بعد الحلقة الأولى.. هذه المسلسلات تستحق المتابعة
رمضان السنة ديه فيه شوية مسلسلات أفكارها مختلفة وتشد الواحد إنه يتفرج عليها من الحلقة الأولى . تعالوا أحكي ليكوا حكايتها عشان تلحقوا تتفرجوا عليها :)
يحيى الفخراني بيقدملنا شخصية ونوس الراجل اللي بيروح فجأة لأسرة مكونة من الزوجة هالة صدقي و ولادها الأربعة وبيقولهم إنه صاحب أبوهم وعارف مكانه . وأبوهم ده مفروض إنه بقالوا 20 سنة مختفي عنهم. بس ياترى ونوس إنسان كويس وغرضه خير ولا إنسان شرير. ده اللي هتعرفوه لما تشوفوا المسلسل اللي بيدور في إطار إجتماعي وفي مواقف بتحصل في إطار لايت كوميدي. و بيناقش قضايا مهمة في المجتمع. المسلسل من تأليف عبد الرحيم كمال وإخراج شادي الفخراني.
جراند أوتيل
فندق على الطراز الكلاسيكي ساكن فيه مجموعة من رجال الأعمال اللي بيعقدوا صفقاتهم فيه. الفندق يديك إحساس بالغموض والشك بين أفراده . واللي بيأكد ده إن بتحصل فجأة جريمة قتل لموظفة في الفندق.
أحاسيس مريبة هتخليك تتشد ليها أول ما تشوفها مع عمرو يوسف وسوسن بدر وأمينة خليل. المسلسل سيناريو وحوار تامر حبيب وإخراج محمد شاكر خضير. أفراح القبة
«أفراح القبة» رواية من تأليف الكاتب الكبير الراحل نجيب محفوظ، وده كفيل إنه يجذب عشاق محفوظ ومشاهدين كتير لمتابعته. رواية فكرتها مختلفة عن الأفكار اللي متعودين نشوفها بتم أحداثها في فترة اسبعينيات في إطار لعبة تمثيلية على المسرح .
بس بيكتشف الممثلين فيها إنهم بيمثلوا حياتهم في الماضي اللي مليان أسرار عار في حياة كل واحد فيهم مش حياة خيالية ومؤلف النص اللي بيمثلوه كان قاصد يعمل كدة.
قد يهمك أيضا⇐ مواعيد مسلسلات رمضان على قناة «CBC»
تابعوه وإعرفوا ليه كان قاصد يعمل كدة مع منى زكي وصابرين وصبا مبارك ورانيا يوسف وسيد رجب وسوسن بدر ورانيا يوسف وجمال سليمان. المسلسل من إخراج محمد ياسين. سقوط حر
نيللي كريم بتقدم لينا في المسلسل دور مريضة نفسية متهمة بقتل جوزها وأختها وهو دور مختلف عن دورها كمدمنة في مسلسل تحت السيطرة في رمضان اللي فات.
قد يعجبك أيضا⇐ مواعيد مسلسلات رمضان على قناة «MBC مصر»
وأدوار نيللي محتاجة إنك تتابعها من أول حلقة عشان تدخل في حالة الشخصية اللي بيتقدمها وتعيش معاها تفاصيلها هى وبقية أبطال العمل من أحمد وفيق ومحمد فراج ووفاء صادق وصفاء الطوخي . المسلسل من تأليف وائل حمدي ومريم نعوم وإخراج شوقي الماجري.
راس الغول
الزعيم عادل إمام ليه كاريزما خاصة تجبرك إنك تتفرج على أعماله.. الزعيم بيقوم بدور «مأمون» راجل بخيل جلدة :D بيحرم ولاده ومراته من كل حاجة فبيبعدوا عنه ولما بيعرفوا إنه ملياردير بيبتدوا يدوروا على فلوسه.
المسلسل بطولة عادل إمام، لبلبة، مصطفى فهمي، شيرين، خالد سرحان، وحمزة العيلي وتأليف المسلسل ليوسف معاطي والإخراج لرامي إمام.
