يعني إيه ديماجوجية؟.. ابسطهالك
مكملين معاكوا فهم المصطلحات اللي بنسمعها كتير في البرامج والأفلام بس مش فاهمين معناها، المرة دي هنتكلم عن "الديماجوجية"
دا جزء من فيلم السفارة في العمارة، في المشهد دا "داليا" الي هي داليا البحيري وعيلتها جايين يزوروا "شريف خيري" الي هو عادل إمام، ولما العيلة دي بتتفتش من الحرس اللي بيحمي السفارة الإسرائيلية واحد منهم بيقول :"دي ديماجوجية شديدة". وعادل إمام بيبقى مش فاهم إيه ديماجوجية دي؟
أصل كلمة "ديماجوجية"
هي مصطلح يوناني مشتق من كلمة (دِيمُوسْ δῆμος)، وتعني الشعب، و(غوجية εργασίας) وتعني العمل أو القيادة والمبادرة ومعنى المصطلح "قائد الشعب".
معنى "ديماجوجية"
الديماجوجية ببساطة شديدة هي أسلوب أو طريقة لكسب التأييد أو لفت الانتباه، بأنك تستغل مشاعر وعواطف اللي قدامك، وتوهمه أنك هتحققله أحلامه أو هتساعده في حل مشاكله من غير ما تكون هتعمل دا فعلا، وتبدأ توجهه لأفعال تخدم مصلحتك الخاصة، الشخص الي بيستخدم الديماجوجية بيبقى معتمد في الأساس على حاجتين بيدعموا بعض:
الأولى : هي الشعارات والكلمات الرنانة والتلاعب بالألفاظ بغرض إبهار الناس بشكل الكلام وتزييف الحقائق، بمعنى أن الديماجوجي بيستخدم كلمات تخاطب عاطفة الجمهور وتستغل حاجاتهم ورغباتهم بدون استخدام الأدلة المنطقية أو مخاطبة العقل. مثلا : زعيم يطلع يقول لشعبه "أنا بحبكم" بدون ما يذكر "عمل ايه عشانهم".
و الحاجة التانية: اللي بتشكل العامل الأساسي لنجاح الأسلوب دا هو جهل الجمهور أو عدم معرفتهم بحقوقهم.
الديماجوجي غالباً شخص واثق بنفسه وليه كاريزما، ودا الي بيسهله إقناع الناس بحاجات غير منطقية وهو نفسه مش مقتنع بيها، لكنه بيحاول استثارة عواطف الناس واللعب بمشاعرهم، عشان يسيطر عليهم.
في السياسة، هنلاقي شخصيات سياسية كتير جسدت معنى الديماجوجية زي (هتلر) و(موسوليني) وغيرهم كتير، كلهم كان غرضهم الأساسي الوصول للسلطة عن طريق استغلال حاجات الجمهور وتوجيههم زي ما هم عايزين.
كتير من السياسيين والإعلاميين والرؤساء في دول العالم التالت محترفين ديماجوجية، لأنهم عايزين يكسبوا التأييد بأي شكل، وشعوب العالم التالت فيها نسبة جهل وأمية عالية، وبالتالي يكون سهل جدا أن الناس دي تستغل سذاجة وجهل الشعوب ورغباتهم وأحلامهم في إقناعهم بأي حاجة.
اقرأ أيضا : 
