إيه اللي هيحصل ليك لو بتكتب كل يوم؟.. اعرف من هنا
وأنت صغير كان المدرس يطلب منك واجب إنك تكتب عن فكرة معينة وموضوع الكتابة بالنسبة ليك كان مقتصر على المدرسة، بس تعرف بقى لو خليت الكتابة عادة وقتها حياتك هتتغير كتير.
إعرف إيه اللي هيحصلك في الموضوع ده واللي نقلناهولك من موقع Life hack.
فرص للكتابة
أول ما الكتابة تبقى عندك عادة يومية هتلاقي كل وقتك عايز إنك تكتب فيه ولو عدى يوم من غير ما تكتب هتحس إن فيه حاجة غلط فهتبقى بتدور على فرص تمارس من خلالها الكتابة زي مثلًا جريدة أو موقع أو أي وسيلة تانية.
مش هيحصلك قافلة
ساعات كدة بتكون عايز تكتب حاجة عن فكرة معينة وتجيب ورقة وقلم وتقعد قدامها بالساعات وأنت مش عارف تعبر إزاي، ودماغك قافلة بس لما الكتابة تكون عادة يومية هتلاقي نفسك بتكتب وبتعبر بكل تلقائية لأن الكتابة بقت جزء منك.
حصيلة كلمات
ولما الكتابة تكون جزء منك هتلاقي عندك حصيلة كلمات كتيرة. هتساعدك في التعبير عن اللي عايز تقوله سواء في مذاكرتك في الجامعة أو في شغلك، وطبعًا في حياتك بشكل عام.
حالة نفسية
فيه دكاترة بينصحوا إن لما تكون مضايق تكتب كل اللي حاسس بيه في ورقة لأن ده هيخلي نفسيتك تهدى شوية وده طبعًا هيبقى حاجة حلوة قوي في إن نفسيتك تكون كويسة طول العمر بالمداومة على إنك تفرغ شحنة زعلك على الورقة.
هتقرا كتير
كل الكتاب بيقروا في حياتهم كتير وأنت لما الكتابة عندك تكون عادة يومية هتلاقيك عايز تقرا كل حاجة روايات، وجرايد، وكتب، واستمتاعك بالكتابة هيخليك تغوص في بحرها أكتر وأكتر.
