للبنات.. تسريب من الشباب عما يلفت انتباههم في اللقاء الأول
تنشغل كثير من النساء بما يدور في عقل الرجل، ويفشلن في معرفة ما يفكر به في النهاية.. البعض يعتقد أن السبب الرئيسي في ذلك يرجع إلى سوء التفكير، ولكن هذا ليس بصحيح.
فالمرأة تفشل لأنها تقع تارة في فخ التعميم وأخرى في فخ ما يقوله المحيطون، وبدلًا من موازنة الأمور تجد نفسها تخرج من خطأ لترتكب آخر، وبخاصة عندما يكون الأمر متعلقًا بالمقابلة الأولى، حيث المبالغة في أشياء لن تلفت نظر الرجل إليكِ.
حينما تحظي بمقابلة أولى مع من تودين الارتباط به، وتقول لكِ صديقتك أكثري من المكياج فالرجال يحبونه، قد لا تكون على صواب.. فهناك من لا يحب المرأة التي تضع مكياجًا أيضًا. إذن فالأمر نسبي يحتاج منكِ فقط قراءة هذا الاستبيان لمعرفة الأشياء التي تلفت نظر الرجل إليكِ منذ المقابلة الأولى؟.
قد يهمك أيضًا⇐أوعي تخبي عليه حاجة زي كده وانتو مخطوبين
طريقة اللبس
يقول مصطفى كريم (اسم مستعار): «نوع لبس البنت هو اللي بيلفت نظري أول مرة، يعني هل هو محتشم، ضيق، محجبة ولا بشعرها وطريقة الحجاب بشكل عام، غير كده ذوقها في التعامل لإن البنت لو قليلة الذوق أو تنكة ده هيخلي الولد مهما كان جمالها ميركزش معاها ولا يشوفها من الأساس».
الثقة
الثقة في النفس هي ما تجذب أدم محمود (اسم مستعار)، حيث يقول «لما بحس ان البنت اللي قدامي واثقة في نفسها ومش حاسه انها مخلوق ضعيف ولا ناقص زي ما فيه بنات كتير بيوصلني منها ده أو هي بتكون قاصده تبان كده وفاكره ده دلع بيشد الشباب.. م الآخر البنت اللي بتكون واثقة في قدراتها ومعلوماتها وفي اختياراتها ومستعدة تدافع عنها قدام الكون كله هي اللي بتشدني ليها»
العين
يقول محمد منير (اسم مستعار): «من أكتر الحاجات اللي بتلفت نظري للبنت لما أشوفها للمرة الأولى عينيها، في الوقت ده ممكن معرفش أقول كلمتين على بعض، وبشكل عام طريقة اللبس كمان بتكون من الحاجات المهمة اللي بتلفت النظر؛ لإن العين واللبس لما بيكونوا حلوين الولد بيتشد ليها أكثر».
الابتسامة
يقول أحمد عبد الصبور (اسم مستعار): «ابتسامتها، لو البنت مكشرة دائمة ومش مبتسمة مش معنى كده إنها تكون عمال تضحك على الفاضي والمليان، أكيد هيكون للابتسامة دي مفعول مهم من اللحظة الأولى، وغير كده لبسها المناسب لسنها وشكلها لإن النقطة دي بنتعمل مشاكل عند بنات كتير، والأهم إن تكون ريحتها حلوة فيها الحياة مش زي بعض الناس اللي لما تيجي تقربلهم تحس بريحة المستفى والعيانين».
الشخصية
(محمد عبدالرحمن) لم يختلف رأيه كثيرًا عن الآراء السابقة: «زي ما اهتمام البنت بشكلها ومظهرها مهم وبيعتبر من أهم الحاجات اللي بتلفت نظر الولد للبنت من اللحظة الأول، بس ده ميمنعش إنه كمان بيهتم جدًا بالشخصية اللي بيلاحظها وبيحسها من المقابلة الأولى؛ لإن ده بيظهر في طريقة كلامها، ولو رجعنا تاني للشكل هنلاقي إن الطريقة اللي بتحط بيها المكياج وفهمها للي بتعمله على وشها من أكتر الحاجات اللي لا بتخليه يبعد بالمشوار أو يقرب وميحسش بأزمة».
اقرأ أيضًا⇐لماذا ينسحب الرجال حينما تتقرب النساء؟ الشكل
(حسام زيدان) كان شايف: «الشكل من أول الحاجات اللي بتلفت نظري هي وطريقة اللبس، صحيح هو مش معيار للحكم على البنت بس من أهم الألويات اللي بتخليني انجذب للبنت، غير كده كمان الروح الحلوة وده بيظهر بردوا من اللحظة الأولى حتى لو هي تتكسف؛ لإن زي ما الروح الحلوة بيبان عليها الوحشة كمان بيبان عليها».
الخجل
(محمد الحسيني) معياره كان أبسط بكتير: «حتى لو البنت مش على درجة جمال كبيرة، أكثر حاجة بتجذبني ليها كسوفها وخجلها، ده لوحده كفيل إنه يخليها جميل في عيني حتى لو مكنتش كده في الحقيقة، غير كده كمان طريقة اللبس يعني لو هي من النوع اللي بتلبس ضيق أكيد أكيد مش هتجذبني، كل لما تكون البنت محتشمة كل لما تكون جذابة أكتر».
