«التضخم يهدد مصر».. هو إيه التضخم ده أصلا؟
مصر بتمر بأزمة اقتصادية حادة جدا في الكام يوم اللي فاتوا.. وبدأت برامج التوك شو والجرايد تتكلم عن الأزمة وتستخدم مصطلحات اقتصادية لشرح تفاصيل الأزمة والحلول المقترحة لتجاوز الفترة دي.
المشكلة أن أغلبنا مش فاهم معظم المصطلحات دي، وبالتالي مش قادرين نفهم الوضع الحالي ولا مدى تأثيره علينا كشباب هيكون ايه؟ «شباييك» بدأ يبسط المصطلحات دي زي موضوع ⇐ «عوموا الجنيه».. طب يعني ايه؟ اللي اتكلمنا فيه عن التعويم، وهل هو مفيد ولا لا؟
التقارير الصحفية وخبراء الاقتصاد بيقولوا التعويم هيخلق حالة من التضخم.. ودي حاجة هتأثر جدا على السوق وهتمس المواطن البسيط في الشارع..
بس يعني إيه تضخم أصلا؟
لو كتبت على جوجل «معنى التضخم» أول حاجة هتظهرلك الرسمة دي، ومعاها الكلام المكلكع ده.. زي المعدل الإجمالي، تخفيض قيمة العملة.. ركز في الصورة وتعالى نشرحها ببساطة.
يعني ايه بقى التضخم ده؟ يعني ببساطة أن الأسعار تغلى، يعني دلوقتي الجنيه سعره قل.. بفرض أن في سلعة كانت بجنيه.. التضخم أن السلعة دي تبقى بجنيه ونص أو حتى 2 جنيه.
هو ده بس التضخم؟ الحقيقة أن مصطلح التضخم بيطلق في الاقتصاد على أي زيادة.. وبالتالي زيادة الأسعار تضخم.. وزيادة الدخول والأجور كمان تضخم.. وزيادة إصدار العملة النقدية كمان بيتسمى تضخم نقدي.
طب ليه بيحصل تضخم؟
في عوامل كتير ممكن تؤدي للتضخم.. زي مثلا أن يحصل فرق سعر في الخامات المستخدمة لتصنيع سلعة معينة.. يعني مثلا الخشب المستخدم في تصنيع الكرسي بـ10 جنيه والكرسي في النهاية بيتباع بـ15 جنيه.. لو الخشب غلي وبقى بـ15 جنيه، ده معناه أن نفس الكرسي هيبقى بـ20 جنيه.
أو ممكن قيمة الجنيه نفسها اللي تقل، زي ما بيحصل اليومين دول، وبالتالي الكرسي نفسه سعره هيزيد، تخيل أنهم كفتين ميزان، الجنيه في كفة والكرسي في الكفة التانية.. كل ما قيمة الجنيه تقل هيبقى أخف وعشان تعيد التوازن تاني محتاج تزود عدد الجنيهات في الكفة.. بمعنى أن الكرسي سعره زاد.
أنواع التضخم
في أكتر من نوع للتضخم، اللي يخصنا هنا في مصر في الوقت الحالي هو التضخم المفرط اللي بيتوقعوا أنه يحصل. وده بيحصل نتيجة لانخفاض قيمة العملة المحلية، مع استمرار زيادة الطلب على السلع والخدمات.
في دول كتير سبقتنا لحالة التضخم المفرط دي، زي ألمانيا ما بين 1921 و1923، لدرجة أن العملة المحلية انهارت تماما والأسعار زادت بنسبة 50% خلال شهر واحد.
هي دي أول مرة يحصل تضخم؟
الحقيقة أن مصر بتعاني من التضخم الاقتصادي من زمان، ووفقا لآخر تصنيف للدول وفقا للتضخم، مصر كانت في المركز الـ202. وده رسم بياني من موقع الاقتصاد التجاري، بيوضح معدل التضخم في مصر في آخر 50 سنة.
source: tradingeconomics.com
-----------------------------------
