عايز تشتري كلب؟.. فيه حاجات لازم تعرفها الأول

اختيار نوع الكلب بيكون على حسب إنت جايبه ليه؟ يعني جايبه عشان يكون كلب حراسة ولا كلب تسلية اللي هو تربيه جوا بيتك وتلعب معاه.. ولا كلب تجارة، ودى من الأنواع اللي الناس بتشتريه عشان يجوزوه وبعدين يبيعوه.

لو إنت جايب الكلب عشان تربيه وتلعب معاه جوا البيت يبقى اختار كلب حجمه مناسب تقدر توفر ليه مكان في البيت وبرضو سعره مناسب وأسعار الكلاب بتبدأ من 500 جنيه. والكلب الجولدن والجريفون والشيواوا من أفضل أنواع الكلاب اللي ممكن تختار منها الكلب اللي إنت عايزه.

أما أفضل أنوع كلاب الحراسة، واللي غالبا في ناس بتاجر فيها فهي كلاب الروت وايلر، والدوبرمان، والراعي الالماني، والبول ماستيف.

الكلاب أوفياء إزاي؟.. شاهد الحقيقة في هذه الأفلام

لما تروح تشتري الكلب، لازم تسأل هو متعود ياكل إيه.. يعني بياكل «Dry food» اللي هو الأكل المجفف ولا أكل بيتي عادي؟.. وهل هو متطعم ولا لأ، وإيه التطعيمات اللي مفروض ياخدها وكل قد إيه ويروح يطعم فين؟.

وهل الكلب معاه رخصة وشهادة ميلاد ولا لأ ؟ وده عشان تتأكد من صحتها وإنها مش مهجنة، وكمان عشان تتأكد من الفصيلة بتاعتها.

الحفاظ على صحته

من أول ما تشتري الكلب فيه حاجات لازم تاخد بالك منها عشان تحافظ على صحته لأن فيه ناس لما بتشتري الكلب بيكون لسه صغير فمبتكونش عارفة تتعامل فبالتالي بيتعب وصحته بتدهور وبيموت.

ومن الحاجات اللي لازم تاخد بالك منها إنك متعرضش الكلب الصغير للهوا عشان ميجلوش برد في معدته، ومتأكلوش حاجة فيها عضم لأن برضه ده هيأثر على معدته، وتحافظ عليه من أي وقعة عشان عضمه بيكون لسة خفيف فهيكون عرضة إن يحصله كسر ما وطبعًا قبل كل ده لازم تطعمه عشان ميجيش ليه فيروس «البارفو» اللي لو جاله هيموته.

واعمل حسابك إنه لو  تعب جامد وإحتجت توديه للدكتور هيكون سعر الكشف بيبدأ من 100 جنيه.

تربية القطط والكلاب تحميك من خطر السكتة الدماغية