العالم المسحور.. ليه الإجابة دايما تونس؟
السفر أحلى حاجة فى الدنيا مش عشان فوايده بس، كمان عشان الكنز دايما فى الرحلة فى دروسها وصداقتها. فيه ناس فاكرة إن الجمال في أوروبا بس ومش عارفين إن العالم كله مليان عجايب. وأفريقيا بصفتها قارة من قارات العالم القديم فيها أكثر الأماكن التاريخية إللى إرتبطت بالحضارة أوالإستعمار.
«شبابيك» هتفتح ليكم شباك من خلال سلسلة «العالم المسحور» على ساحل أفريقيا الشمالى أو مايعرف بالمغرب العربى (ليبيا، الجزائر، تونس، المغرب، مورتانيا). ونتيجة لظروف ليبيا والظروف الإقتصادية، إختارنا نسلط الضوء على تونس والمغرب ومورتانيا.
بلاد السحر والتصوف وتاريخ طويل من حضارات عاشت على أرضهم كمان الأماكن دى مشهورة بحبهم للمصريين وإن عملة كل دولة فيهم مقارنة بالجنيه المصري مش كبيرة. البلاد دى من الأماكن المحببة للأجانب بس على مستوى السياحة المصري كل إللى نعرفوا إن الإجابة دايما تونس بس ليه؟
ليه تونس؟
تونس من البلاد إللى لا التأشيرة مكلفة ولا عملة البلد مكلفة مقارنة بالجنيه المصرى. تونس جوها ساحلى وممطر فى الشتا. اللغة عربى مخلوط بفرنساوى.
تونس من أجمل الأماكن إللى ممكن تستمتع فيها بالأكل ومعروفة بالهريس أو معجون الشطة واللبلابى والزلابية (المعروفة عندنا بالمشبك) وأكلات تانية كتير. المدن الاكثر زيارة فى تونس هما الجم وسوسة وجربة.
الجم من أهم المناطق بالنسبة لسياح أوربا عشان فيها واحد من أكبر المسارح الرومانية فى العالم The Djem Amphitheater ومتحف الجم.
أما مدينة سوسة من الأماكن الساحلية إللى ممكن الواحد يمارس فيها كتير من الرياضات المائية، فتاريخها التراثى مش أقل من مدينة الجم.
المدينة بتضم اكتر من متحف منهم متحف دارالسيد ومتحف سوسة للأثار كمان الجامع الكبير وقصر الرباط من المزارات المهمة هناك. أما أهم مكان بالنسبة لأي حد بيحب يسافر يبقى «قصبة سوسة» ودى وسط البلد أو الحسين عندنا فى مصر . المكان فيه الأسواق القديمة ومساحة بتبين الثقافة والتراث وحياة الناس.
على بعد كليوميترات من سوسة فى مدينة القيروان فى جامع سيدى عقبة أو بيقولو عليه الجامع العظيم. سوسة من الأماكن إللى مينفعش تتفوت و بعديها الجربة.
الجربة جزيرة تابعة لدولة تونس موقعها على الخريطة السياحية لتونس مهم جدا من قريب إتحولت لمتحف فنى مفتوح و صحيفةالجرديان إتكلمت عن الحدث فى معرض مصور ليها.
الجربة محتاجة أصلا رحلة لواحديها. أولا سوق المدينة القديم وإللى موجود فى عاصمة المدينة حومة السوق. السوق بيشتهر بالمنتجات التراثية والحرفية للمدينة. المدينة مشهورة بأبراجها التحصينة إللى إتبنت فى العصور الإسلامية من أشهرها البرج الكبير. ده غير متحف قلالة المشهور بالخزفيات ومعبد الغريبة اليهودى .
شواطئ الجزيرة من أجمل شواطئ تونس وأجمل أماكن الاسترخاء شط الجريد من أجمل الشواطئ دى وأحلاها.
كل شبر فى تونس محتاج أجازة عشان الواحد يستمتع بيه وأعتقد إن ده السبب ورا إن الإجابة دايما تونس. موقع وزارة السياحة التونسية عامل منشور pdf بيعرف فيه السياح العرب بكل مناطق الجمال هناك وكمان عادات وتقاليد البلد والخدمات بتاعت الوزارة.
كمان وزارة الخارجية المصرية على موقعها عاملين صفحة معلومات عن البلد وإزاى التقديم للتأشيرة ووصف لحاجات كتير.
