هو قص الشعر ليه علاقة بحالتك النفسية؟
تفتكري لما قصيتي شعرك آخر مرة حسيتي إنو فرق مع حالتك النفسية؟ لو محتارة هتعرفي كل حاجة في الموضوع ده.
التاريخ بيقول إيه
الشعر زينة المرأة، وجزء محوري ومرتبط بحالتها النفسية وده بيبان لينا من خلال قصص بيرصدها أستاذ التاريخ بجامعة عين شمس طارق منصور.
- أول قصة
في معبد عمدة الأقصر في البر الغربي موجود على جدران المقبرة منظر لعدد من النساء المصريات منهم أهل بيت العمدة اللي كان فيه منهم مجموعة بتنكش شعرها، والمجموعة التانية بتحط التراب عليه كنوع من الحزن على وفاة العمدة وده بيعكس رد فعلهم نتيجة للحالة النفسية اللي هما فيها من أثر فراق العمدة.
- تاني قصة
وهي قصة أيوب وناعسة من الأدب الشعبي اللي فيها تشابه بينها وبين قصة سيدنا أيوب وزوجته. والقصة بتتكلم على إن ناعسة قصت ضفايرها اللي كانت بلدها كلها بتحسدها على جمال شعرها وده حزن على أيوب اللي طال مرضه. وعشان كمان تاخد العلاج لأيوب اللي هيدوه ليها أهل البلد بعد لما تديهم ضفايرها.
ودكتور «منصور» بيقولنا إن العكس صحيح بمعنى إنه بجانب إرتباط الشعر بالحالة النفسية الحزينة في القصتين. برده قص الشعر مرتبط بالحالة المزاجية المفرحة لما الواحد بيقصه بيحس إنه بيضفي على نفسه حالة سعيدة.
رأي الطب النفسي
الدكتور النفسي أحمد عبدالله بيثبت لينا إن قص الشعر مرتبط بالحالة النفسية وبيقولنا إن الدكاترة اللي تخصصها أمراض جلدية وتناسلية لما تيجي تعمل دراسات عليا بيكون جزء من دراستها الطب النفسي وده دليل على إن فيه علاقة مابين الجلد اللي جزء منه متمثل في الشعر وبين الحالة النفسية
وفيه بنات لما بيجلها إكتئاب شعرها بيقع ولما بتتعالج وتتحسن وتيجي تستعيد حيويتها وجمالها أول حاجة بتفكر تعملها هى إنها تقص شعرها وتظبطه وتهتم بيه. فنقدر نقول إن قص الشعر هو تعبير عن البحث عن الشعور النفسي الإيجابي جواكي.
رأي مركز التجميل
وصال المصلوحي صاحبة أحد مراكز التجميل بتقول إن البنات اللي بتجيلي عايزة تقص شعرها بيكون إما إنهم عايزين يعملوا لوك جديد للشعر أو إن شعرهم تعبان عايز يتقص أطرافه أو إكتئاب وزهق وروتين حياة ودول نسبتهم 30 % وقص شعرهم بيكون مرتبط بحالتهم النفسية ديه يعني مثلًا فيه بنات بعد فترة الحمل الطويلة وبعد توتر الإمتحانات بتجيلي عايزة تقص شعرها وتصبغه.
نصيحة وصال
وصال كملت كلامها معانا وقالتلنا إن دلوقت فيه بعض البنات مبقتش تعمل قصة لشعرها وبتكتفي بإنها تقص أطرافه وتخليه سيمبل بس التغيير مطلوب ولو هي عايزة تغير من قصت شعرها وتخلي حالتها النفسية فريش.
- قصة أل جارسون
الرواية الفرنسية LA GARCONNE اللي صدرت سنة 1920 هي كانت بداية وجود القصة دي والرواية بتحكي عن بنت كل اللي عايزينوا أهلها هى إنها تتجوز فبتحارب فكرهم.
وبتتمرد عليه وبتروح تشتغل، وبتقص شعرها عشان تقول إن مفيش فرق بينها وبين الولد في المجتمع وGARCONNE معناها بالفرنسية الولد.
- قصة الكاريه
وطبعًا قصة الكاريه أصلها سعاد حسني وهي اللي خلت كل الناس لم تيجي تقصها تقول للكوافير عايزة أقص قصة الكاريه بتاعت سعاد حسني. أو ممكن تقصي أي قصة تانية تشوفيها في أي مجلة عجباكي.
و«وصال» بتقولك إن القصة بتبقى على حسب تدويرة وشك يعني لو وشك صغير لازم تعملي قصة تدي تدويرة لوشك ولو كان طويل إعملي «أوصة» عشان تاخد مساحة من طول الوش.
المصادر : 1
⇓نرشح لك⇓
