جمد قلبك.. تغلّب على المواقف المحرجة مع 5 نصائح (انفوجراف)
مين فينا مبيتعرضش لمواقف محرجة بتخليه مش عايز يتعامل مع الناس، ولما بيقرر إنه يواجه بيلاقي موقف أصعب من اللي قبله، ومرة على مرة الفجوة بينه وبين الناس بتزيد والضيق كمان بيزيد من غير ما يلاقي أي حل.
في الحقيقة الموضوع مش صعب زي ما أنت متخيل، بس هو محتاج منك قوة أعصاب وذكاء في التعامل معاها، علشان كده دول 5 نصائح لو قدرت تنفذها صح هتعرف تتعامل صح مع المواقف المحرجة.
بلاش تتصدم
لما تتعرض للاحراج طمن نفسك بجملة واحدة «الموقف حصل وخلاص بس إزاي هتصرف»؟، الطريقة دي هي الصح لأنها هتخليك تعدي منه بأقصى سرعة وممكن كمان محدش ياخد باله.
على سبيل المثال، هنقول إنك كنت قاعد من أصحابك في كافية وفجأة سمعت صوت الشميز بتاعك بيتقطع، هنا يا ترى إيه الحل؟، أولًا اوعى تبين لحد حاجة لإن ممكن يكون الشميز مفيهوش حاجة، علشان كده اتأكد بنفسك وبعد كده لو فعلًا اتقطع قول للشخص اللي أنت عارف إنه هيتصرف صح، ولو أنت لوحدك ممكن تستعين بالجرسون وهو ممكن يلاقيلك حل.
ابتسم
في ناس لما بتتعرض لمواقف محرجة بتشوف إن أفضل حل هو الضحكة، بس مش المقصود هنا إنك تبقى في موقف محرج جدًا وتفضل تضحك، أنت كده هتخلي كل اللي حواليك يضحكوا عليك ويركزا معاك أكتر.
اللي اقصده هنا إن لما تقرر تعمل شوبينج وتدخل محل تشتري حاجات كتير للبيت أو لما تقرري تنزلي تشتري لبس وتدخلي المحل تختاري أكتر من قطعة بس تيجي عند الكاشير وتلاقي محفظتك فيها فلوس أقل بكتير من طلباتك، هنا بلاش توتري نفسك واتعاملي مع الموقف بابتسامة لطيفة واعتذري لقلة الفلوس، الموقف هيعدي ومش هيقول عليكي إنك فقيرة.
اعتذر لو غلطان
قبل ما تخلي الموقف يوقف تفكيرك، حاول تشوفه كويس لإن أحيانًا الموقف ده بيحصل بسبب غلطة منك أنت زي مثلًا إنك تكون في أي مواصلات وتقوم دايس على رجل حد تعبان مثلًا أو حتى سليم، فجأة تلاقي الشخص ده ابتدى يتخانق معاك مع إنك مكنتش تقصد من البداية.
هنا بلاش تسكت، اتكلم معاه بهدوء مش ببرود، اعرف إزاي تمتص غضبه صح وتوجه الموقف لصالحك من غير ما الدنيا تكبر والركاب كلها تتفرج عليكو، كلمة آسف هتحسسوا إنك قدرته مهما كان سنه طالما أنت غلطان.
بلاش تكبر الموضوع
لو فاكر إن تكبيرك للموضوع هيفيدك تبقى غلطان حتى لو أنت معاك الحق؟، المواقف المحرجة بتحتاج مننا إننا نعلم عليها مش هي اللي تعلم فينا، علشان كده بلاش تكبرها واعرف إزاي تديها حجمها وبس.
يعني مثلًا لما تبقى موجود وسط جروب من أصحابك وفجأة وأنت قاعد بتتكلم في موضوع ميعن، سواءً كان في السياسة أو التاريخ أو أي حاجة تانية وتلاقي حد من أصحابك بيقولك المعلومات دي غلط والصح كذا؟ هنا حاول تناقشه وتفتكر كويس ولو كنت غلطان قول فعلًا أنت عندك حق أنا نسيت، بس بقى لو كبرت الدنيا واتخانقت لمجرد إنك متبقاش غلطان، هيبقى شكلك وحش أوي لو حد دور عليها وعرف إنك كنت بتقاوح وبس.
استفيد من الموقف
طالما حاطط في دماغك ومقتنع جدا إن المواقف اللي بنتعرضلها بتخلينا نتعلم ونستفيد يبقى عمرك ما هتتأثر ولا هتتحرج مهما اتعرضت لمواقف ضايقتك.
يعني إيه؟ يعني لما يكون عندك إنترفيو وفجأة تلاقي البلوزة مسكت في أوكرة الباب واتقطعت لإنك مش واخده بالك، هنا بلاش تخلي الصدمة تأثر عليكي كتير وحاولي تتفادي الموقف بإنك تروحي الحمام تشوفي الوضع صح، لو إذا كان ممكن يتعمل بدبوس مثلًا أو حتى تتصلي بحد قريب ليكي يجيبلك بلوزة، وده في حال إنك معرفتيش تلجأي لأي بنت في الشركة علشان تساعدك.
⇓⇓نرشح لك⇓⇓
