مغتربات أولى جامعة.. اسمعي نصايح اللي قبلك
طول عمرنا بنحلم نخلص الثانوية، ونطير على باب الكلية سايبين ورانا هم المذاكرة والضغط وبعبع عنق الزجاجة، لكن مع البنات الوضع مختلف بتشوف أنا حياتها هتبتدي أول ما تحط رجليها على باب الجامعة.
وبعد ما تكتشفالفتاة أن كليتها مكانها خارج سور طفولتها وبرائتها، وأنها هتبعد عن صحابها وأهلها في سبيل إنها تحقق ذاتها، بتواجه صعوبات من أول البيت لحد ما تتخرج.
علشان كده «شبابيك» بتقدملك نصائح مغتربات سبقوكي و اتمنوا لو حد قالهم الكلام ده قبل دخول الجامعة...
الصحاب
يارا محمد بتقولك «اختاري صحبتك اللى شبهك لأنك هتقعدي معاها فترة طويلة ولو كان اختيارك غلط من الأول ده هيأثر علي نفسيتك وممكن يخلوكي تكرهي الكلية».
أما وولاء عبد المنعم بتنصحك بأنك توسعي دايرة معارفك «حاجة حلوة وأقوى لو حصلت من سنة أولى، متقتصريش علي صحاب قليلين، حاولي يكون ليكي زمايل كتير ومعاملتك معاهم حلوة لأنهم هيفدوكي وكمان لأن مش هتعرفوا تعيشوا لوحدكم وتقفلوا علي نفسكم».
لكن إسراء جمال كان ليها وجهة نظر مختلفة شوية وقالت «أهم حاجة الصحاب هتقابلوا ناس كتير الحلو والوحش، ما تدوش الأمان لأي حد على طول، الكويس هتكمل معاكي والوحشه ابعدي عنها واتعلمي من التجربة، ولو اختارتي صاحب غلط في غربه هتبقي بتضيعي نفسك لازم تكوني حريصة زيادة عن اللزوم، لأنك هتبقي نسخه منها هتعملي نفس اللي بتعمله».
الميزانية والتعامل بها
يارا بتأكد على الميزانية وبتقولك «حسب ميزانيتك قسمي الفلوس جزء للأكل و جزء لمصاريف الكلية وجزء للمواصلات، ولازم تخلى معاكي فلوس على جمب احتياطى للظروف الطارئة».
وكمان بينصح الطلاب السابقين، «أن الميزانية بتختلف من شخص للتاني فأهم حاجه فيها إنك ترتبي أولوياتك، أولا مصاريف الكلية، ثانيا المصاريف الشخصيه من تنقلات وكده، ثالثا مصاريف للطوارئ لازم يبقي معاكي فلوس زيادة شايلاها علي جنب، ومصاريف الترفيه والفسح».
حافظي علي اللى اتربيتي عليه
يوستينا ميشيل بتأكد «أهم حاجة تحافظي على تربيتك و فكري نفسك كل شوية بالمبادئ إلي اتربيتي عليها، و أن الثقة اللي أهلك أدوهالك دي امتياز مش أي حد بياخدها فلازم تبقى قدها».
كما شدد الطلاب السابقين على ضرورة بناء الثقة بينك وبين أهلك وتحافظي عليها، لأن ضميرك في الجامعة هو الرقيب عليكي «مش أهلك».
وهم الغربة
ينصح الطلاب السابقين مغتربات أولى جامعة «ماتستلسميش لأي مشكلة أو مرض، شجعي نفسك دايما أنك بتعملى حاجة مختلفة، وماتعشيش وهم أن الغربة مره بالعكس ده أعظم درس».
استمتعي بهدفك
«طالما قدامك هدف اسعي إنك تحققيه واستمتعي بده، طبيعى في الأول ما تتأقلميش، اختاري أولوياتك بس ما تعديش يوم غير لما تستمتعي بيه على كل المستويات لأنها أجمل أيام فعلا لو ما استمتعوش هتندموا»، كلام يارا محمد.
الأكل
أشارت ولاء أن الأكل هو أكتر حاجة بتهم البنات، ودايما بيحبوا يجربوا كل جديد، معلقة «نصيحة مني ابعدي علي قد ما تقدري من أكل الشارع والفاست فود واعملى أكلك بنفسك أوقضيها تونة».
الثقة بالنفس
«أهم حاجه يكون لدى الطالبات المغتربات بالعام الجديد يثقون بأنفسهم وأنهم مش أقل من أي حد، معظم الناس في القاهرة بيبصو للمغتربات على أنهم ناس مش متحضرة وماينفعش يتعاملو معاهم وأنهم ما يعرفوش حاجه في الدنيا، وده مش صح بمجرد أنك تتعودي وتثقي في نفسك بسهولة هتغيري وهتتأقلمي بسرعة» ده اللي قالتة إسراء.
الاعتماد على النفس
هتتعذبي كتير في الأول، حاولي تعتمدي علي نفسك في كل حاجه، حاولي أنك تتعرفي علي الأماكن في المحافظة الي انتي فيها، انسي كلمه انك مغتربه ومتعرفيش حاجه، اتعاملي كأنك في بلدك.
ابعدي عن المبتزين
إسراء بتنصح كل بنت تاخد بالها من تعاملها مع الولاد خصوصا الشخصيات المبتزة، مضيفة عن تجربه لأحد زملائها «زميلتي عرفت ولد كان لما يخرج معاها يتحجج أنه نسي الفلوس وكانت هي بتدفع من معاها وآخر مره قابلها فيها كان معاها موبايل غالي، سرقوا منها ومشي وقفل الأكونت ومعرفتش توصله بعد كده».
