اعمل فرحك بطريقة مبتكرة وبأقل التكاليف.. «إليك مقترحات»
حالة بلدنا الاجتماعية بتفرض علينا إننا بهتم بشكل الفرح ونُسرف كتير في المصاريف، وده بيرفع التكاليف وحمل زيادة، وفي النهاية الكل بيروح سواء زعلان أو مبسوط وانت وزوجتك اللي بتتحملوا التمن.
فيه بعض الناس بدأت تعمل أفكار وطرق جديدة في أفراحها توفيراً للنفقات واستغلال البيئة المحيطة أو الأدوات المتاحة أكبر استغلال.
الفكرة الأولى بيشرحها المهندس محمد العماري، إللى رفض إنه يحط نفسه تحت ضغوط الشكل والمنظر قدام الناس وفكر صح.
لما بدأ يفكر في موضوع الفرح قرر إنه يعمل حاجة خارج القاعات وتكون في مكان مفتوح واختار نادي نقابة المهندسين في اكتوبر، ودفع تقريباً 4000 جنيه مقابل المكان والترابيزات، وجاب الأكل (الجاتوه والساندويتش والمياه) من أماكن تانية بأسعارها الطبيعية من غير الإضافات بتاعة النادي أو قاعات الأفراح.
كان فاضل فقرات الفرح اللي بتخلق جو للفرح، وكان الاستعانة بأصدقاؤه أصحاب المواهب في الغنا أو العزف والتأليف، وأدوا أحلى فقرات ممكن تتخيلها لدرجة إنهم خلوه يغني أغنية لعروسته من تأليفه الخاص وبعزفهم.
*البساطة مطلوبة في كل شىء وفي حياتنا خصوصاً لما تكون في أزمات مالية أو ضغوط صعبة بتتفرض علينا، عشان كده فكر في اساليب بسيطة توفر بيها تكاليفك الزيادة زي:
* لو عندك حد من أصحابك بيكتب شعر وحد تاني بيعزف جيتار مثلاً وغيرهم صوته حلو أو حتى منهم الاتنين يعملوا أغنية جميلة أو فقرة تتقدم في فرحك وبشكل بسيط، أولاً هتشهر اصدقائك وتكسبهم الثقة في نفسهم وتحطهم على أول الطريق، ثانياً وفرت على نفسك فلوس الفرقة الموسيقية.
* بالنسبة للكوافير ومصاريفه، أكيد عروستك ليها صديقة أو ممكن تكون أختها بتفهم في فن المكياج وتشتغل أحسن من المتخصصة، احساس إنها هي اللي تجهز صديقتها أو قريبتها هيخليها أجمل وأفضل وأوفر.
* دعوات الفرح لو اعتمدت على صديق أو صاحب محل دعاية وإعلان يكون قريب منك، يعملك تصميم كويس وشيك وبنصف تمن مكاتب الإعلانات اللي بتاخد فلوس كتير، رغم إنها حاجة المفترض إنها مخصصة لإعلام المعوين بس، ولا تمثل أي قيمة بعد كده.
*المكان، ممكن تختاره (0pen air)، على الكورنيش أو أي حديقة عامة وتتفق مع القائمين عليها مقابل مبلغ مالي بسيط.
فيه بعض الناس بتعمل فرحها فوق سطوح العمارة وبيكون الديكور مجرد محهود ذاتي من السكان .
