هكذا بدّلت السينما لسان المصريين.. الدليل في 23 مثال

فيه كلمات بقت جزء من قاموس حياتنا اليومية، والكلمات دي معظمها سمعناها في السينما أو المسرح ومن ساعة ما سمعناها وهى عششت في نفوخنا :D تعالوا بقى نقولها سوا :D . 

بعتني بكام يا عشري

الجملة دي قالها أحمد السقا في فيلم إبراهيم الأبيض بعد لما إكتشف خيانة عمرو واكد صاحب عمره ليه وإنه خد فلوس عشان يسلمه تسليم أهالي لمحمود عبد العزيز .

لا تجادل ولا تناقش يا أخ علي

عادل إمام وأحمد راتب في فيلم الإرهابي حصل بينهم حوار حاد شوية وراح أحمد راتب قطع حوار عادل وقاله الجملة الشهيرة لا .تجادل ولا تناقش يا أخ علي

أولة حبنا

طبعًا كلنا فاكرين شيرين وسمير غانم في مسرحية المتزوجون والحالة الكوميدية اللي كانت بينهم :D وقد إيه كانت شيرين متعايشة مع البيت اللي على قد حاله وبتعتبر الأولة اللي فيه هى أولة حبهم.

شكلك فاهم يا نصة

غبي منه فيه، من أكتر أدوار هاني رمزي عظمة. الكاركتر اللي كان عمله فيه كان يهلك من الضحك. وحواراته مع طلعت زكريا كانت مسخرة ومنها الحوار  اللي في الفيديو ده :D

أنا عايزة ورد يا ابراهيم

فعلًا أنا عاوزة يا إبراهيم :D . كلنا عايزين ورد مفيش مناسبة تعدي علينا أو لحظة حب ومنقولش الجملة دي بنفس طريقة يسرية لخالد صالح في فيلم أحلى الأوقات.

أنا يا عمي فنان بوهيمي يعمل ما يحلو له

 أحمد راتب راح يقابل فريد شوقي في فيلم "يارب ولد" عشان يخطب بنته وهو لابس أي حاجة ومش مستحمي وريحته فايحة وحجّته في كدة إنه فنان بوهيمي يعمل ما يحلو له :D

نهون نهين

أحمد مكي في فيلم لاتراجع ولا إستسلام كان مجنن ماجد الكدواني ومعصبه من كتر غبائه وسذاجته وإنه مش عارف حاجة والمشهد ده أكبر دليل لما الكدواني كان بيقوله يعمل حاجات على الكمبيوتر وهو مش عارف وكل شوية يقولوا نهين نهون.

أقولك فين ولا تزعلش

فؤاد المهندس قال الجملة ديه لسمير صبري في فيلم أخطر رجل في العالم وكان مش طايقه :D . الفيلم اللي كان فيه شوية مواقف كوميدية وكلنا فاكرينها لحد دلوقت.

ماحدش بياكلها بالساهل

فعلًا يا ريا محدش بياكلها بالساهل . قالتها نجمة إبراهيم في فيلم ريا وسكينة وهى ياعيني :D بتشتكي من الست اللي عضتها لما جت تخنقها وتموتها.

من النهارده مفيش حكومة أنا الحكومة

فيلم الجزيرة من الأفلام المهمة في تاريخ أحمد السقا وعمل فيها دويتو مع محمود ياسين وقال فيه جملته الشهيرة دي واللي قالها بعد لما قلبه مات. وبقى مليان جبروت واعتبر نفسه الكل في الكل ومشهده ده قد إيه بيفكرني بمحمود مرسي في فيلم شيء من الخوف.

احنا في زمن المسخ 

عادل إمام في المشهد ده مع هند صبري في فيلم عمارة يعقوبيان كان منهار من حال البلد والمجتمع وكل حاجة وطلع كل غضبه في جملة إحنا في زمن المسخ.

