أسرع وسائل تحويل الأموال داخل مصر
بنيجي من وجه بحري والصعيد القاهرة عشان نتعلم أو نشتغل، وطبعا بنكون عايشين على الدعم المادي من أهلنا، لكن أوقات كتير بنواجه مشكلة في تحويل الأموال، لكن خلاص المشكلة ديه اتحلت مع وجود 3 طرق سريعة وغير مكلفة..
البريد
هيئة البريد المصرية يحول عن طريقها المواطنون أموالهم لتصل لأي مكان داخل جمهورية مصر العربية، خاصة أنها تمتلك مكاتب في كل المحافظات وفروع تغطي الأحياء السكنية داخل كل محافظة وقرية، لكن هناك شروط لاستخدام خدامتها وهي:
- لازم الشخص اللي هيحول فلوس يكون معاه بطاقة شخصية عشان يعرف يعمل حوالة بريدية.. وفي نفس الوقت أنت مش هتعرف تستلم الفلوس ديه غير ببطاقتك الشخصية.
- الشخص اللي هيبعت الحوالة لازم يكون عارف عنوان البريد اللي هيبعتلك عليه بالظبط، وياخد باله عشان الحي السكني الواحد ممكن يكون فيه أكتر من مكتب بريد، عشان كده لازم تعرفه عنوان المكتب الأقرب لسكنك.
- أول ما الشخص ده هيروح مكتب البريد هيطلب إرسال حوالة مالية، هيكتب شوية بيانات منها عنوان بريد المرسل إليه ورقم البطاقة والتليفون.
- لم تيجي تستلم الفلوس لازم تعرف تاريخ تحويلها بالظبط.. وهتقول لمسؤلي الحوالات في حواله جايلي من "البلد + اسم الشخص".. هيطلب منك يشوف البطاقة وطبعًا هيتأكد من الاسم اللي مكتوب في الحوالة مع صورتك الشخصية واسمك في البطاقة... وكده تستلم فلوسك.
- هيئة البريد بتاخد إجازة يومي الجمعة والسبت، وفي الأيام العادية بيبدأ الشغل فيها من الساعة 8 صباحا حتى 2 ظهرا.
البنوك
البنوك سواء المصرية أو الأجنبية بتسهلك طريقة التعاملات المادية:
- لو انت طالب من فئة أقل من 21 سنة لازم يفتحلك حساب التوفير، و لو بتشتغل وسنك كبير هتكون فئة الحساب الجاري، هتروح البنك معاك بطاقتك الشخصية وهتملي شوية بيانات، في بعض البنوك بتطلب منك وصل كهرباء أو إثبات محل السكن
- بعد ملء بياناتك هيتفتح حساب خاص ليك وتستلم الفيزا كارت ورقم الحساب والرقم السري بعد حوالي 10 أيام، الموضوع مش هيكلفك أكتر من 50 جنيها حسب كل بنك، بس لو من الفئة التانية ممكن تكلفك حوالي 200 جنيه.
- الشخص اللي هيحولك فلوس هيروح البنك ومعاه رقم الحساب ويحطلك الفلوس من غير أي طلبات ولا إثباتات.
فودافون كاش
شركة فودافون عملت خدمة لعملائها اسمها "فودافون كاش"، من أي مكان في مصر ممكن تبعت مبلغ مالي في أي فروع من فروعها لأي حد مشترك فى نفس الخاصية، بس في برضه شوية حاجات لازم تعرفوها عن الخدمة..
- خط فودافون بتاع الشخص اللي هيحولك الفلوس وخطك أنت شخصيًا لازم يكونوا متسجلين بأسمائكم.
- ممكن تتحولك الفلوس عن طريق التليفون مباشرة بشرط أن الشخص اللي يرسل الفلوس واللي هيستلم يكونوا مشتركين في الخدمة.
- ممكن تستخدم فودافون كاش من أي ATM زي الفيزا كارت بالظبط، وكمان ممكن تصرفها من راديو شاك أو فروع فودافون.
- قيمة الخدمه هتكون 2% من المبلغ اللي هيتم تحويله.
- قيمة الإشتراك نفسه 20 جنيها وعشان تشترك فى الخدمه هتروح لفرع فودافون ومعاك بطاقتك وتطلب من الموظف إنه يعملك بطاقة فودافون كاش، وبعد كده هتتصل بـ 6000 لاختيار الرقم السري وتشغيل الخدمة.
