قوة الصحفي في مصادره.. القواعد العشرة لمكالمة المصدر

جمعت خلاص أرقام المصادر اللي عايز تكلمهم في الموضوع بتاعك، استنى عندك :D . عايزين نقولك إن مكالمة المصدر مش بالساهل وفيه قواعد لازم تحطها حلقة في ودانك قبل ما تكلمه.

تكون محدد

مكالمة المصدر بتكون محددة وفي إطار ضيق وبتناقش معلومة محددة، ده اللي بيأكد عليه أستاذ خالد البرماوي المدرب المتخصص في الإعلام الرقمي، والمدير التحرير السابق لموقع «دوت مصر».

للصحفيين.. مواقع توفر صورا مجانية

الزن عالودان وحش

كلمت المصدر مرة ومردش كلمو تاني بعد فترة وخلاص، متكلموش أكتر من مرتين ومتكلموش نهائي بعد الساعة 10 بليل لأنه طبعًا وقت متأخر وممكن لو كلمته يرد عليك رد يضايقك إلا لو كان المصدر بنفسه قالك كلمني الساعة 10.

ومتكلموش طبعًا في الويك إند لأنه بيفصل فيها عن شغله، بس في حالة الخبر الطاريء، «البرماوي» بيقولك إنت مضطر إنك تكلمه في أي وقت عشان تحدث القسم بتاعك زي إن يحص انفجار كبير، لازم تكلم فيه مصدرك بوزارة الداخلية مثلا. وعشان تكون في الأمان إنت ممكن تسأل المصدر الوقت المناسب اللي ممكن تكلمه فيه إيه وبالممارسة هتعرف التوقين المناسب اللي تكلم فيه المصادر إمتى.

للصحفيين.. دليلك لاستخدام أفعال القول

اختيار المصدر الصح

مثلًا عايز تعمل موضوع عن أهمية الرياضة بالنسبة للأطفال فمش هتروح تكلم معلق رياضي، لأن هنا لازم تختار المصدر الصحيح اللي هيكون خبير رياضي، ومتخصص في علم النفس عشان يقدروا يفيدوك ويجاوبوا على أسئلتك صح.

مذاكرة المصدر

اعتبر المصدر مادة لازم تذاكر كل تفاصيلها عشان تنجح فيها وعليك إنك تدور وتشوف هو قال إيه قبل كدة بخصوص الموضوع اللي عايز تتكلم فيه سواء من خلال تصريحات أو لقاءات.

للصحفيين.. الجرأة حلوة لكن بهذه الطرق تهرب بقصتك سالما

تجهيز الأسئلة

بعد لما ذاكرته كويس قوي وشوفت هو قال إيه هتحضر أسئلتك اللي طبعًا مش هتكون أسئلة متكررة وإجابتها كان مجاوب عليها لأنك لو سألتها ليه هيقولك أنا جاوبت على السؤال ده قبل كدة.

وهيعتبرك مش متابعه ولا هتكون أسئلة عايمة مش في صميم الموضوع لأنه هيعتبرك تايه ومش فاهم وممكن ده ينرفزه ويقولك إقفل وحضر أسئلتك وكلمني أو مش هيقولك كلمني وإنت كدة خسرت المصدر بتاعك، وخلي بالك متكونش أسئلتك حادة تقفل المصدر منك.

والمطلوب بما إنك ذاكرت مصدرك إنها تكون أسئلة واضحة ومباشرة في صميم الموضوع وفيه زاوية مختلفة طلعتلك من مذاكرتك لكلام المصدر كويس قوي، وكمان متكونش أسئلة كتيرة.

وكمان طريقة صياغتها كويسة يعني مثلًا في حالة إنه قال تصريح خارج متقولش ليه بطريقة حادة إنت قولت كذا، لأ قول سؤالك بأسلوب صياغته كويسة.

10 نصائح للصحفيين المبتدئين.. عشان لو جم ميتفاجئوش

تعريف نفسك

مدير تحرير موقع دوت مصر سابقا، خالد البرماوي، بيقولك إنك لازم تعرف نفسك كويس قوي للمصدر بتاعك بمعنى إنك تقولوا مع حضرتك فلان الفلاني صحفي بالموقع الفلاني أو بالجريدة الفلانية وطبعًا بطريقة واضحة كلامك فيها باين.

طريقة كلامك

اجمع مابين حاجتين إنك بتكلم صديق ليك وإنك بتقوم بدورك كصحفي وبتسأله. يعني متكلموش بأسلوب حاد كأنك وكيل نيابة بيسأل متهم، لأ إتكلم بطريقة سلسة عشان ده هيخليه يفتح ليك قلبه ويتكلم معاك في كل حاجة.

5 تطبيقات لا غنى عنها للصحفيين

التجاوب في المكالمة

لما تكلم المصدر اتناقش معاه مش لما يتكلم تبقى ساكت أو تقوله أه تمام أه تمام لأ خلي الكلام ماشي بفكرة هات وخد وكلامه أكيد هيفتحلك أسئلة جديدة تعمق موضوعك أكتر.

زمن المكالمة

البرماوي بيقولك إن مكالمتك للمصدر خلي وقتها يكون مابين 5 دقايق، بالكتير قوي 10 دقايق، وده عشان المصدر ميزهقش ويتوه منك ويكون عايز يقفل لأنه مشغول.

بعيدا عن «جوجل».. 4 مواقع ترجمة مهمة للصحفيين

التواصل معاه

التواصل مع المصدر مهم جدًا، وده بإنك تبعتله الموضوع بعد لما تكتبه وتكلمه تقوله إنك بعته ومش بس كدة. تواصلك معاه وإحساسه إنك صحفي شاطر لما كلمته وسألته، هيخليه يساعدك ومش هيبخل عليك بأي معلومة.