في الفلانتين.. هاتلها شنطة هاند ميد بسعر على قد الإيد
الاختلاف دايمًا بيدي للحياة طعم ولون مبهج. وعشان كدا هديتك لحبيبتك في عيد الحب «الفلانتين» لازم تكون مختلفة. ولما نقول اختلاف بيبقى مفيش أحسن من الشغل الهاند ميد اللي معمول مخصوص لحبيبتك.
«شبابيك» تجولت في منطقة الحسين، وشدتنا محموعة شنط تحس فيها بالروح المصرية، لأن صاحبها قرر يكون مختلف.
صاحب المحل اسمه «علاء محمد» احترف هو وعيلته صناعة الشنط الجلد، وكل واحد منهم قدر يضيف لمسة فنية إبداعية، عشان يطلعوا شغل متميز عن غيرهم. وفي السطور القادمة هنعرض لك أنوع الشنط اللي عند علاء، مع أحجامها وأسعارها المختلفة
شنط جلد × قماش بدوي
أول تشكيلة هتلاقيها عند «علاء» هي الشنط المربعة، اللي بيمزج فيها بين الجلد الطبيعي والقماش المصنوع على إيد البدو. الشنطة دي بتمزج بين الشياكة والعملية. وكمان هي متوفرة بثلاث أحجام، الصغير اللي ينفع في الخروجات والمشاوير الصغيرة، والمتوسط اللي هيكون عملي في الشغل، والكبير بينفع لو بتشيل لاب توب وهي رايحة الجامعة أو الشغل أو في الخروجات والرحلات.
وكمان القماش البدوي بيدي الشنطة ألوان كتيرة، فتبقى شكلها شيك في الشغل ومبهجة ومختلفة في الخروجات. وكمان ممكن تليق على أكتر من طقهم بألوانها الكثيرة.
وفي الصور الجاية هتشوف معانا أحجام الشنطة وأشكالها المختلف، وسعر كل حجم.
الحجم الصغير: 20عرض ×20 طول
السعر: 130 جنيها
الحجم المتوسط :27 عرض ×20 طول
السعر: 150 جنيه
الحجم الكبير: 30 عرض ×30 طول
السعر: 180 جنيه
الشنط الباك
الشنط الباك طالعة موضة، وشكلها بيكون شيك جدا في اللبس، وكمان عملية سواء في الخروج أو الشغل. وبعيد عن الشنط الصيني اللي مالية السوق، ممكن تشتري لحبيبتك شنطة جلد طبيعي من عند «علاء». الجلد الطبيعي بيدي للشنط شياكة غير طبيعية، ده غير المتانة والتحمل، والستايل المختلف.
وفي الصور الجاية هنشوف معانا الأحجام المختلفة للشنط الباك والأسعار.
الحجم الصغير: 20 عرض× 20طول
السعر: 150 جنيه للشنطة الجلد ×جلد
و180 جنيه لو جلد × قماش
الحجم المتوسط: 30 طول ×30 عرض
السعر: 180 جنيه جلد × جلد
200 جنيه جلد ×قماش
الحجم الكبير: 40 طول ×30 عرض
السعر: 250 جنيه جلد × جلد
280 جنيه جلد ×قماش
شنط اللاب توب
لو حبيبتك بتشتغل أو بتدرس وبتشيل حجات كتيرة أو بتشيل لابتوب معاها كل يوم، فـ«علاء» عنده شنط جلد كبيرة الحجم، تنفع للأغراض دي، وبأحجام مختلفة.
الحجم: 40 عرض × 30 طول
السعر: 300 جنيه
شنطة صندوق
لو حبيبتك مش عاجبها العجب وبتحب كل شيء مختلف، يبقى الشنطة الصندوق هي الحل، واللي بتتميز بألوانها الغامقة اللي بتخليها أكتر شياكة. ومتوفرة بثلاثة أحجام.
الحجم الكبير: 170 جنيه
الحجم المتوسط: 150 جنيه
الحجم الصغير: 120 جنيه
وأخيرا دي كانت مجرد نماذج من التشكيلات المتوفرة. لكن لأن شغل «علاء» كله هاند ميد وبيعمله بنفسه، فهو بيقدملك فرصة اختيار التصميم اللي يعجبك وتنفيذه، بحيث تكون الهدية اللي هتجيبها لحبيبتك، مفيش حد عنده زيها خالص.
عنوان المحل
5 ربع السلحدار.. خان الخليلي.. الحسين.. عند سنتر «عزام» علامة مميزة السؤال على سنتر «عزام» ولما تروح عند السنتر اسأل على «علاء» بتاع الشنط رقم التليفون 01225566369
