سيبي روحك وارقصي.. 4 فوايد صحية للرقص
الرقص مش مجرد حركات، لأ ده ليه فوايد كتير. ممكن تقفلي عليكي أوضتك أو تروحي الجيم وتستمتعي بيها :D والفوايد دي بيشرحها ليكي أستاذ الطب النفسي محمد مزيد.
تفريغ الطاقة السلبية
«مزيد» بيقول إن الرقص نوع من الرياضة المحمودة زي المشي، بتفرغي من خلاله الطاقة السلبية اللي جواكي سواء إحساس بفشل أو حزن أو تفكير هيفرتك دماغك أو رغبات عدوانية، ودي كلها طاقة سلبية.
الرقص ليه دور في طرد الطاقة السلبية، وبعد ما بتطرديها بتحسي براحة واطمئنان وسعادة عشان عملتي تجديد للطاقة بتاعتك والطاقة السلبية اتبدلت بطاقة إيجابية مليانة حيوية ونشاط.
ومثال على كدة لما بترقصي زومبا سواء في البيت أو الجيم بتحسي إنك خرجتي ضيقتك وزعلك وقضيتي على كسلك وحاسة إنك نشيطة ومبسوطة. ده كان رأي «مزيد» في الموضوع اللي كان رأي شامل ومفصل عنه.
لكن كمان في دراسات اتكلمت عن فوائد الرقص الصحية للقلب، والتركيز، والتخسيس وغيرها.
تحسين صحة القلب
فيه دراسة نشرتها وكالة رويترز بتقول إن الرقص مع المشي بسرعة متوسطة بيقلل خطورة الإصابة بأزمة القلب، وكمان موقع «بيتر هيلث تشانيل» بيأكد إن الرقص مفيد للقلب عشان بيتحكم في كمية الدهون بالجسم.
وبيرفع مستوى الكوليسترول المفيد ويقلل الضار، وده بيمنع تصلب الشرايين، والموقع بيقول إن المطلوب بس الرقص لمدة ساعة لمنع تجمع الدهون في الشرايين، وبالتالي الحماية من الإصابة بأمراض القلب.
تخسيس الجسم
الرقص طبعًا ليه عامل مع إتباع ريجيم كويس إنه يقلل الوزن، وفي دراسة في مجلة علم الإنسان الفسيولوجي بتقول كده إن الرقص المنتظم كل يوم مفيد لإنقاص الوزن وده طبعًا بدوره هيزيد من رشاقتك وسلامة صحتك.
تحسين الذاكرة
فيه دراسة علمية حديثة نشرت نتائجها مجلة فوكس الألمانية بتقول إن الرقص بينشط الذاكرة والحركة الراقصة بتكون أقوى كل لما كانت الموسيقى معروفة للمخ. وأكدت الدراسة على ان التحفيز ده من شأنه أنه بيحفز الذاكرة وبالتالي بيقلل مخاطر الإصابة بمرض نقصان الذاكرة مع كبر السن.
محاربة مرض الزهايمر
فيه دراسة اتنشرت في مجلة «نيو أنجلاند» للطب بتقول إن الرقص المتكرر بيساعد على منع أثار مرض الزهايمر وأشكال أخرى من الخرف وده بان من إن الناس اللي بتعاني من مرض الزهايمر قادرين إنهم يفتكروا ذكرياتهم لما كانوا بيرقصوا على موسيقى معينة.
