شوفت إعلان «القعدة» بتاع الملابس الداخلية؟.. أهو ده إهانة للنساء
واحد من إعلانات رمضان الموسم ده فيه تلميحات مش لطيفة عن المرأة، الاعلان بتاع «القعدة» إياه، وده طبعًا شيء خطير لأن الإعلانات بقت أكتر من المسلسلات وبتتشاف بنسبة كبيرة فالإعلان ده ممكن يأثر بالسلب في نظرة المجتمع للمرأة.
وعشان كدة حبينا نعرف رأي المنسق العام لحملة شفت تحرش فتحي فريد وعضوة المجلس القومي للمرأة سناء السعيد في الموضوع ده.
فين القيمة؟
«فريد» بيقول إن أدبيات أي إعلان في العالم إنه يكون بيقدم قيمة ما للمجتمع زي التعاون، الخير وهكذا. لكن في بعض الإعلانات عندنا مفيش أي قيمة بتضاف واللي بيضاف هو سلوكيات غير مقبولة.
المنسق العام لحملة شفت تحرش بيقول إن المفروض أي حد عايز يعمل إعلان يقرا في المادة الإعلامية كويس جدًا عشان يقدر يقدم إعلان محترم فيه قيمة.
تعرف على مواعيد عرض مسلسلات رمضان 2016 (صور)
النساء سلعة
يشير «فريد» إلى أن "صاحب الإعلان بيعتبر المرأة سلعة لترويج منتج ما ودي طبعًا نظرة سيئة جدًا لأنه بيجعل المرأة مجرد شيء أجيبه عشان يحققلي نسبة مشاهدة عالية للإعلان بتاعي".
ولما نيجي نبص على إعلان قطونيل السنة دي هنلاقي إن فيه تلميحات عن المرأة. والإعلان ده طبعًا بيأثر في نظرة المجتمع ليها وهنلاقي الشباب بيبصوا عليها زي ما الإعلان بص عليها وكمان بيقولوا نفس الحملة اللي إتقالت عليها بنفس الطريقة.
وطبعًا كلام «فريد» بيفكرنا بإعلان عمرو يوسف عن منتجع موسى كوست والهجوم اللي حصل عليه عشان نظرته للمرأة فيها اللي كانت فيها معاكسة وحاجة زي كدة بتأثر بالسلب في نظر الشباب للمرأة.
إهانة المرأة
أما عضوة المجلس القومي للمرأة سناء السعيد فشايفة إن تناول المرأة في بعض الإعلانات فيه إهانة للمرأة ومش بس في الإعلانات ده حتى الدراما فيها نماذج بتسيء للمرأة زي ظهورها إنها امرأة ناقصة لعوب وتاجرة مخدرات.
«السعيد» شايفة إن اللي بيعمل إعلان بيكون غرضه التربح ومش بيهمه صورة المرأة هتطلع إزاي. هو همه يعمل نسبة مشاهدة عشان يكسب من الإعلان. وبتقول كمان إنه لازم يحصل وقفة حقيقية لكل اللي بيسيء للمرأة.
