مبقيتوش زي الأول؟.. 4 أسباب تؤدي لفتور الحياة بين الزوجين
كتبت- ميرال عزت
حياتك الزوجية بقت روتينية ومملة، ومفيش فيها أي تغيير؟ زوجك بيبعد عنك أو أنتي بتبعدي بشكل لافت للنظر وبدون سبب واضح؟ كل دي علامات للفتور بين الزوجين، ولو عاوزة تعرفي أكتر عن الفتور تابعي التقرير ده.
في التقرير ده من «شبابيك» هيعرفك مدرب التنمية البشرية هيثم حسني على أسباب وطرق علاج الفتور الزوجي.
الاختيار الخطأ
عوامل كتير بتكون سبب الفتور بين الزوجين وأهم عامل فيهم هو الاختيار الخطأ لشريك الحياة. أغلب حالات الطلاق الموجودة بمصر سببها الرئيسي هو الاختيار غير الموفق لأحد الزوجين، أو عدم التعارف بشكل جيد بين الزوجين في فترة الخطوبة، وتظهر عيوب الطرف التاني بعد الزواج ويبدأ الزوج أو الزوجة التركيز على العيوب، وهنا يبدأ البعد بين الطرفين ويظهر الفتور بين الزوجين.
عدم المصارحة
غالبا كتر الكلام في موضوع واحد بيسبب ملل، وخصوصا لو الزوجة بتحكي المشاكل اللي حصلت بين الولاد كل يوم أو غيرها من الموضوعات اللي من وجهه نظر الزوج ملهاش أهمية، فبيبدأ تجاوبه مع الزوجة يقل كل يوم عن اللي قبله، لحد لما يبقي كائن متلقي بس، وهنا بتزهق الزوجة وتفضل إنها متتكلمش لأنها من وجهة نظرها بتكلم نفسها، وهنا بيبدأ الخرس الزوجى.
وطبعا نتيجة للخرس الزوجي وقلة الكلام بين الطرفين، قلت برده المصارحة، وزادت الخلافات الزوجية اللي بتسبب ابتعاد طرف عن الأخر، وده من أهم أسباب الفتور.
العلاقة الحميمة
احيانا بيحصل نوع من الكسل من أحد الزوجين خلال العلاقة الحميمة، فهو مطمن إن الطرف الآخر بيحبه وأي شئ بيرضيه، فالبتالي مبيحاولش يقوم بأي جهد لإرضاء الآخر، مستنداً إلى الحب الذي يجمعهم، حتى إنه مبيحولش يهتم بمظهره.
تدخل الأهل
مشاكل كتير بتحصل بسبب تدخل الأهل في حياتنا الزوجية، ودي مشكلة بتتعرضلها زوجات كتير.
بسبب ضغوط الحياة وقلة كلامها مع زوجها بتبدأ تتكلم مع أهلها وهنا بتحصل المشاكل، خاصة إن الأهل وجهات نظرهم ممكن تختلف تماما مع وجهة نظر الزوج.
وعلشان كده دورو علي موضوع للنقاش، أو اخرجو في مكان جديد، أو اعملو أجازة زوجية كل زوج وزوجة يبعدو عن بعض يومين.
