لو جايلك عريس.. ازاي تستعدي لأول مقابلة؟
كتير من البنات لما بيتقدملها عريس لا تعرفو ولا يعرفها الأهل بيرتبوا مقابلة ليهم برة البيت يتكلموا مع بعض شوية ويعرفوا بعض أكتر.
لو أهلك في يوم ندوا عليكي وقالولك جايلك عريس وعندك شغف تتكلمي معاه وتعرفيه، واتفقتوا تتقابلوا في مكان برة البيت وانت مش عارفه تتعاملي إزاي اقرأي اللي جاي.
المكياج
لو انتي من البنات اللي بتحط مكياج لازم تحطي اللي يناسب بشرتك ويديها جمال طبيعي ومتحطيش مكياج أوفر يخلي بشرتك جمالها مصطنع وكمان اختاري طقم يديكي طلة جميلة.
استماع
لما تقابليه خليكي مستمعة ليه أكتر من إنك تتكلمي معاه عشان تقدري تتعرفي عليه أكتر وتكوني في دماغك أسئلة تسأليها ليه.
الأسئلة
أسئلتك ليه خليها تكون عامة ومتسألهوش أسئلة متعلقة بحياتكوا فيما بعد زي مثلاً الشقة فين؟ مرتبك كام؟ لأن الحاجات ديه سابقة جداً لأوانها وهتخليه مش مرتاح نفسياً للعلاقة.
الطبيعية
حاولي إنك متكونيش مقيدة في الكلام خليكي طبيعية يعني لو سألك انتي طموحك واصل لفين في شغلك؟ متقوليش كلمة وتسكتي، لأ اتكلمي عرفيه بنفسك.
وأخيراً..
اطلعي من المقابلة وانتي راسمة تصور عن شخصيته ولو حسيتي إن لسة التصور مكملش اطلبي اإنك تقابليه مرة تانية عشان تكوني الصورة الكاملة.
