إزاي تتعامل في أول يوم جامعة؟
الجامعة خلاص بدأت، والطلبة دلوقت جواهم أحاسيس مختلفة.. ما بين خوف وتوتر وفرحة وقلق وتشويق.. الأحاسيس دي جاية من إنهم مش عارفين إزاي هيتعاملوا في أول يوم جامعة.
عزيزي الطالب عزيزتي الطالبة.. عشان أول يوم يعدي بسلام تعالوا أقولكم هتتعاملوا إزاي.
التنكة وتيتو عضلات
بصي بقى يا ست البنات عشان الدفعة بتاعتك تكون حباكي ومش شايلة في قلبها حاجة من ناحيتك.. اتعاملي مع كل الدفعة كويس ومتبصيش لحد نظرة تناكة.. لأنهم لو لاحظوا ده مش هايتعاملوا معاكي وهاتبقي منبوذة بينهم وفي قعدتهم.
أما أنت بقى يا تيتو لو كنت بتروح الجيم مخصوص من فترة عشان تنفخ الباي والتراي.. عشان لما تدخل الجامعة يخدوك في أي خناقة بستأذنك تغير فكرتك ديه وأعرف إن الجيم رياضة مش بلطجة.
نعيمة لمعة وحمدي أوستيك
طبعاً إنتي من دلوقتي بتفكري تلبسي إيه ولا إيه فمعلش اسمحيلي أخترلك لبسك، عشان متبقيش زي نعيمة لمعة في الجامعة.. بصي يا ستي كل ما بقيتي بسيطة وفي نفس الوقت شيك كل ما ده بقى حلو ومريح نفسيًا ليكي.. ومش معنى إنك داخلة الجامعة يبقى لازم تلبسي حاجات بتلمع.. لأ خالص الحاجات اللي بتلمع ليها مناسبتها.. كل لبس في حياتك ليه وقته فحاولي تنسقي لبسك.
نيجي بقى عند عم حمدي أوستيك بص بقى يا برنس ألبس زي الناس.. يعني بلاش جو البناطيل المسقطة والخلاخيل اللي في الرجلين والشغل ده.. خليك إنسان طبيعي رافع بنطلونه لابس تيشرته وجزمته ولابس شنطته إنسان طبيعي بدون إضافة.
المدلوقة ومقطع السمكة
تلاقيكي دلوقتي بتفكري إزاي أطلع من أول يوم بقصة حب.. قبل ما تطلعي خليني أقولك إن ده هيخليكي تبقى مدلوقة على أي راجل تشوفيه.. وخدي بالك أنهم بيحسوا بده ومش بيحبوه واحتمال كبير إنك تُحرجي وتسمعي كلام مش حلو.. فخليكي صاينة كرامتك وعندك عزة نفس.
وإنت يا روميو طبعاً بتفكر من دلوقت إنك توقع كل بنات الجامعة في حبك و بعد كدة تخلع.. أحب أقولك اهدى على نفسك كده وفكر ألف مرة قبل ما توقع حد في حبك و تخلع وخليك راجل مسئول.. لما تقول لبنت بحبك يبقى تكون عارف إن الكلمة ديه بعديها جواز فلو مش قدها سيبها في حالها.
