جمالك، وأناقتك، وصحتك، حاجات مهمة جدًا لازم تحافظي عليها وأنتي حامل لأن الحاجات دي بتكون عاملة زي أثر مفعول المشروب الـ«فريش» اللي بيخليكي حاسة بإنتعاش في عز تعبك. وفي الموضوع ده «شبابيك» هيقولك على أفكار تخليكي منتعشة وقت الحمل.
اللبس راحة نفسية
حقيقة كلنا جربناها وجابت نتيجة وعشان كدة انزلي هاتي لبس جديد ومختلف ومبهج، لبس ميكونش واسع قوي ولا ضيق قوي لبس تكوني حاسة أنك مرتاحة فيه وكمان غيري «الإستايل» بتاعك.
لأنه هيفرق معاكي مثلًا لو كنتي بتعملي الطرحة «إسبانش»، اعمليها تركي. ولو شعرك نفسك تغيري فيه قصيه واعمليه «كارية» وهكذا، وأهم حاجة أنك متكسليش وبصي على الموضوع ده على أنه حاجة هتخليكي مرتاحة مش مضغوطة وتعبانة، ولو بصيتيله كدة هتلاقي نفسك حابة تعمليه.
الرياضة نشاط
الرياضة؛ زي المشي والسباحة واليوجا من الحاجات المهمة جدًا لأنها بتخليكي نشيطة وفي نفس الوقت بتحافظ على جسمك، وتمنعه من زيادة الوزن وعشان كدة خلي الرياضة عادة في حياتك مش مربوطة بس بفترة الحمل.
تغيير جو
سافري أو اخرجي في أي مكان نفسك تروحيه. عيشي حالة من الإستجمام والهدوء ويا سلام لو سافرتي وقعدتي على البحر :) هيبقى منظره كفيل أنه يخليكي مبسوطة لغاية ما تولدي وتقومي بالسلامة لأن دايمًا البحر ليه سحر غريب على كل واحد شافه. وطبعًا متعرضيش نفسك للتنقلات الكتيرة عشان متتعبيش خلي كل حاجة تبقى معقولة.
الأكل بصحة
أكيد في فترة حملك بتتبعي فكرة أنك بتاكلي لأتنين أنتي وابنك فبتلاقي نفسك بتاكلي كتير جدًا وفيه أكل من اللي بتكليه مبيكونش صحي وعشان كدة لازم تتبعي نظام غذائي صحي وده طبقًا لدراسة تم تمويلها من قبل المعهد الوطني للصحة في المملكة المتحدة و تم نشرها في المجلة الطبية البريطانية (BMJ).
الدراسة دي بتقول إن الأكل الصحي والتحكم في السعرات الحرارية خلال فترة حملك بيساعد في منع مضاعفات الولادة، بس ده مش معناه أنك تعملي ريجيم عشان تنقصي وزنك، بالعكس المطلوب في الحمل هو زيادة صحية في الوزن مش انقاص الوزن فكل ما الأكل كان صحي كل ما كانت ولادتك كانت سهلة وصحة ابنك أو بنتك كويسة.
