عندك «انترفيو»؟.. اختار لبسك صح

استعدادك للانترفيو مهم جدا لو عايز تتقبل في الوظيفة، في كل الأحوال مظهرك بيدي انطباع عنك وعن شخصيتك، وعشان كدة لازم تهتم أنك تسيب انطباع إيجابي في أي انترفيو تروحه.

في شركات ممكن ترفض حد عشان مظهره في الانترفيو مكانش مناسب، يعني مظهرك ممكن يكون سبب ضياع فرصة مهمة منك. قبل ما تروح، اعرف ثقافة المكان دة إيه، لو هتروح انترفيو في شركة أو مكتب أو أيًا كان، اعمل بحث سريع عن المكان ده وشوف إيه نظامهم، هل هم محافظين ولا لا، واللبس السائد هناك ايه، دا هيديك معلومات عن الشكل اللي المفروض تظهر بيه، والأفضل أنك تسأل الـHR ايه الـ Dress code المطلوب للانترفيو، ده كمان هيبين أنك مهتم بمظهرك وبالاندماج مع المكان.

في أماكن الناس فيها بتلبس تيشيرتات نص كم وجينز في الشغل عادي، وفي أماكن تانية بيبقى لازم يلبسوا لبس معين اللي هو اللبس الفورمال أو السيمي فورمال، دا اسمه الـDress Code، وأنواعه:

فورمال Formal

• الفورمال هو اللبس الرسمي، اللي ممكن يكون قميص وبنطلون، أو بدلة وكرفتة للولاد، وجيبة أو بنطلون وقميص للبنات.
• الفورمال يعني لبس سادة خالص (أسود- أبيض- لبني- كحلي)، مينفعش يبقى قميص منقط ولا عليه أشكال سواء بنات أو ولاد.
• الاكسسوارت للولاد حزام أو ساعة، ويفضل لون الحزام يبقى لون الجزمة، وللبنات متبقاش أكتر من حلق أو ساعة، وتكون ألوانهم هادية وأشكالهم بسيطة.
• بالنسبة للأحذية لازم متكونش مفتوحة، مينفعش صندل مثلًا ولا ألوان فاقعة.
• للمحجبات الطرحة مينفعش تكون منقوشة أو فيها ألوان كتير، لازم تكون سادة ويبقى طرحة واحدة أو اتنين بالكتير.

سيمي فورمال Semi- formal

هو زي الفورمال تقريبًا، لكن أقل رسمية منه، مثلًا مش لازم تلبس جاكت وكرافتة للولاد، والبنات ممكن يلبسوا قمصان منقوشة عادي أو فستان فورمال وعليه جاكيت سادة، وممكن الاكسسوارات تكون أكتر من الفورمال شوية، لكن برضو متبقاش زيادة عن اللزوم.

-الكاجوال Casual:

دا اللبس العادي، اللي بتخرج بيه مع صحابك، زي البنطلونات الجينز، والتيشيرتات و السويت شيرتات، والأحذية الرياضية، والجيبات والشنط الملونة. والكاجوال هو الخيار الأخير ليك ساعة الانترفيو، لأن الأفضل أنك حتى لو مش عارف إيه اللبس المطلوب، متروحش كاجوال، لكن تلبس فورمال أو سيمي فورمال أحسن.

-سيمي كاجوال Semi -casual

ده بيختلف عن الكاجوال في أنه هيبقى فيه جزء فورمال، يعني ممكن يكون بنطلون جينز وقميص للبنات أو الولاد، والقمصان ممكن تكون ملونة أكتر من لون، أو لون واحد، أو يكون عليها خطوط أو منقطة. يعني المظهر ده بيميل للكاجوال، لكن فيه على الأقل قطعة واحدة فورمال.