عايز تتكلم إنجليزي.. 5 قنوات يوتيوب هتساعدك
لو عايز تحسن من لغتك الإنجليزية.. «شبابيك» هيقدملك مجموعة أدوات تساعدك تقوي اللغة عندك، كل ما تحتاجه «الرغبة في تطوير مستواك – وقت - استمرارية»، حتى لو 10 دقايق كل يوم.
المرة دي هنقدملكو قنوات على يوتيوب لو تابعتها واستمريت فيها هتساعدك في الحصيلة اللغوية والنطق وحاجات كتير.. بس في كام حاجة لازم تاخد بالك منهم.
الفيديوهات مش كل حاجة
-الفيديوهات مش هتحسن الإنجليزي بتاعك، لكن يمكنك الاستفادة منها، عن طريق التدوين في رقة وقلم دايمًا.
-لو سمعت كلمة جديدة مش عارفها تكتبها وتدور على معناها في أي قاموس.
- لو مسمعتش النطق كويس تعيده تاني.
- جمع الكلمات الجديدة دي واتمرن على كتابتها ونطقها باستمرار، لأنك لو ركنتها هتتنسي ولا كأنك عملت حاجة.
- مش مهم عدد الفيديوهات الا هتشوفها، المهم أستفدت ايه من كل فيديو؟.
قناة مستر دانكن
القناة دي متقسمة أجزاء كتير، والميزة فيها أن الفيديوهات مترجمة بالإنجليزي ترجمة دقيقة جدًا هتفيدك لو في كلمات مش عارفها من النطق.
الجزء الأول: عبارة عن 90 فيديو، مدة الواحد تتراوح ما بين 5 دقايق إلى ربع ساعة أكتر حاجة، يعني ممكن لو اتفرجت واحد أو اتنين كل يوم تخلصهم في خلال شهر أو شهرين.. المهم أنك تستفيد من كل فيديو أقصى استفادة.
الجزء التاني: ودا متقدم شويا، هم 19 فيديو ومدة الفيديوهات قصيرة جدا، دا غير أن طريقته مش عادية ومش هتمل منها.
الجزء التالت: 6 فيديوهات.
الجزء الرابع: 9 فيديوهات.
الجزء الخامس: 47 فيديو، في كل فيديو من دول بيمسك كلمة ويفسرها في دقيقتين أو تلاتة.
الجزء السادس: 37 فيديو.
الجزء السابع: 32 فيديو، بيجاوب فيهم على الأسئلة الي كانت بيتيجي على الفيديوهات الي فاتت دي.
قناة Real English أو إنجليزي حقيقي
القناة دي الميزة فيها أنها بتعلمن الإنجليزي بمواقف حياتية يعني مش كلمات وقواعد لغوية كدا بس، لكن هتعرف ايه الي بيتقال في مختلف المواقف.
إنجليزي مع جينفر English with Jenefer
دي فيديوهات متقسمة حسب المستوى من المبتديء للمتوسط للمتطور في اللغة، وبتشرح قواعد اللغة وطريقة النطق بشكل سهل وبسيط. وكمان ليها بيدج على فيس بوك بتنزل أسئلة بسيطة وأجوبتها وفيديوهات غير الموجودة على القناة، لو قررت تتابع الفيديوهات تابع الصفحة عشان تستفيد أكتر.
قناة تعلم الإنجليزي الخاص بالأعمال
القناة دي مفيدة جدًا لو أنت عايز تتعلم الإنجليزي الخاص بالشركات وعالم الأعمال، لكنها محتاجة أنك يكون عندك مستوى متوسط على الأقل من الإنجليزي عشان تعرف تفهم وتكمل فيها.
فيها أقسام كتير والمدرسات الي فيها بيتكلموا بأسلوب لطيف جدًا وهيخليك عايز تكمل باقي الفيديوهات.
