حب نفسك.. روشتة استعادة الثقة بالنفس تبدأ من هنا

أوقات كتير بنفقد الثقة بنفسنا وبندخل في مود حزين بيأثر على حياتنا وبيخليها ملهاش طعم. لكن فيه حاجات ممكن ترجع بيها ثقتك بنفسك، الحاجات دي بيقولها ليك أستاذ الطب النفسي دكتور محمد مزيد في التقرير ده من «شبابيك».

«مزيد» بيقسم الحاجات دي لروشتة عامة، وروشتة خاصة والاتنين مفروض تمشي عليهم في حياتك عشان تبقى واثق بنفسك. وهنبدأ بالروشتة العامة:

الإيمان بالله

لازم تكون مؤمن بالله وبقدره، وتكون في اتصال دايمًا معاه عشان ربنا يطمن نفسك، وروحك هتكون مليانة راحة وسكون.

شخص مش إله

متطمحش للكمال لأن الكمال لله وحده، أنت شخص مش إله، اعرف إن عندك نقاط قوة وضعف عشان لو طمحت للكمال وجت حاجة بوظت الكمال ده هتكتئب وهتفقد كل ثقتك بنفسك فاسعى في حياتك لكن من غير ما تطمح للكمال.

تحديد نقاط القوة والضعف

حدد إيه هي نقط قوتك ونقط ضعفك وبعد لما تحددهم، دعم نقاط قوتك وحافظ عليها أما نقاط ضعفك فحاول إنك تصلحها وتعالجها.

تحديد هدف في الحياة

اسأل نفسك انت عايش ليه. عايش عشان تاكل وتشرب وتنام، ولا عشان فيه هدف عايز تحققه في حياتك؟ أكيد فيه هدف بس شعورك بعدم الثقة مخليك مش شايفه لكن لو قعدت مع نفسك هتشوف إن عندك هدف وهو ده اللي انت هتسعى في حياتك عشان تحققه.

دكتور «مزيد» بيحكيلنا موقف حصل مع الدكتور النفسي «فيكتور فرانكل» إن في مرة حد جاله وقاله إنه عايز ينتحر فالدكتور سأله «ومنتحرتش ليه؟» فقاله الأسباب اللي بتدور حوالين حاجات ميقدرش يستغنى عنها.

الدكتور لعب لعبة حلوة؛ خد الكلام اللي قالوا وواجهوا بيه وإداه ثقة بنفسه وخلاه يحس إن حياته فيها حاجات مهمة وخلاه يبعد عن فكرة الانتحار.

نطلع من الموضوع بإنك لو بصيت في حياتك على الحاجات الإيجابية هتلاقي فيها حاجات تديك ثقة بنفسك وتخرجك من مود الكأبة.

اسعى للخير

اعمل أي عمل خير: وزع بلالين على الأطفال في الشارع، أو اكتب دعوات حلوة على ورق ووزع الورق على الناس. أي عمل خير اعمله لأن رد فعله على نفسك هيكون إيجابي جدًا هيخليك سعيد J وهيرفع من روحك المعنوية.

ثانيا: الروشتة الخاصة

التوافق بين إمكانياتك وطموحك

تحقيق التوافق بين إمكانياتك وقدراتك ومستوى طموحك ومطالبك، بمعنى إنك تكون عارف إيه قدراتك وإمكانياتك وتكيفها مع مستوى طموحك ومطالبك عشان متتضايقش وتفقد ثقتك بنفسك لو الحاجة جات عكس ما أنت متوقع يعني أبسط مثال على كده لو حبيت واحدة في سنة 3 جامعة مثلًا متقولهاش إني هخطبك وتروح لوالدك تقولوا كدة لأن أنت أصلًا لسه مشتغلتش.

وكل فلوسك رايحة على خروجاتك وتمن الكتب فالتوافق بين إمكانيانك وبين اللي بتطمح ليه مش متكافيء فلما يكون فيه توافق في المستقبل بين قدراتك وإمكانياتك ومستوى طموحك ومطالبك تقدر تتقدم للي بتحبها. وطبق المثال ده على أي حاجة في حياتك.

الضربة التي لا تقتلك تقويك

فيه حاجة في علم النفس اسمها اضطراب ما بعد الصدمة ولو مكنش الشخص اللي اتعرض للاضطراب ده قوي بما فيه الكفاية هينهار. وعشان كدة خلي الضربة اللي مكسرتكش تقويك وده عشان متبقاش عرضة للانهيار.

القراءة والبحث

كل ما زادت معلوماتك وخبراتك وثقافتك كل ما ده زود ثقتك بنفسك. فاقرأ واتعلم كل يوم حاجة جديدة. لأن القراءة والبحث هيبقوا سند لنفسك في حياتك.

حب نفسك

متبصش على نفسك إنك وحش وفاشل وغبي ومش عارف تحقق حاجة. لأن كل ده هيخليك تفقد الثقة بنفسك وتكرهها. واللي لازم تعمله إنك تحبها.