شهد عام 2015 سطوع نجم عدد من الممثلين والممثلات الشباب اللي قدروا يتركوا بصمة عند الجمهور قوية.. لأن تمثيلهم سواء في المسرح أو السينما أو التليفزيون وصل قلوب الناس.. وأدوارهم علمت معاهم لدرجة أنهم بينتظروا يشوفوا أعمالهم الجديدة بفارغ الصبر..

«شبابيك» بيرصد هنا أبرز النجوم الذين سطعت أسمائهم في 2015..

على ربيع

من أول ما ظهر في تياترو مصر قدر يبني ليه شعبية كبيرة عند الجمهور.. أولًا لأنه ليه طلة تخلي الواحد يتشد إنه يتفرج عليه.. ثانيا إنه بيعرف إزاي يضحكه ويخليه ينسى همومه.. كمان عنده القدرة إنه لما يقول إيفيه يعلم مع الجمهور على طول ويفضل فاكره وفاكر المشهد اللي قاله فيه.. مش بس كدة علي ربيع في فترة قصيرة قدر إنه يبقى حديث السوشيال ميديا لأن رواد مواقع التواصل الاجتماعي بقوا يستخدموا إيفيهاته على مواقف من حياتهم.

تياترو مصر اللي هو مسرح مصر حاليًا كان إنطلاقة علي ربيع في مجال السينما والتليفزيون.. وقدرنا نشوفه في أدوار مختلفة متميزة زي دوره في مسلسل لهفة.. ومسلسل أستاذ ورئيس قسم.. ومولانا العاشق.. وسيت كوم.. أنا وبابا وماما.. وفيلم كابتن مصر.. وغيرهم من الأعمال الكتيرة اللي قدر مع كل عمل فيهم يخلي الجمهور يضحك من قلبه.

محمد أسامة (أوس أوس)

أوس أوس.. أول ما بيدخل على خشبة مسرح مصر بيبهجنا لأنه بيدب في خشبة المسرح حياة وبيخلينا نحس بالفرحة.. مجرد ظهوره بيفرحنا ومسرح مصر كان الإنطلاقة برده ليه.. شوفناه بعد كده في أعمال كتيرة زي مسلسل حالة عشق ومسلسل أستاذ ورئيس قسم ومسلسل الكبير أوي.

بهجة "أوس أوس" بدأت مسيرتها من أول ما دخل مركز الإبداع الفني بدار الأوبرا المصرية.. وكمل المسيرة بعدها سنة 2010 في المسلسل الكوميدي خميس وجمعة.

أحمد داوود

أحمد داوود كان مفاجأة لكل الناس أول ما شفوه في دوره في مسلسل سجن النسا.. لأنه أبدع في تجسيد دور صابر زوج غالية.. وخلانا كلنا نكرهه وده من شدة صدقه في الدور اللي كان إنطلاقة حقيقية ليه..

"داوود" بدأ مشاوره وهو طالب بكلية هندسة.. وحصد جوائر تمثيل كتيرة على مستوى الجامعة.. كمان فاز بجائزة أحسن ممثل في مهرجان الشباب المبدع الرابع سنة ٢٠٠٦؟؟ ومسيرته الفنية في الوسط الفني بدأت في فيلم ولد وبنت وبعدين ابتدينا نشوفه في أعمال تانية زي مسلسل شربات لوز وفيلم أولاد رزق.

ياسمين صبري

أول ما ظهرت ياسمين في مسلسل طريقي شدتنا بجمالها الكلاسيكي وتمثيلها الرقيق الشقي.. اللي خلانا نحبها ونحب نتفرج عليها والدور ده كان إنطلاقة ليها في الوسط الفني اللي بتطمح إنها تصنع نجوميتها فيه واحدة واحدة.. صحيح ياسمين كانت بتحلم إنها تشتغل مذيعة بس القدر خلاها تبقى ممثلة وشوفناها في برنامج خطوات الشيطان ومسلسل جبل الحلال ومسلسل شطرنج.

جميلة عوض

مسلسل تحت السيطرة قدر يخرج لينا موهبة إبداعية متميزة وهى هانيا.. اللي محدش فينا معيطش في أخر حلقة من المسلسل وكان نفسه يدخل جوا المشهد ويحضنها وده من كتر إبداعها في تمثيله وصدقها في مشاعرها.. بالدور ده لفتت جميلة نظر كل اللي في الوسط الفني وابتدى يجلها أدوار كتيرة تقدر من خلالها تبدع أكتر زي ما أبدعت في مسلسل تحت السيطرة.

حمدي الميرغني

حمدي الميرغني من أول ما ظهر في تياترو مصر سنة 2013 ولحد دلوقتي في مسرح مصر.. وهو صاحب الإيفيه السريع اللي بيجيب مفعول مبهج عند الجمهور بمجرد ما بيقوله وده في كل مسرحية بيطلع فيها.. كمان قدر في وقت سريع يخلي الجمهور يحبه ويحب يتفرج عليه.

مصطفى خاطر

في مسرح مصر بيعرف إزاي يتقمس شخصيات مختلفة بكل تفاصيلها.. من لبس وماشية وطريقة كلام.. ده لفت نظر الجمهور ليه وخلاه يحب يتفرج على الشخصيات اللي بيقدمها لأنه بيعرف إزاي يخليهم يضحكوا من قلبهم.. ومن أشهر إبفيهات خاطر "أنا محدش يتوقعني"..

تاريخ "خاطر" مليان نقلات مسرحية مختلفة زي تمثيله في الدورة العاشرة لمهرجان الشباب المبدع من خلال مسرحية اسمع يا عبد السميع.. اللي بجانب تمثيله فيها أخرجها مع فرقة حرة.. وشاركته في التمثيل سارة درزاوي وهى بطلة من بطلات مسرح مصر.. كمان خاطر مثل في مسلسل دلع بنات ومسلسل قلوب.