خطوات هامة بعد امتحانات الثانوية العامة للتقديم للكليات والمعاهد

انتهت امتحانات الثانوية العامة، وبدأ الطلاب يتنفسون الصعداء بعد عام دراسي طويل وشاق، تتبعه خطوات أخرى من التحضير للتظلمات، التنسيق، اختيار الكلية المناسبة، التقديم وغيرها من الإجراءات الهامة التي تنتظرهم لغلق باب التعليم ما قبل الجامعي وبدء حياة دراسية جديدة.

خلصت الامتحانات

خلصت الامتحانات بس لسه مخلصش الهدف منها، وهو التقديم للجامعة واللي بيسبقه خطوات وإجراءات كتير، هعمل إيه بعد امتحانات الثانوية العامة؟ ازاي أقدم في الكلية اللي انا عايزها؟ إمتى موعد التقديم؟ ادخل كلية إيه؟ التنسيق بيتم ازاي؟ أسئلة كثيرة تدور في ذهن الطالب وبيبحث عن إجابات لها بمجرد خروجه من اللجنة في آخر يوم للامتحانات.

السطور الجاية هتعرف من خلالها إجابات كل الأسئلة المتعلقة بالخطوات الواجب عليك اتباعها عشان توصل للكلية أو المعهد بدون ضغط نفسي أو توتر.

نتيجة الثانوية العامة

قبل ظهور نتيجة الثانوية العامة يكون أمام الطالب فترة أسبوعين تقريبًا من بعد انتهاء الامتحانات، أول يومين اعتبرهم فترة راحة من ضغط تالتة ثانوي وتصفي ذهنك من كل اللي فات وتبدأ مرحلة جديدة تستعد فيها للقادم.

الكليات والتخصصات المتاحة للثانوية العامة

بعد انتهاء اليومين ابدأ في التعرف على الكليات والتخصصات المتاحة للثانوية العامة والموجودة في كل الجامعات بجميع المحافظات، نظام الدراسة في كل كلية، الأقسام، التخصصات، مستقبلك بعد التخرج هيكون عامل ازاي، نظام الدراسة في كل منها، وكذلك ازاي هتقضي فترة دراستك في كل جامعة من الجامعات سواء الحكومية، الأهلية أو الخاصة.

ترتيب الأولويات والبدائل

ترتيب الأولويات والبدائل من الخطوات الهامة التي يجب على الطالب الحاصل على شهادة الثانوية العامة اتباعها بعد انتهاء الامتحانات، وده من خلال وضع أكثر من بديل للكلية أو المعهد اللي عايز تدرس فيه لأن القبول متوقف على تنسيق تالتة ثانوي والحد الأدنى للقبول في كل جامعة وكلية من الكليات، بالإضافة إلى أن بعضها يتطلب شروط معينة للقبول.

امتحانات القدرات

إوعى يفوتك امتحانات القدرات.. ببساطة وزارة التعليم العالي والبحث العلمي بتعلن سنويًا عن الكليات التي لها اختبارات قدرات، وهي عبارة عن امتحانات بيخضع لها الطالب قبل ظهور التنسيق وهي لا تشمل كل الكليات ولكن بعضها فقط، ومن أمثلتها كلية التربية الرياضية، الفنون الجميلة، الفنون التطبيقية، وغيرهم، وبالتالي كن حريص على معرفة مواعيد الامتحانات لأن فوات ميعادها سيحرمك قطعًا من دخول الكلية اللي من شروطها دخول اختبارات القدرات.

التقديم للكليات العسكرية

حلم الكثير من الطلبة والطالبات أيضًا التقديم للكليات العسكرية والقبول فيها، لكن عشان تدخل الكلية لازم تخضع للاختبارات اللي بتعملها للطلبة، بس لو انت رياضي مش هتكون في حاجة للخطوة دي، ولكن لازم تجهز الأوراق المطلوبة منك للتقديم في أي من الكليات العسكرية أو حتى التابعة لوزارة التعليم العالي والبحث العلمي.