مستعد للارتباط؟.. الأمور دي لازم تاخد بالك منها الأول
كتير مننا لما بيفكر في الحب مبيسألش نفسه إذا كان مستعد للارتباط فعلًا ولا لأ؟ عشان رغبة الحب عنده بتبقى أقوى من أي اعتبارات تانية لحد ما بيلاقي نفسه في تجربة هو مش قدها في كل شىء.
مش لازم تكون المشكلة المادية هي اللي موقفاك، ممكن يكون عدم نضجك هو السبب في إنك مش عارف تكمل علاقة بدأتها، أو إن أحلامك هتاخد وقت طويل علشان توصل لقطر «الحب»، علشان كده مش مهم الوقت اللي هتوصل فيه؟ المهم إنك لما توصل تكون مستعد لرحلته.
تعالوا نشوف «الشباب» جاوبت إزاي على سؤال «شبابيك»: امتى تحس إنك مستعد للإرتباط؟
دليلك لتخطي مرحلة الانفصال.. (للرجال)
النضج
في وجهة نظر «بسمة. أ» الحب مش مجرد كلمتين حلوين هتقولوهم لبعض كل يوم؛ لإن الموضوع أكبر من كده ومحتاج لدرجة كافية من النضج اللي هيساعدك في إنك تتحمل مسؤولية العلاقة بكل مشاكلها.
وبتضيف: «لو إنتوا ناضجين هتعرفوا إزاي تعدوا المشاكل من غير ما تكبروها، هتعرفوا إزاي متبقوش هايفين، هتعرفوا إن المشاكل دي هي اللي هتقوي علاقاتكو ببعض لإنكو فيها بتكتشفوا معادن بعض».
الاستعداد المادي
لازم تعرف إن الاستعداد المادي من أهم المحطات اللي هتعرف فيها إنك مستعد فعلًا للارتباط، إزاي هتفكر في الحب والجواز وإنت أصلًا لسه مسؤول من أهلك!
«عبدالله. أ» كان شايف: «عمري ما هفكر في الإرتباط إلا لما أكون جاهز ماديًا، وبدأت تنفيذ أول خطواتي اللي هتساعدني في تحقيق حلمي المهني، وفي الوقت ده هبدأ أفكر في الإنسانة اللي هتعرف تتحملني حتى لو مرتبي قليل».
معاني الحب
مينفعش تدور على الحب وإنت مش عارف تحب نفسك؛ لإن فاقد الشىء لا يعطيه.
وزي ما «هدى. ح» قالت: «طول ما أنا مبحبش نفسي لدرجة كافية هظلم أي إنسان هيرتبط بيا؛ لإني ببساطة مش هعرف أحبه بنفس مقدار حبه ليا، ولو كنت بعرف أحب هيبقى الحب من طرف واحد لإني مش هعرف أخليه يحبني وأنا مبحبش نفسي».
عشان متتورطش.. اسئلة لشريك حياتك قبل الزواج
المواصفات المناسبة
كتير مننا بيتعرض عليه الحب من ناس حواليه سواء كانوا ولاد أو بنات بس اللي بيخلي الموضوع ميكملش هي المواصفات.
«منة. ص» بتقول: «مش مهم عندي تحديد الوقت قد ما مهم عندي إني ألاقي المواصفات اللي عاوزاها في الشخص اللي بيتقدم، النقطة دي بيتبني عليها حياة إتنين لو فشلوا فيها عمرهم ما هيكملوا صح».
الاستفادة من التجارب
في ناس بتشوف التجارب السابقة مفيدة بالنسبة للولاد على عكس البنات بسبب نظرة المجتمع.
بس «عبدالله. ع» قال: «لما تدخل أي تجربة هتفيدك بعد كده في حياتك بشكل عام وخصوصًا في موضوع الإرتباط، بس مش معنى كده إني أدخل كذا علاقة وأنا عارف إني مش هكمل، كل الحكاية إن العلاقات دي هتفيدك لو اختياراتك من الأول كانت غلط وكمان هتسهل عليك بعد كده اختيار البني آدمة اللي هتختارها للجواز بس لوصح أكيد كمل فيها».
