كيف يستغل مستخدمو السوشيال ميديا الدين فى الترافيك؟
كتير بتقع عينينا على آيات قرآنية وأحاديث على مواقع السوشيال ميديا سواء فيس بوك أو تويتر.. وأكيد سمعت قبل كده صوت جرس "الواتس أب" بيرن.. ولما قمت وفتحت الرسالة لقيت قصة طويلة عن حياة الصحابة أو الرسول أو موقف أو حديث أو دعاء.. ومطلوب منك تنشره لعشرة أشخاص تحديدا.
- لايك آيات القرآن
ناس بتكتب على الفيس بوك آيات قرآنية "أفحسبتم أنما خلقناكم عبثا" أو "وما أمر الساعة إلا كلمح البصر أو هو أقرب" صدق الله العظيم.. أحيانا بيكون السبب ورا كتابته أنه ما كتبش شئ ديني من فترة.. أو الآية لفتت انتباهه وحس بها.. أو تذكير للناس.. أو إن الصفحة بتدور على "الترافيك" واستغلال الجانب الديني عند الناس عشان تجذب أكبر عدد ممكن.. أو أي سبب تاني.
الغريب أنك تلاقي شخص عمل "لايك" للآية.. أو "كومنت" بعلامة "لايك".. كأن مثلا ممكن آية تكون عجبته وآية لا، أو أنه يعمل "لايك" لآية وآية تانية لا.. وكأن كلام ربنا عرضة لـ "لايك" أو "كومنت"..، لكن أحيانا ناس تعمل "لايك" مجاملة أو لأنه عايز يتفاعل على الفيس بوك أو يظهر أنه متدين هو كمان أو عجبته الآية فعلا وحس بها، في ناس بتستغل الدين وتقديسه في مكاسب تجارية.
- انشرها ولك الأجر
"انشرها ولا تدعها تتوقف عندك ولك الأجر"- "انشرها وستسمع خبر جميل الليلة"- "إن لم تنشرها فاعلم أن ذنوبك هي التي منعتك".. ده أشهر أسلوب للتسويق ونشر الدعاء أو "البوست" بمعنى أصح.. يعني أدخل لك من الناحية النفسية، وابدأ أرغبك في النشر أو أرهبك إذا فكرت أنك ما تنشرش.
أول ما الشخص بيقرأ جمل من النوع ده يحس بالمسئولية والتكليف وأنه بيهدي أكبر عدد من الناس.. ويبدأ بسرعة في النشر كأن فعلا ربنا شاهد عليه أنه إذا ما نشرش هيعاقبه ويحاسبه على كده.. لو قلنا الدال على الخير كفاعله وأنك بتاخد ثواب كذا واحد.. لكن حاول تكون أذكى من أنك تكون جزء من لعبة تسويقية و"ترافيك" بيستغلك فيه أدمن الصفحات والمواقع.. ويحصروا الدين في مجرد أدعية وقصص تتنشر مش تسبيح وصلاة وعبادات روحية وخشوع وحاجات أكبر من السوشيال ميديا.
- دعاء حالة "الواتس"
"اللهم آتنا في الدنيا حسنة وفي الآخرة حسنة وقنا عذاب النار"- "اللهم ارضى عنا".. بنقرأ كتير أدعية وتوسل وحمد وشكر على "حالة" (status) "الواتس اب".. وكأن ده مكان الدعاء أو الكلام مع ربنا مثلا.. يعني لما تكون حابب تقول لربك شكرا وتحمده تفتح "الواتس اب" وتكتب في الحالة (status) "الحمد لله".. ولما تحب تطلب منه حاجة تروح بسرعة تكتب في الحالة "يــارب" وتدعي.. وفي "ايموشن" إيد للتوسل والطلب جنب الجملة.. وربنا يعرف أنك بتطلب منه أو بتشكره والناس تعرف أنك شخص متدين
ورغم أن الهدف من كل ده ممكن يكون التذكير والثواب والتقرب من ربنا بس.. وبالرغم من أن الدين والقرأن شئ مقدس وروحاني يستغله بعض مديري صفحات السوشيال ميديا للانتشار في نطاق واسع عشان "الترافيك.
