8 خطوات تؤهلك لمنصب رئيس اتحاد الطلبة
معظم طلاب الجامعة يبحثوا دائمًا عن المشاركة الفعالة في مختلف الأنشطة، ويمتلكوا طموح لعضوية اتحاد الطلبة.. إذا كنت خوض التجربة والفوز بمنصب رئيس الاتحاد، يجب اتباع الخطوات والمعايير الآتية:
الشلة هتفيدك
-
فى الكلية أو الجامعة مفيش شيء ممكن يساعدك على الشهرة واكتساب صداقات الناس والحصول على أصوات كتيرة فى الانتخابات غير الشلة بتاعتك، عشان تحقق ده لازم توسع دائرة معارفك وأوعى تحجم أصدقائك، بالعكس استمر دايما فى جمعهم حواليك وراعي إنهم لازم يكونوا مختلفين فى الطباع والتوجهات والتكوين وأماكن اقامتهم وثقافتهم، وده عشان تضمن أنهم هيوصلوك لأكبر عدد من الناس، من الأخر أصدقائك أكبر دعاية انتخابية مجانية.
رعاية الشباب
-
من أول يوم لازم تتردد على مكتب رعاية الشباب لتبادل الأراء وتكوين علاقة قوية معاهم، وأسأل على الأنشطة اللي هيعملوها فى الكلية بتاعتك، وشارك فى أغلبها وراعي إن لازم يكون ليك القدرة على النجاح فيها مش مجرد اشتراك عشان منظرك العام قدام زمايلك وباقي الطلبة.
المناسبات متفوتكش
-
زور أصدقائك دايما وحاول تعرف منهم مناسبات الطلبة الاجتماعية (عزاء - فرح - مناسبة أسرية)، ممكن تروح أو حاول الاتصال على الأقل، واتبع نفس الطريقة مع أساتذة كليتك وموظفي الجامعة حتى عمال الأمن والنظافة.
الارتباط
-
عيش تجربة الحب داخل الجامعة وارتبط بواحدة بس، البنات في الجامعة هيشوفوا إنك شاب مسئول ومنضبط، بعكس صاحب العلاقات الكثيرة، وأوعى تفكر فى إن الأمر مجرد وقت بتقضيه وخلاص.
المحاضرات وناسها
-
الشباب المنتظم داخل الجماعة فئة لا يستهان بها، لو اعتمدت على الصفات والخطوات السابقة بس دون مراعتهم هتخسر، لأنهم أفضل ناس ممكن يوصلوا رؤيتك، احضر محاضراتك وتبادل معاهم الكتب والنقاشات وتصوير المحاضرات اللى فاتتك، إياك تحاول الاستفادة منهم فقط من غير تقديم أى شىء بالمقابل.
طلبة جدد
-
خليك دائم الحركة والتنقل بين الكليات، اتعرف على طلبة جدد، مفيش مانع كمان أنك تقعد على بعض الكافتريات في الجامعة، وأنك تخرج مع الطلبة وتكون دائم الظهور.
عرض الأفكار
-
تابع الندوات والمناقشات اللي بتنظمها الكليات المختلفة في الجامعة، وحاول عرض بعض الأفكار والاقتراحات الجدية في القضايا المختلفة خلال مشاركتك، المهم هو أنك تحسسهم بوجودك وتعرفهم أنك شخص مهتم وبتراقبهم.
فنون التواصل
-
من السهل التواصل مع أساتذتك وزمايلك لكن ثقافة وفنون التواصل هي اللي بتفرق في طبيعة العلاقة بينك وبينهم، المناقشة والخبرات المتراكمة ونجاحك في إدارتك الحوارات، وتقييم تصرفاتك ومعرفتك ببعض الأمور العامة تمكنك من حل المشكلات بطريقة منظمة، وإلمامك بكل الأحداث الجارية معناه إنك رئيس اتحاد طلبة بالفطرة.