احنا في زمن النفخ

وجه تهامي في فيلم أنا بضيع يا وديع وقلد عادل إمام  بنفس المشهد بس بدل ما يقول إحنا في زمن المسخ قال إحنا في زمن النفخ.

نشنت يا فالح

إستيفان روستي خلانا نقول جملة نشنت يافالح بنفس طريقته في فيلم سمارة لما حد ضربه بالرصاص غلط وكان قاصده يضرب تحية كاريوكا.

لف وارجع تاني

علاء ولي الدين، كان عليه شوية جمل تفطس من الضحك ومنها فيلم الناظر الفيلم اللي كلنا حافظينه صمه وفاكرين طبعًا مشهد المذاكرة في المدرسة لما كان خارج من المدرسة وهو بيهتف ومتحمس وفجأة لف ودخل تاني المدرسة عشان ميموتش :D

اعمل نفسك ميت

الجملة ديه برضه فالها علاء في نفس الفيلم لما كان في بلطجية بيضربوه هو وأحمد حلمي فقالوا إعمل نفسك ميت عشان محدش يضربه . ولما زاد الضرب عليه زهق وراح قال برضه جملة هو كله ضرب ضرب مفيش شتيمة.

حازم حازم بسيوني بسيوني 

احنا هنا أسرة مع بعضينا

أنا محدش يتوقعني

مصطفى خاطر أبدع في دور عم شكشك في مسرح  مصر وطلعت منه كام جملة معلقة مع الناس كلها وهى أنا محدش يتوقعني اللي كان بيقولها لإبنه اللي فاكر إنه مش سامع حاجة من مصايبه اللي بيقولها.

أنت جاي تعزي ولا جاي تهزر؟ لا جاي أهزر

يحيي الفخراني عمل حاجة مكنتش متوقعة في فيلم الكيف كان راح يعزي وهو محشش :D ومن كتر ما هو مسطول قعد يضحك ووصل إن كل اللي في العزا يضحكوا :D .

إنجليزي ده يا مرسي 

خطة في منتهى الذكاء 

في فيلم فاصل ونعود قال الجملة ديه محمد فراج الظابط  لأحمد راتب وكريم عبد العزيز وبيواجههم فيها بالخطة الذكية اللي إتعملت في ميت فيلم قبل كدة الحقيقة واللي كان عارفها كويس قوي بتفاصيلها سبحان الله :D وهى إن أحمد راتب  طلع رئيس عصابة وسلط ناس تخطف إبن كريم وتأذيه.

هل هناك غرض من تسويق هذه الكلمات المقتبسه وانتشارها؟

كاتب السيناريو هشام هلال بيأكد إن صناع الأفلام مبيقصدوش انهم يسوقوا جمل بعينها من أعمالهم بهدف إن الفيلم يتعرف وينتشر بين الناس أكتر.

وبيقول كمان: إن موضوع الانتشار بيجي من الآداء الصادق لشخصية الممثل، فبالتالي كلامه وصل للناس، وكمان بيحصل إن من كتر الإعلان عن مسلسل أو فيلم الناس بتلقط جمل معينة وبتفضل معلقة في ذهنها.

أستاذ علم الاجتماع طه أبو الحسن بيوضح إن السينما ممكن تأثر بالسلب أو الإيجاب على المجتمع وعشان كدة لازم كتاب السيناريو يحافظوا على الذوق العام للمجتمع، وينتقوا الألفاظ والمضطلحات كويس.

بمعنى إنهم يراعوا إن الكلام اللي بيكتبوه، بعض الناس ممكن تقول جمل منه في حياتها. والكلام ده بيكون فيه منه كلام لطيف على السمع وفيه كلام يخدش الذوق العام ومينفعش يكون السيناريو فيه كلام من النوع الأخير، لأنه بكدة بيأثر في السلوك العام للمجتمع  وبالتالي هيخلينا مجتمع فاشل بلا قيم ولا تقاليد.