توائم الفنانين زمان.. ياترى مين فيهم النجم الحقيقي؟
«فولة واتقسمت نصين» ده حال نجوم زمان اللي لأول مرة نعرف إن كان فيه منهم إخوات توأم متعرفش تفرق بينهم وتطلع النجم اللي تعرفه. فتعالوا إتفاجئوا معانا في الموضوع ده زي ما إحنا إتفاجئنا بالظبط.
عماد حمدي وعبدالرحمن
أكني شايفة نسخة بكل تفاصيلها من عماد حمدي، والدهم كان بيتلخبط فيهم من صغرهم من كتر ما هما شبه بعض بالظبط :) لكن في الموهبة عماد كان من صغره بيحب التمثيل أما أخوه عبدالرحمن فكان بيحب الرياضة بس اللي جمعهم هما الإتنين مع بعض هو حبهم للموسيقى.
أما بقى النجوم اللي هنتكلم عليهم دول نقدر نقول إن من غير اللقطة اللي الكاميرات وثقتها ليهم مكوناش هنعرف إن ليهم توأم.
نجلاء فتحي ومنى
عدسات المصورين لقطوا صورة لمنى لما كانت واقفة خارج أستديو التصوير السينمائي مع أختها نجلاء فتحي ولقطوا صورة ليها تانية يوم فرح بنت نجلاء فتحي. وكان اتعرض على منى أختها إنها تدخل مجال التمثيل لكن هى رفضت إنها تمثل خالص.
فريد شوقي وأحمد
وديه كمان لقطة بتجمع ما بين فريد شوقي وزوجته هدى سلطان وأخوه التوأم أحمد شوقي اللي هو صورة طبق الأصل منه بس طريقهم العملي مكنش واحد فكان فريد محترف للتمثيل وأخوه التوأم لواء.
زبيدة ثروت وحكمت
نفس الجمال ونفس العيون اللي تخبل زبيدة ثروت و توأمها حكمت، حكمت اللي رفضت زي منى أخت نجلاء فتحي إنها تدخل المجال التمثيلي وده على الرغم من محاولات المنتجين إقناعها بإنهم يجمعوا بينها وبين زبيدة في فيلم إلا إنها رفضت وإكتفت إنها تقف بجانب توأمها في خطوات نجاحها.
حسين رياض وفؤاد
حسين رياض وفؤاد شفيق جمعتهما موهبة التمثيل وقدروا إنهم يقدموا أدوار فنية متميزة وإتفاجأ الجميع لما شافوهم مع بعض في إحتفالية عملها ستوديو مصر في الأربعينات اللي قال رياض فيها «أشكر ستوديو مصر اللي جمعنا على شاشة واحدة» وراح فؤاد أخوه رد وقال «وأنا أشكر والدنا إنه جمعنا في الحياة، الله يسامحه».
